中左六合彩頭獎四千八百萬，依家唔知點算?: 10
「...哦...！」聰11;53PM 我hea左思敏。
「...我諗住喺樓上cafe搞個birthday party 呀，你有冇興趣離一齊玩呀？」思敏11:55PM。
「...er...我睇吓點先啦，你啲朋友我都唔係咁識！」聰11:56PM，我答。
「...都係文蔚，阿瑜果啲咋嘛，你今日見到果啲囉！」思敏11:57PM ，咦...阿瑜都去？咁咪可以再見到佢囉？
「...er...應該ok嘅。」聰11:58PM，我覆。
「...咁遇左你架啦！」思敏11:59PM，思敏好開心咁回應。
估唔到思敏咁健談，最後我比佢捉住傾計，傾左差唔多成個鐘。
雖然對佢冇咩feel，但係同佢傾計的而且確有一種好舒服嘅感覺。
同思敏傾完之後，我好快就訓著左。
「...喂...阿哥起身啦。」阿妹叫醒左我，
我起身望一望個電話，原來已經十一點幾。
因為今日係星期日，所有人都唔洗返工。
今日我地一家人出左去旺角睇傢私，老豆負責新屋嘅裝修，
而全屋嘅設計、風格同特色，都交哂比讀過室內設計嘅阿妹負責，
基本上阿妹揀完野，我只係點一點頭就已經搞掂，咩野都唔洗理。
我地由下午行到夜晚，之後仲去左銅鑼灣CEO唱k buffet 添。
唔講你唔知呀，我老豆係唱得之人，果啲咩（九百九十九朵玫瑰）呀，
（我是一隻小小鳥）呀，仲有咩（披著羊皮的狼）呀，完全唔會放喺眼內，
而我同阿妹可能都遺傳左老豆啦，兩個都身懷絕技。唔係我吹水呀，
我一入依間公司做已經連續攞左三界公司春茗歌唱比賽冠軍架啦，
之後因爲唔想再屈機先唔再參加比啲新人發揮吓咋。
而我阿妹呢，亦都攞過理大嘅歌唱比賽冠軍，都真係算係一門三傑架！
「...～喜歡你讓我下沉～喜歡你讓我哭～能持續獲得糟蹋亦滿足～」話口未完，野都未食阿妹已經表演緊啦。
「...唔該...阿哥，音樂大兩度、咪大一度，echo細三度！」拿...睇到啦，我地好有要求架。
阿妹唱緊，我就緊係出去攞野食醫飽個肚先啦。
行左成日你都咪話唔攰呀，依餐幾大都食返夠本。
雖然依家係有幾千萬身家咋，但係我暫時都唔會亂洗，一來本來我就係個孤寒嘅人，
加上老豆嘅忠告，所以今日離食k buffet都係因為佢做緊$209蚊任唱飲食我地先離架咋。
不過講真依度啲野食都真係唔孤寒架喎，又有即開生蠔，刺身又多款式，
比起好多濕尻酒店有過之而無不及囉。
睇吓先，牛扒靚喎攞啲先，咦...咪住咪住出生蠔喎，拿拿臨走去排返轉先。
因為啲人一見到生蠔出都開始一湧而上啦，咁我緊係唔執輸，
即時加快腳步攝返個好位先啦。但係唔知係咪心急得濟呢，
攝上去果吓唔小心一野撞左埋一個女仔度喎。個女仔比我一撞，
成個人即時向外彈開，我自然反應一手拉住佢手臂，好彩捉得住。
「...唔好意思！」我一手捉住佢手臂，一邊勁講唔好意思，但係望真啲，
乜...原來...又係阿瑜？...緣份嘅野真係話離就離，擋都擋唔到。
「...吓...阿聰！」阿瑜個樣仲驚訝過我。
「...係囉...咁啱嘅！」我一邊答佢，同時放開捉住阿瑜手臂嘅手。
「...係囉！」阿瑜答得好細聲，面紅紅咁，個樣有啲尷尬。
「...文蔚都喺度呀，你洗唔洗搵吓佢呀？」我問。
「...吓...唔...唔洗啦！」阿瑜個樣有啲驚，好似唔想我阻住佢咁。
「...er...咁我唔阻你啦，轉頭見到先傾啦。」見佢個樣怪怪地咁費事好似煩住人咁啦，唯有自動自覺彈開啦。
雖然話就話唔阻佢姐，但係攞野食途中我都不忘偷望阿瑜，阿瑜亦都留意到我，
我感覺佢好似有啲專登避開我咁，我行去攞壽司，佢就即刻掉頭走去攞蛋糕，
我去攞蛋糕佢又走返去攞小食，而且好快攞完佢就急急腳走返入房啦。
因為佢都真係走得好急，所以我都留意唔到佢到底喺邊間房。
都冇辦法啦，攞完野食我都斯斯然行返入房。
