(3)

做完最重要嘅野,即時成個人鬆左一口氣,因為早餐都未食嘅關係,
依家都真係幾肚餓,於是離開左銀行之後我就走左去附近嘅(祥勝茶餐廳)食野。
 
「...唔該...比個一號餐,凍檸茶。」叫完野食之後,我又要開始諗吓第二個難題,
就係點樣可以滿天過海,睇離暫時都要繼續返工先啦,等時間耐啲先再搵機會辭職唔做,
之後再慢慢疏遠佢地...咁應該係暫時最好嘅方法。
 
Hea住咁食完個lunch先至下午兩點幾,因為要扮返工唔返得屋企嘅關係,




百無聊賴嘅我無所事事咁喺跑馬地度尻遊。跑馬地嘅生活真係好遊閒,
周圍都冇咩人,而且啲人嘅步伐個個都好似我咁行得好慢,
睇到出佢地一係就係有錢佬,再唔係就係退左休嘅有錢佬,
放慢腳步嘅生活其實都真係幾正。
 
行吓行吓,我經過一間車行,門口放左一部我一直都好想買嘅七人車喺度,
雖然唔係啲咩貴車,新車落地都係三十幾萬度,但係對於我地一般打工仔離講就係天價離架啦,
加上買車容易養車難,之前就算有幾鍾意都真係諗都唔敢諗。
 
心思思嘅我睇睇下忍唔住行左入去舖頭入面近距離觀摩吓愛車嘅真身。




因為係平日,加上跑馬地本身就係冇咩人,而家舖面得我一個客喺度,
間舖亦都唔係啲咩大舖得兩個店員喺度打緊牙骹,眼尾都冇望過我一眼。
 
「...唔該!」越睇越鍾意嘅我,忍唔住叫店員過離,諗住問吓啲詳情。
 
「...唔該!」但係店員好似好唔想理我咁,要我叫左幾次先捨得行埋離,
個樣仲要有幾分不爽,好似話我阻住佢地傾計咁。
 
「...有咩幫到你呢?」男店員繼續冇咩語氣咁問我。
 




可能真係有啲心郁嘅關係啦,問左條友仔好多問題,
條友越答啲態度就越差,好似睇死我買唔起喺度運吉咁。
 
「...er...其實上網可以睇到哂啲資料架啦,不如你返去了解吓先啦。」
到最後店員忍唔住答左句咁嘅野。
 
「...吓...。」我都唔知比啲咩反應佢,完全冇諗過佢會咁講野囉。

雖然我喺著得爛身爛勢啲姐,一件穿哂窿嘅t恤,下身同樣係穿哂窿嘅牛記。
 
「...你隨便啦。」我都未答佢就已經回頭行左返埋位啦,嬲得我吖...我好人離架嘛。
 
「...唔洗睇啦,我就要依部!」嬲嬲地嘅我好有型咁講左句咁嘅說話,人生真係要威返次先得。
 
我連會都唔洗上,直接eps比哂三十幾萬,兩條粉腸當堂收左皮,




由頭先死老豆咁嘅樣180度轉變到依家笑到四萬咁口,又張生前張生後咁狗得佢地吖。
 
搞埋啲手續都已經黃昏,時間應該差唔多啦,可以搭車返屋企。
我坐小巴返到屋企已經係旁晚啦,較準時間...我準時踏入屋企門口。
同平時一樣老母坐左喺梳化度睇緊電視,因為老豆做裝修好q準時收工所以亦都返左離,
依家喺廁所沖緊涼,而阿妹就仲未返到。
 
我當然係繼續扮到約無其事咁行返入房啦,坐左喺電腦枱度hea左一陣,
等到阿妹都返埋離,老母就開枱食飯啦。
 
除左我之外,個世界真係一切如常,老豆繼續對住部電視,
見到啲議員鬧鬧鬧鬧,老母繼續安於現狀,阿妹依然愛講事非,
根本個世界就唔會因爲你多左二千幾萬而停低。
 
「...阿媽...聽日唔洗帶飯啦我!」食食吓...阿妹無啦啦講。




 
「...做咩唔帶飯呀?」阿媽問。
 
「...er...嘻嘻,其實我辭左職啦,聽日去見新工!」阿妹笑笑口有啲尷尬咁答。
 
 
「...自己衡量吓啦,真係做得唔開心嘅轉換吓環境都好嘅!」老母一向都唔係煩果啲人,
之前我有一排失左業成幾個月都冇吹我搵工,所以今次阿妹辭職喺佢眼中亦都唔係咩大事。
 
