【完】好多件令我好後悔嘅事 (20/4/2017修改): 42 (修改)
***
夜晚再返到宿舍，正想開門，先發現門底攝住一張MEMO。上面鋪滿塵，踩滿鞋跡，相信已經係好耐之前嘅事...但係依張嘢，我之前一次都無見過。
「番被我唔要，
你冚完幫我掉咗佢就得。
欣」
發夢咁望住張紙，有啲失望，上面竟然只係寫住依啲咁樣嘅嘢。MEMO背後膠水嘅位置黏滿塵埃，睇嚟張紙，已經喺道門到跌咗落嚟好耐。
記得我上次飲醉酒返嚟，我瞓咗喺lounge，嗰一晚身上無啦啦多咗一番被，覺得好奇怪，但太眼瞓，一轉眼就瞓返覺，前前後後發生過咩事，喺我腦入面無咗「次序」嘅概念，剩係記得依件事「曾經」發生。
至於依個叫做「欣」嘅人，我更加無印像。
睇嚟，方方面面我都係一個廢人。
唯有食一枝煙。靠喺窗前，向窗外面呼。
玻璃上面我嘅倒影，面色蒼白，眼袋好深，鬚一日一日長得更長、更雜亂，想剃好耐，但一拎起刀就唔想郁，應該無人會在意我，再做依種事都係多餘。眼球白色嘅地方慢慢被侵蝕，望住自己想殺死自己，多活一日，今日都比琴日嘅我更加面目可憎。
嘆一口氣，噴出灰色嘅煙。西牛一定比我好好多，佢比我更似一個人。雪櫃嘅酒已經飲晒，僅餘嘅Ice都畀西牛拎走埋，雪櫃空空如也。將佢閂埋，我當無打開過。
叫過好多次西牛飲完我啲酒一定要買返返嚟，但佢次次都唔理我，得閒會放幾十蚊喺我枱頭，當係找咗條數，但如果真係拎張單出嚟，佢大概只係找咗十分之一咁上下，我諗。而因為拎張單出嚟逐個細項同佢計，未免太過小家，畢竟佢介紹過女人同我做愛，總算有恩於我，於是，窮到極爛都好，未試過真係狠下心腸要佢畀返條數。
煙頭一手彈落去，瞓返上床，夜色深沉，輾轉反側。好想飲酒，但無酒，於是瞓唔著，又起返身，走到窗邊，望住地下好耐。喺知道自己可以跌落去，而確認自己可以跌落去之後，我就返返上床。來來回回，活像廢物。
因為無酒，無辦法之下，只好食多枝煙。深深地吸，另一枝煙都點完，再鑽入被窩，大被冚過頭。結果久久未能入眠，都係行咗出房。
我去咗搵嗰一個叫做「欣」嘅女仔。
打開樓層嘅Whatsapp Group，喺嗰一層嘅人到，一個將個名改做「欣」字，或者與之近似嘅人都無。沿住走廊走到Lift口。好彩嗰到有一塊板，上面寫咗所有人嘅名，我拎住張MEMO跟住上面嘅「欣」字，喺黑板上面搵。
終於，我搵到一個個名有「欣」字嘅女仔。
佢間房喺嗰一層嘅最尾，雖然好遠，但反正行到一半，就行埋落去。如果唔去搵佢，我都無處可去。留喺房，盞覺得痛苦。
經過好多間房，好多房都鎖咗門，我沿途走到最尾，走到嗰個叫做阿「恩」嘅女仔嘅房門前面。我敲門。
「唔該。」我向裏面嗌。裏面無回應。本來想轉身走，但又唔想，於是我決定等多一陣，裏面都係無人應我。「阿欣喺唔喺到啊？」我問。
「喺到。」裏面有人大嗌，「等陣！」
我企喺佢房門外面等。
佢打開門。
其實，我特登嚟，只係想講一句「多謝。」
「嗰日多謝你番被。」好多謝嗰日佢掉咗番被畀我，雖然，我知道佢真係純粹想掉咗番被，至少今時今日我活到咁嘅田地，應該無嘢值得一個女人關心。「因為張紙掉咗落地，所以我啱啱先睇到。」我向佢解釋。
講完，跟住收聲，一時間兩個人就靜落嚟，依個時間我先顎高頭睇清楚佢個樣。佢就係嗰朝早叫保安嚟嘅女仔。
「Err...同埋，」我即刻向佢道歉，「嗰朝早好對唔住。」
一個古銅膚色嘅女仔。覺得佢識得打沙灘排球，第一眼有依種感覺。
「唔洗喇。」佢白眼一下，一隻手就放到門柄上面，準備閂門。
「真係好唔好意思。」我向佢講。
「受唔起。」佢冷淡回答。
「啊...」唔知答啲咩好，所以答唔到啲咩，「嗯。」我同佢講，一直只可以同佢講「對唔住」、「對唔住」...