「...～原諒我這一生不羈放縱愛自由,～也會怕有一天會跌倒～oh ～no～」
一入到去老豆唱緊beyond，而阿妹就坐左喺度點緊歌。
「...嘩...幾多野食喎！」阿妹一見到啲野食對眼即時發光。
「...ok wo，生蠔都幾生鮮！」我答，之後阿妹就忍唔住放低左個遙控，衝左埋離食野啦。
「...喂...洗唔洗成版容祖兒呀，點返幾首陳奕迅比我都得掛！」依家到我揸返住個遙控點歌啦。
「...阿哥你鍾意咪自己插啲陳奕迅上去囉！」阿妹邊食邊講。
「...係啦，頭先喺出面撞到阿瑜喎！」我一邊揀歌一邊同阿妹講。
「...吓...係咩？幾多人呀？」阿妹問。
「...點知姐，我見到佢就自己一個。」我答。
「...哦...，whatapp問吓佢先。」阿妹一邊講一邊拎左部電話出離撳，
而我就繼續點歌。但係過左幾分鐘，都唔見阿妹有咩動靜喎。
「...喂...點呀？」我問。
「...咩點呀？」阿妹答。
「...阿瑜呀！」我有啲悔氣咁再問。
「...冇應我呀，可能人地同屋企人一齊費事應酬我地啦。」阿妹答。
「...係咩！會唔會係男友呀?」唔知點解我會問左個咁嘅問題。
「...點會呀，我都冇聽過佢話有男朋友嘅。」阿妹答得好老定咁，唔通真係我諗多左。
我地繼續唱k同食野，間中出去攞左幾次野食都冇再撞到阿瑜，
而且阿瑜亦都冇覆過阿妹whatapp，直覺話比我知，
阿瑜係有啲野嘅，差在唔知係咩姐。
飲飽食醉之後，我就車住老豆老母同阿妹，一家人開開心心咁返屋企啦。
因為今日真係行到腳都跛，沖完涼之後，我好快就攤左上床休息，
十一點零鐘左右，思敏又好似琴晚咁whatapp我傾計。
今日佢同我講佢喺機場做野嘅大小事，經佢口中得知，原來佢係做地勤，
亦都講左一啲喺機場見到，或者喺其他同事口中得知嘅趣聞比我聽，
每次聽思敏講野都真係好舒服，唔會有唔自在嘅感覺，
因為聽朝要照常返工嘅關係，同思敏傾到十二點左右我就訓左。
第二日係星期一，我亦都要照常返工，至於老豆老母呢，
一大清早就出發去左新屋度搞裝修，而阿妹呢，都係照樣返工，
但係收工之後，我就會車佢過將軍澳交代一啲裝修嘅細節比老豆執行。
間新屋呢...真係幾靚，喺港鐵站將軍澳站上蓋超方便，可能老豆性格同我一樣啦，
揀嘅野都係我鍾意嘅。新屋依個屋苑我真係好鍾意，屋企樓下嘅大型會所就不在話下啦，
泳池、健身室果啲就例牌有架啦，估唔到連燒烤場都有。街都唔洗落，
樓下就係大型商場，食玩買乜都搞掂哂，簡直就係我依啲懶人嘅恩物。
依個星期每日都係咁過，每日準時返工放工，收工去新屋幫手，
每晚同樣時間思敏都會打離搵我傾計，呻吓、多數都係佢講比我聽，
我唔主動講嘅野，佢從來都唔會問我，所以我都好小提及我嘅事，
至於六合彩同搬屋就更加隻字不提添。唱k果日之後，我冇再見過阿瑜啦，
聽阿妹講，阿瑜依排一收工就急急腳咁走左，加上阿妹都忙於搞新屋嘅設計，
同阿瑜都小左溝通。
今日係四月二十一日星期五、天陰，可能依排嘅日子真係過得太充實啦，
時間過得好快，眨吓眼就已經過左差唔多兩個星期啦。
今晚係我住喺公屋嘅最後一晚，聽日我地全家就要殺出屋邨放眼世界啦。
依家係夜晚十二點幾，因為忙左成日所有屋企人已經訓哂。
我一個人坐左喺梳化度，回想返依大半個月離嘅經歷真係相當夢幻。
好多人活一世都係平平淡淡咁過，而我三十歲都未到，就已經坐擁千萬身家。
係咪應該搵個目標，向住理想進發呢？望住屋企每一個角落，
每一撻污漬背後都有一段回憶，以前失戀用手指摑花嘅牆身、
讀書時期玩汽槍射凹嘅鑊蓋、沖涼時貪玩揼上天花板嘅廁紙漬，
一點一滴...係我嘅童年回憶。過埋今晚我就大個啦，開始我新嘅人生，
喺依度我應承自己，日後成唔成功都唔緊要，但係起馬我要成為一個有用嘅人，
想做嘅、鍾意嘅，我都會盡量爭取，就算唔成功，起馬我都真係嘗試過，
對得自己對得人，（xx邨）多謝你咁多年離嘅照顧，再見啦。