好日都唔買六合彩,點知一買就中左金多寶頭獎四千八百萬,
但係同同事夾份,依家唔知點算好?
            
本人係八十後貨van佬一名,打份牛工搵得果萬零蚊,
同老豆老母仲有細妹住喺公屋,叫做餓唔死但係又冇咩作為果種啦。

平時都唔好賭錢,係間唔中啲同事話度左條咩(無敵六串一)呀,
(不敗三串七)呀,先會夾幾十蚊玩吓,當然...最後十居其九都係輸嘅。
我就冇咩感覺啦,但係睇住啲同事一千幾百咁揼落去,每次都輸到仆街果個樣,
有時都真係唔知為乜,又唔會發到達嘅,贏左又要請人食飯,


輸左人地又唔會請返你食喎,你話幾無謂呢!

所以我平時六合彩都好小買,因為覺得得果八百萬連層靚小小嘅豪宅都買唔起,
要贏就起馬要贏過千萬先算係發達架嘛,所以起馬要有過千萬嘅獎金我先會買。
 
今日...本來一切如常,朝早送完貨之後,我如常咁揸住部hiace返到離公司樓下嘅車場泊低部車。
老死阿榮同占士已經早我一步泊低左部車,兩個齊齊坐左喺車場啲櫈度,擔住口煙,
揸住份報紙起勢咁分析緊今晚嘅足球賽事,一向都多野講嘅占士黃興貴上身咁不停講,
而比較低調嘅阿榮就間中點下頭咁,好似好認同占士嘅分享咁。



見到我返到離之後,兩個先斯斯然咁趷起身,落去茶記食飯。
食完飯之後,佢兩個緊係例行公事咁準備行過去茶記對面嘅馬會落飛啦,
平時嘅我通常都會自己一個人返上去車場部車度恰返陣嘅,
之但係今日又唔知點解好鬼死精神喎,神推鬼擁咁跟左佢兩個走左入馬會。

入到去人上人海咁,平時都唔覺咁多人架,今日唔知點解多人左好多。
四圍望吓...發現原來公司跟單carol都喺度,
走左埋去吹左幾句之後得知人山人海嘅原因原來係因為今晚有金多寶,
好似話好多期都冇人中頭獎,所以今期嘅頭獎好似話有四千八百萬喎。



 
聽到有四千八百萬喎,就算平時唔多賭錢嘅我都真係有啲心動,
正所以心動不如行動,加上Carol提議夾份買野多小玩吓,所以到最後我、
carol加埋占士同阿榮四個係一人夾廿蚊買左四張廿蚊嘅電腦飛嘅。

占士同阿榮兩個好快咁一人隊左廿蚊比我就急急腳咁衝左埋電視底度繼續睇波,
而本來繼續同我一齊排隊嘅carol亦都因為阿頭突然打比佢叫佢返去跟返啲野,
所以都係好匆忙咁放底廿蚊就走左,所以到最後八十蚊嘅電腦飛就由我一個人負責保管。
 
食完飯之後,我同占士、阿榮就繼續派貨,完全唔記得買左六合彩單野。
 
之後收工如常返屋企食飯、沖涼、打機,根本上我嘅生活就係咁乏味,
日日都重複、重複又重複咁,沖完涼挨喺梳化冇野做,
拎起部電話緊係整返舖(傳說對決)先啦,等左陣(未能連接),重新整理,(未能連接),
如事者搞左五分鐘,依然係連接唔到,之後我上官網嘅facebook先知道原來成個server死左,


勁多人係度問候緊官網,咁無辦法啦,冇得玩...我就無所事事咁拎起個電視遙控喺度撳離撳去啦。
 
撳到去j2,咦...喂,開六合彩喎,晏晝嘅記憶即時出返哂離。
我喺風褸袋度摷返果幾張飛出離,繼續大字形咁挨住張梳化。
電視主持人好hea咁介紹完啲太平紳士之後...
 
「風車旋轉形嘅電動攪珠機,1至49 個號碼波已經由下至上,由左至右順序排列好。」

 
主持人講完啲例牌對白之後,所有波就her哂落部機度啦。

 
望住部攪珠機,本來挨喺度冇咩表情嘅我,越坐就越直,越坐就越前。
望著一個個攪出嘅號碼,竟然中完一個又一個,到攪出第六個號碼果一剎那,
手上嘅小米手帶2顯示,心率直頭跳到一百八十幾咁濟。



 
「yeah~」連第六個號碼都中埋,理智比興奮打低左,心入面同個口同時yeah左出離,
但係好快理智又打返低興奮,我即刻望一望四周,好彩阿妹去左街,
老豆老母食完飯就返左入房睇電視,而家大廳就只有我一個人。

 
我深呼吸一下令自己保持冷靜,然後細細聲開門行左出後樓梯,
之後神打上神咁喺個後樓梯度不停揼地。

 
「yeah~yeah~yeah!」

 
「...gogogoalealeale!」



 
「...yes!yes!yes!」

 
彷彿好似痴左線咁,手舞足蹈,fing左十幾分鐘之後,個人終於都冷靜返落離,
但係諗諗吓....仆街啦...張六合彩四個人夾份架喎,點算好呀!!!!
 
已有 0 人追稿