「你知唔知你好困擾到人？」
佢問，睜大眼望實我，眼眉用住一丁點力，我第一次見，一雙對我如此憎惡嘅目光。走開，唔好煩我......佢一對眼，無說話，都睇得出佢諗緊啲咩。
「晨早流流鬼死咁嘈仲亂咁鬧人，你知唔知會阻到人瞓？」
「好對唔住。」除此之外，無以為應，「對唔住。」
「你飲到你死唔關我事，但你顧下其他人又得唔得？其他人要瞓嫁。」
鬧完，呯一聲，佢閂咗道門。閂門聲傳到走廊盡頭，化成回音，又傳到返嚟。
「好對唔住。」
灰色嘅依道門上面，貼滿佢去打沙灘排球嘅相，好多張都係佢同佢同室友嘅合照。其實我唔知邊個係佢室友，只係推斷，如果唔係咁嘅話，點會全部相都係佢哋兩個。佢哋兩個都活得好好，笑得好燦爛。
隔住道門，係佢把聲，「係估唔到你連過嚟扮可憐搏同情你都出埋。」
心跳到幾乎窒息，講唔出半句話。
「你估我唔知你啲嘢？」佢打返開道門，瞪大嘅一雙眼，係類似見到有人將垃圾掉喺佢門口嘅嗰一種。「嗰陣未聽過你啲嘢咋！」佢指住門前嘅我，「唔係？早知由得你凍死！」
佢眼尾睥住我，凌厲到好似真係想我去死。原來，我已經黑人憎到依種地步，唔死都無用，或者，係我死咗反而對其他人嚟講係一件好事。
而我，再無可能反駁到佢。「對唔住。」道一個歉都講到詞窮。
「咪寫咗張紙叫咗你掉走番被囉？」佢皺住眉，質問我，「你又借啲易咁想點？」
「唔係啊，」我伸出手。佢喺我眼前，周圍慢慢圍上一圈白框，好可怕，想即刻離開依到，捐落地底避入一個無人嘅窿。「唔係咁嫁，我真係無特別意思。」
「今次到你定嗰個咩嘢西牛？」佢側住頭，咬一下嘴唇，「又搵女食啊？」
我由衷咁同佢講，「我真係想嚟多謝你。」
但解釋已經無用，無人會信。佢繼續鬧，「你兩個成日帶啲女上嚟，個個知道晒啦！」佢指住一層嘅房間，掃過去，「你唔好諗住喺依到搵食囉。」
長長嘆一口氣，「唔係啊...」，但聲音弱到跑唔出喉嚨之外，感覺似被迫入絕路。
「最睇唔過眼係你中學妹妹仔都搞！」佢講到個「搞」字嘅時候，講得特別狠，咧嘴一笑，一臉嘅鄙視，可能佢恨不得吐我口水。「人渣。」然後受盡佢白眼。
「我無搞佢...」邊答，一邊就莫名地哽咽。
而佢別開視線，一臉不耐煩，「仲有，你好臭。」
「對唔住。」我估，應該係講我陣煙味。
「唔好喺我房門。」
佢指住走廊嘅另一個極端，揚一揚手，敷衍住我叫我走。而我低住頭，默然無聲，一個人企喺走廊到，好似一個畀訓導老師指住個頭嚟鬧嘅細路。
我微笑，「我唔係咁嫁...」
講出嚟，自己都好難相信，好難令人相信。
「我無興趣知。」
「依幾日我發生咗好多事...」我答應佢，我真係會改嫁...但說話未講到出口，佢就打斷我。
「關我咩事？」佢反問。
「我諗，我已經受咗好大懲罰。」我苦笑回答，「我都好辛苦嫁喇...」希望佢唔好再鬧。
但係，真係越嚟越覺得自己臉目猙獰。
「你自己攞嚟嫁喎。」佢冷淡到教我膽怯。
啞口無言。
「唔好諗住喺到搏同情啦，唔該。」
搏同情...一句說話直插我心臟。跟住呯一聲，今次阿欣佢真係閂咗道門，無再開過。
我向佢哀求，「我真係好後悔嫁喇...」
「你都痴線。」佢鬧我，「你咪一路後悔到死囉！唔關我事嫁喎。」
「可唔可以原諒我？」
莫名其妙，竟然會咁在意佢嘅睇法。
「咁...」我問佢，我話「如果我死咗，你會唔會舒服返啲？」
「你死咗都唔關我事。」
***
返到房，執好行李，將所有衫衫褲褲都執晒去我嘅行李篋到，用力將所有隆起嘅衫壓入去，再將篋鎖好。實實在在有一個篋，裏面係我嘅一切。房間屬於我嘅一邊空終於清空，剩低西牛一邊散落一地嘅雜物。
最後得返嗰一番被，佢一直放咗喺衣櫃嘅最角落處，本來想喺我搵返佢嘅主人之後，就將番被還返畀佢。但依家已經無用，於是我用一條尼龍繩，將番被穩陣咁綁喺篋頂。無人要，好可憐，只好將佢一併帶走。