講真...仔女都出哂身,加上又唔洗供樓,其實都真係冇咩經濟負擔,
而老豆本身份裝修亦都係(三更窮、五更富)餐搵餐食咁,
所以對於阿妹辭職亦都冇任何意見,繼續一邊食飯一邊睇電視咁。
 
而我阿媽就屬於半退休人士,本來喺老人院做看護嘅(即係阿姐),
但係成日要返通宵,加上又要搬啲行動不便嘅老人家上落床搞到勞損,




所以阿妹讀完大學之後已經冇做全職,只係間中返去part-time幾日咁囉。
 
食完飯之後,兩老就走返入房,阿妹就喺個廳度左揀右揀咁,
拎哂啲套裝出離諗緊聽日見工著邊件喎,而我就一反常態走左入房,
坐左埋電腦枱度,又試開始睇吓啲地產網啦。
 
講真都真係幾難揀得落手,因為家住港島南區,喺我地屋企附近嘅一個新嘅樓盤,
一個二百呎都唔夠嘅開放式單位都講緊要成差唔多五百萬,又唔想搬過海喎,
又冇理由搬去啲仲舊過我地公屋嘅舊樓架....!點諗都諗唔掂,唯有慢慢再諗吓啦。
 
唉...諗諗吓...忽然覺得點解中左六合彩一定係諗買樓呢?點解唔諗吓做其他野呢?
人生唔通除左樓就冇其他野可以去追求? 就係咁...我準備熄電腦挨埋床諗一陣啦。
因為部電腦多數都係阿妹用,所以依家要好小心,
每次上完啲地產網同啲銀行戶口記錄果啲都要即時del左佢,
唔可以留低任何蛛絲馬跡。




 
過左一陣...阿妹終於都開完fashion show啦,依家拎返哂啲衫行返入離。
而我就繼續拎住部電話挨喺張床度撳緊。
 
「...嘻嘻...大佬!」阿妹攞住其中兩套衫叫我。
 
「...咩樹?」我一邊撳電話一邊答。
 
「...邊套好睇啲呀?」頂...揸住兩套衫行埋離都知又係問埋哂啲無聊問題架啦。
 
「...果套囉!」我係咁易望左一眼之後就指左其中一件比佢。
 
「...咦...你都冇望過!」阿妹有啲恢氣。
 
「...咪玩我啦阿妹,其實我地男人真係唔識分架,...
喺我地眼中真係件件一樣架咋,你放過我啦。」我投哂降咁嘅樣答佢。
 
「...我都知...其實問你係想你比啲信心我姐,只要你答得肯定啲,
咁我地啲女仔就會信架啦!」阿妹繼續無奈。
 
「...咦...就白色果套啦,好得呀!」
 
「...係咪咁樣?」我扮完興奮之後再用冇語氣嘅腔問。
 
「...頂...又玩野!」阿妹睥緊我。
 
「...其實見乜工咁緊張姐,之前見工都見你是是但但架咋嘛!」我問。
 
「...依份唔同架,係個以前讀書嘅師姐介紹架,人工高而家份工好多囉,
間公司福利又好,所以今次點都要落力啲架啦!」阿妹個樣堅認真,
睇離佢真係好重視依份工,希望佢成功啦,唔好浪費左我依幾年嘅供書教學呀。
 
冇吹水架我,因為老豆經常都冇工開,之前阿媽份人工都係夠屋企嘅日常開資,
所以阿妹啲學費我都真係幫保左唔小架,不過一世人兩兄妹就冇計啦。
 
同阿妹傾完一輪之後,我地大家都上床訓覺,抖足精神準迎接聽日返公司嘅挑戰啦。