等左一陣,阿妹同兩個friend一揪二㨢咁行返離啦。
睇吓先...依家除左阿妹之外仲有三個女仔,其中一個喺阿瑜,
另外果兩個我認得應該係叫維維同阿珠,估唔到幾年冇變佢地都靚左唔小。
 
「...唔該阿哥,開開車尾吖!」一開左門,阿妹就帶頭衝左上離,
我打開埋尾門之後就行左落車尾睇吓有啲咩幫手啦。 
 
「...等我離啦。」一行到埋去,
就見到阿瑜同維維喺度搬緊啲汽水、
野食,於是我就叫佢地行開等我離啦。


 
「...ok架啦我,你地兩位上車坐吓啦。」我講,
因為搬緊果陣佢兩個仲企喺隔離唔知點咁。
 
「...咁好啦...唔該哂!」佢地兩個互望左一下就講唔該行左上車啦。
 
放哂啲野上車之後,我就準備開車啦。
 
「...係咪去中山公園?」我擰一擰頭問佢地。
 


「...有私家車不如去遠啲囉?」阿妹忽然(屎忽痕)咁問佢啲friend,想有車洗盡我囉。
 
「...阿瑜你上次唔係話想去將軍澳單車公園嘅?」阿妹又想借阿瑜過橋。
 
「...吓...er...係嘅,但係會唔會太麻煩你阿哥呀?」阿瑜有啲唔好意思咁講。
 
「...唔緊要喎,反正我得閒!」既然阿瑜話想去,我冇理由say no架嘛。
 
「...就咁決定啦,嘻嘻...唔該阿哥。」阿妹面向住我,
報以勝利嘅奸笑樣,之後我就開始車佢地去將軍澳啦。


 
「...係啦,快啲打比思敏叫佢返轉頭啦!」開車冇耐,
我聽到阿妹喺後面講,之後隔左一陣。
 
「...阿哥...嘻嘻,一陣喺將軍澳要接多個人先喎!」阿妹伸左個頭前離同我講。
 
「...接邊個呀?」我問。
 
「你見過架啦,思敏呀!」思敏個名的確係有啲熟,
但係就硬係醒唔起到底係邊個。
 
「...冇咩印象喎!」我講。
 
「...中三果陣咪成日上離嘅,戴眼鏡架呢!」
 


「...戴眼鏡?」唔諗由突止,一諗又真係有返啲記憶啦,
佢講果個思敏咪就係當年間中上離我屋企果件四眼鋼牙(豬西火雞批),
我記得佢好似住華貴邨架喎!
 
「...佢唔係住華貴架咩?」我問。
 
「...中學畢業之後搬左去將軍澳啦。」阿妹答。
 
之後阿妹就縮返後去同佢幾個friend傾計。過左半個鐘左右,
我就按阿妹指示將部車揸到去(日出康城)。入到上落客區,
我一邊開車一邊搜索,但係我望離望去都唔見果個思敏嘅蹤影。
 
「...喂...喂...你做咩呀,過左啦....喺後面呀!」阿妹忽然大叫。
 
無理由吖...明明都唔見,唯有掉頭返返去頭先個位啦。


 
「...果度呀!」掉頭後阿妹指住一個地方係咁叫。
 
「...果個?」我有啲驚訝咁問,因為眼前依個女仔,同我印象中果個完全唔一樣囉。
印象果個思敏係肥肥矮矮,帶住副勁厚嘅眼鏡再加鋼牙,而眼前依個思敏,
雖然唔算係好靚女,但係瘦左好多,戴左大眼仔,而且啲牙超齊整,細細粒粒咁,
但係上圍仍然豐滿,完全係一個可愛少女,同當年比真係差天共地。
 
「...聰哥?」思敏一行上車就望住左我問,乜原來隔左咁多年佢仲認得我架?
 
「...hi,好耐冇見!」我hea答,之後就繼續開車。
 
「...聰哥你真係冇咩點變喎,個樣好似冇老過咁嘅...哈哈!」思敏伸左個頭前離係咁聊我傾計,
好似同我好熟咁,但係其實佢講果啲野,基本上我全部都唔記得哂。
 


 
因為單車公園同日出康城唔係隔好遠,所以開車五分鐘左右,已經順利到達。
去到門口原來要排隊等位泊車,所以我叫佢地拎啲野入去草地搵住位先,
但係唔知點解思敏話要留喺度陪我喎。
 
「...點解唔入去先嘅?」等緊果陣,我問思敏。
 
「...見你一個人等咁慘咪陪吓你囉。」思敏笑笑口咁應我,
之後我都唔知比咩反應佢好,唯有繼續唔出聲咁等位。

中途思敏繼續講野,好彩等左唔夠三分鐘就有位,
快快翠翠泊好部車之後,我就帶住思敏行返過去草地果邊搵佢地。
 
過到去佢地已經搵好位坐低哂,而且仲排好哂啲食物出離準備開餐咁。
頭先都冇望真過啲野食,依家睇清楚有爭鮮壽司刺身,有啲炸雞薯條,


仲有好多蛋糕零食,睇落好似唔錯,諗諗吓今朝都未食早餐,依家真係幾肚餓吓。
 
望住潷緊意粉嘅阿瑜,如果係潷比我食嘅就好啦。
 
「.....!」阿瑜潷完之後望一望我,個人呆左一呆咁,可能比我個為食樣嚇嚫。
唔知點解,除左第一次之後,阿瑜每次見嚫我都會有啲緊張咁,連我自己都緊張埋。
 
「....拿....!」係思敏,正當我諗緊叫唔叫阿瑜幫我潷埋果陣,
思敏已經好快手咁夾左啲壽司埋離比我食啦。
 
「...er...唔該!」我好尷尬咁接過食物,其實我頭先見到阿瑜個樣,
我感覺到佢有幾分想遞比我架,但係思敏遞左啲壽司埋離之後,
佢就張佢手上碗意粉分左比其他人啦。
 