一件無人要嘅嘢留低喺到，好聽啲係佢好可憐，不得不將佢帶走，但直接啲講，係佢會麻煩到人，要其他人嚟善後，將佢執走。
環視房間四周，確定再無屬於我嘅嘢漏低喺到，我拉住個篋，然後行。走嘅時候無明確方向。於是決定搭車返咗屯門先，去望一下個海。
拉住個篋，沿住海邊，吸引咗好多途人嘅目光，但上次試，過今次就習慣，佢哋扮成無望過我，當我視線一放到佢哋身上，佢哋馬上避開。
一個人，耳邊吹過海風，聽住拍岸嘅浪。好想有個人可以聽我講。
可惜過去做錯過嘅事已經太多，多到打開電話簿，掃到一堆唔可以打畀佢哋嘅人。中間掃到「爸爸」兩隻字，打咗半個電話號碼，最後都係放棄。終於...一個可以聽我講嘢嘅人都無。
最後一個電話，來來回回，踱住步諗咗好耐，我跟住Whatsapp Group，搵到佢Whatsapp Icon，然後選擇咗打畀阿欣。我之所以打畀佢，唔係因為佢有任何特別作用，純粹因為佢完全唔識得我，而且憎我，我肯定佢一定唔會救我返轉頭。
我係抱住依種信念嚟打畀佢，想同佢傾兩句。
「喂？」我諗，佢唔會知我係邊個。「阿欣？」我向電話另一端問。猶豫咗好耐，先敢再講自己嘅名，「我係格仔。」
「妖——」聲音越拉越遠，佢一聽到我名就準備CUT我線。
「唔係啊！」我叫住佢，「喂！」我大嗌，「喂！」
「咩嘢事啊？」佢好唔耐煩咁答。
「我最後一次搵你嫁喇，」我向佢保證，「之後唔會煩到你。」
而佢靜落嚟。
我繼續問，「可唔可以幫我一個忙？」
「唔可以。」講到個「以」字之後，聲音又再拉遠。
「講完我就會即刻死，」我叫住阿欣，「我真係可以保證。」
電話嘅另一端停低，但佢無講嘢。唔知佢會唔會再答我，總之，好希望有人可以聽到我以下依一堆說話。
「聽我講兩句，」我求阿欣，「畀少少時間我...我搵唔到邊個人可以聽到我講。」
「你係死先好。」阿欣回答。
「嗯。」手持電話，禁喺耳邊，我點頭。
希望今後我唔會再困擾到身邊嘅人，今次真係最後一次。
「中三嗰年呢，」我話，「記得我嗰陣仲係個個頭好長、好油，連講嘢都唔敢，剩係識得傻笑嘅人。」
「咩話？」佢拉高聲線，「你無啦啦講乜嘢中三？」
「啊...說來話長。」我勉強答出一句話，僅僅接到佢，好等我再講落去。「總之，你聽我講先。」
佢無回應。
「記得我中三嗰時，我係一個個頭好油、啲頭髮好長、成日唔剃鬚，成個嘴唇上面都係毛仔嘅人。」我笑，「哈哈，你有無畫面？中學時期一個咁樣嘅人。」
「有嘅。」阿欣冷淡咁答。
而我聽到阿欣答我，就安心落嚟，「多謝你聽我講。」
然後佢依舊無出聲。
「一個咁樣嘅人，如果鍾意人，一定係全校熱話。」
「Err...想象到。」
「而且全部人都會拎嚟笑，個女仔嘅處境會好慘。」我話，「畀一個咁核突嘅人鍾意，一定好痛苦。」
「嗯...」
「就算依家事隔咗咁多年再回想起嚟，都覺得抱歉。」一唔小心，咁樣都害到人，「嗰陣仲成日整埋啲卡啊、訊息又打一大段咁、仲會為咗部電話無電Send唔到訊息畀佢而傷心一整日、佢生日仲特登整蛋糕。」
曾經有過一段咁嘅日子，對「未來」、「愛情」、甚至「人類」本身都充滿希望，生命光輝燒得最亮之時，認為一定有人會為我做過嘅嘢而感動嘅嗰種年紀。
「自以為對人好好。」我話，「但要佢花咁多時間，思考到底應該點拒絕我，真係太難為人。」
「......」
「結果等到佢生日，佢打咗個電話，叫我出街，我以為佢係約我出去啦。對人一啲戒心都無。」
「跟住呢？」
「起初以為係我同佢兩個人，跟住就見到佢同佢嘅朋友。」
「......」