大家開始食野,同時有人開始拎啲野出離玩,大富翁呀、uno呀,全部攞哂出離,
而我就自己一個人一邊食野一邊撳電話,呼吸吓新鮮嘅空氣。

講開又講...啲人成日話將軍澳空氣差,實際我就唔係太清楚,但係喺依一刻,
我又覺得冇想像中咁差咋喎,加上其實依頭都真係幾多休憩公園,
地方又大...啲樓價比起香港果邊又差唔小,都真係可以考慮吓。
 
攤喺個草地度,享受住舒服嘅涼風嘅我,好快就恰著左。
訓到咁上下,我feel到有人用手指篤一篤我手臂。
 
「...嘻嘻...借你部電話離玩吓吖,我部電話收唔到。」原來又係思敏。
 
「...吓...果邊咪有電話囉!」我指住遠處,講出依句經典廣告對白。
 
「...哈哈...搞爛gag,聰哥真係幾時都咁好笑架!」思敏笑點都真係幾低吓,
佢真係坐左喺度笑左差唔多成分鐘,到最後我都借左部電話比佢玩而我就繼續攤。

但係依個時候,阿瑜忽然起身行左去廁所果邊,我知道機會終於都離啦,
於是我亦都斯斯然咁起身伸個懶腰,扮到若無其事咁行左去廁所果邊。
 
行到過去,我都真你去左個廁所,然後喺廁所門口行離行去等阿瑜出離。
等緊果陣我無聊望下四周圍嘅環境,又望吓側邊遊樂場入面嘅人,
望下望下,死啦...唔記得左自己等緊阿瑜嘅添。
 
我好緊張咁左望右望都唔見阿瑜嘅蹤影,但係突然有人喺我後面拍一拍我膊頭喎。
 
「...你搵緊咩呀?」我回頭一望正正就係阿瑜,而家微笑咁對住我。
 
「...吓...er...搵你囉,哈哈...冇呀,驚你唔識路行返去咪等埋你囉..。」依個籍口睇離真係牽強左小小,
阿瑜而家個樣變得有啲疑惑,眼定定咁望住左我,死啦...唔通我個籍口真係太過分,
佢依家覺得我係變態跟蹤狂呢?
 
「...我...係咪見過你架?」吓...乜原來阿瑜真係唔認得我架?
仲以為佢一早知我就係果日中六合彩頭獎果個添!
 
「...吓...冇喎!」既然唔記得就索性唔好認啦。
 
「...但係...我覺得你好熟面口喎!」阿瑜繼續上下打量緊我。
 
「...大家都係住香港仔,見過有幾奇姐,可能你喺街見過我姐...哈哈!」我繼續掩飾。
 
「...係牙?」阿瑜諗緊野個樣真係好吸引。
 
「...係呢,都唔知你叫咩名添?」阿瑜繼續問。
 
「...er...我叫敬聰,叫我阿聰得架啦。」我面紅紅咁答。
 
「...吓..!咁文蔚姓張嘅,你全名咪叫張繼聰?」阿瑜好驚訝咁,
鬼咩成日都有人叫錯我個名嘅,因為我個名同時似兩個歌星。
 
「...唔係張繼聰呀,係張敬聰呀!不過成日都有人聽錯,唔洗介意!」我答。
 
「...又張繼聰,又張敬軒...好亂喎!」阿瑜而家個樣喺度諗緊野咁。
 
「...你叫返我阿聰咪唔會亂囉!哈哈!」我好無奈咁喺度苦笑。
 
「...嗯...,不過張敬聰依個名真係好熟喎,好似喺邊度見過咁嘅?」阿瑜繼續尋根究底,早知唔講全名佢聽啦。
 
「...哈哈..電視成日都有張繼聰同張敬軒架啦,應該係你聽得多姐,..係...係呢,平時做啲咩多架你?」
快啲分散佢注意力先,難得搵到籍口傾計,幾大都搵啲機會了解吓佢先。
 
「...er...我牙,跑步同打籃球囉!」乜原來係運動型,唔怪得身型咁好啦,
不過可惜我係一個完全唔做運動嘅人,今次真係牛頭唔搭馬嘴啦。
 
「...哦...打籃球我ok喎!」其實對上一次打,已經係2004年果陣嘅事啦,
果陣讀緊書都叫做掂過吓嘅,係掂過吓咋喎,講唔上話識打囉。
 
「...係?下次跟埋文蔚出離一齊打囉!」阿瑜有啲驚訝又有啲興奮咁講。
 
「...哈哈...玩吓囉!」我笑笑口回應。
 
我地邊行邊傾,好快就行到返去。同佢地hea多一陣之後,都差唔多日落啦。
我返車場攞返部車之後,就繼續做返我司機嘅角色,逐個逐個兜哂佢地返屋企。
 
到我同阿妹返到屋企果陣已經差唔多七點鐘,老豆老母又係失左蹤咁,
睇離好似唔係好對路喎,佢地已經連續失蹤左兩晚架啦喎,老豆走左去街就話姐,
連一向都晚晚煮飯嘅老母都一齊失蹤真係好反常,唔通...事有蹊蹺?
已有 0 人追稿