海邊好靜。坐喺海邊嘅長櫈上面，望住個海。人生有好多時間我都用咗嚟望海，因為望住個海唔洗故意咁笑，比面對人類從容得多。
「送咗份禮物畀嗰個女仔，佢就同我揮手，拜拜，叫我走。嗰一晚我自己返咗屋企連飯都無食，係咪好白痴？」
「你喎？」
「係啊。」我答，「係我。」
「哦......」
「轉走臨走一刻，見到佢朋友望住我嘅一對對眼，交投接耳嘅神情，我到依家都記得，佢哋嘴角揚起不禁竊笑嘅嗰一秒鐘。」
「......」
「人類好可怕，」講完又怕說話太認真，「哈哈。」我笑，希望氣氛輕鬆啲。
「......」
「以前未同過其他人講依件事，你要幫我保守秘密。」我同佢講，「因為你唔識得我，反而安心。」
依舊，佢都係諗唔出回應嘅說話。
「唔好意思。」我向佢道歉。
「唔緊要。」佢問我，「但你想講嘅係...」
「其實我無咩特別想講。」我答，「因為無寫稿，我作文又唔係特別叻過人，所以，其實無立意可言，我無咩想帶出。」
「哈。」佢陪過了笑。
「之後，我就遇到一個叫張文靜嘅女仔。佢對我好好。」
「邊個嚟嫁？」
「我中學嘅一個師妹。」然後我諗起，佢好似知道我帶過一個中學生上嚟，於是我同佢講，「不過你都唔識嫁啦，唔緊要。」
「哦......」
「佢係一個對人好好，無論又何都會將個心100%咁交出去嘅人，」一時哽咽，我故意停頓一下，拎開電話，深呼吸，吞一啖口水，將自己調整過嚟，再將電話放返喺耳邊。我同佢講，「而我，就只係一心都諗住唔好太認真、唔好太認真...」
「所以你就扮情聖玩人嘞？」佢鬧我。
「唔係啊，」我反駁，「唔係...」但係又無力反駁。
「大把人傷心過你。」
「我知...」
「個女仔最後點？」
「至少，佢依一刻係幸福啩...」
阿欣聽到，呼一口氣，「咁都好啲。」
「嗯...」
「唔好諗住拎以前啲嘢出嚟扮慘就可以過到骨。」
「好對唔住。」
「唔好諗住將你嘅錯瀨畀嗰個女仔，」佢鬧我，「周圍去害人嗰個係你。」
「我知，」我答，「我真係好後悔嫁喇...」
「後悔又點？」佢質問我，「你覺得會有人因為你後悔，而唔記得以前嘅事？」
「嗯。」
「你點改都無用，做過就係做過。」
「......」
「你徹頭徹尾係一個人渣。」佢總結。
月光照喺海上，遠處有一個貨櫃碼頭，碼頭著住橙黃色嘅光，光散喺半空，夜空中形成一個奇怪嘅半圓，將嗰一個碼頭罩住。
「你會唔會憎我？」我問。
「我做咩憎你？」佢反問，「憎你，我係憎你一個。而你依種人，係令所有人都會厭惡。」
「啊...都係嘅。」
「係咁多啦嘛？」佢問我，「人渣你自辯完啦嗎？」
「嗯。」我點頭，向住海中心，「自辯完喇，」然後按照約定，「我以後唔會再搵你。」「唔好意思，阻咗你咁多時間。」我再一次向佢道歉。
佢「哦」一聲咁答過我。
「阿欣，多謝你。」最後一句，「同埋，你以後打沙灘排球要比心機，哈哈。」
「唔洗你講，依個我一定會。」佢不屑咁同我講，「我先唔會好似你成個廢人咁。」
之後，阿欣就收咗我線。
終於，我做完我最後嘅答辯。
我該死，點樣辯駁都好，答案必然如此。
無論後唔後悔，其他人嘅人生都唔會因為咁而變得輕鬆，顯而易見之事。如果想用一句「後悔」嚟減輕自己嘅痛苦，幻想有人嚟原諒自己，只係自欺欺人，可恥、自私、幼稚而可笑。我活該受更大嘅罪。
所以，上帝...或者大佛...黃大仙...諸如此類嘅嘢啦...
我認罪。
仔細呼最後一口氣，打開一包新買嘅煙，食最後一枝。一枝煙時間。海旁，夜裏背後一堆著住一點點光嘅高樓，沿路一點點發出白光嘅路燈。沿岸鋪滿石，浪拍埋嚟，好似比剛才靜。世界靜到得返浪聲，彷彿其餘一切生命都死去，大概我再活着，亦只係苟且偷生。
靠喺欄杆邊綠，煙吸到最盡頭嘅一點，向海一彈，一星火光墜落，墜到海中。我跨出去。
(全文完)