我同佢眼神接觸左幾十秒之後,
果個人越啤越行...仲開始向我地依邊行緊埋離添。

個男仔睇落同我地差唔多大,矮過我...目測應該米七左右,
中等身形黑黑實實咁,望落個樣似乎唔多有善咁。
 
過左十幾秒,我地嘅距離收窄到得返五、六個身位,
正當我想出動(啤咩呀啤)之際,思敏終於都留意到依個男仔啦。
 
「...阿哥!」思敏即時縮返開果雙攬住我條腰嘅手,有啲尷尬咁講,


原來依個男仔係思敏阿哥?乜佢有阿哥架咩?
 
「...敏大人,唔介紹你男友阿哥識?」男仔開聲,敏大人?個稱呼咁熟咁嘅!
 
「...吖....阿哥,嘻嘻...阿爸、阿媽等緊我地架啦,快啲行啦...!」
思敏冇比機會我地兩個打招呼,就口窒窒咁推走左佢阿哥。

佢地走左之後,我就沿住商場慢慢行返屋企。
 
今次樓下保安阿姐終於都認得我啦,主動幫我開門,又張生前張生後咁。


返到屋企...全家都喺哂度,阿媽就喺廚房煮緊飯,老豆就喺飯枱果邊坐左喺度一手撳電話、
一手揸筆喺本記事薄上面寫緊野,好似做緊啲資料搜集咁。
 
阿妹就喺自己間房入面唔知搞緊啲咩,
但係一聽到我返離呢,就即刻仆到咁衝出離。
 
「...嘻嘻...阿哥!」阿妹細細聲咁對住我奸笑,
之後就捉左我入房同佢傾計啦。
 
「...拿...老實同我講,到底發生咩事先?」一入到佢房,


阿妹就推左我落佢張電腦櫈度,用盞枱燈照住我塊面好似嚴刑逼供咁。
 
「...頂...審犯咩!」我有啲不知所措咁推開左盞燈。
 
「...你同思敏佢,到底做過啲咩離呀?」阿妹繼續追問。
 
「.....!」我冇出到聲。
 
「...頂~又話鍾意阿瑜,搞到我同你喺阿瑜面前係咁講好說話,
阿哥你到底想點架?」阿妹見我唔出聲,有啲無奈咁講。
 
「...我係鍾意阿瑜架!」我講。
 
「...咁你...咁...即係點姐?」阿妹比我搞到開始有啲亂。
 


「...我都唔知...!」我答。
 
「...咁...係咪同思敏佢...咩左吖!」阿妹再問。
 
「...!」我面都紅埋繼續好尷尬咁粒聲唔出。
 
「...點解要玩人喎,果個係我best friend離架,你唔鍾意人又同人....,
阿哥你一向都唔係啲咁嘅人離架,係咪有左錢之後變左呀?」
阿妹有小小嬲,開始質問緊我。
 
「...唔係呀!我都唔知點解會咁嘅,琴晚諗住上返去搵你架咋嘛,
點知上到去你地就走哂!」我無奈回應。
 
「...返去做咩喎,咁好機會都唔去同阿瑜表白!」阿妹講。
 


「...我表白左啦,咁人地唔受...咁我可以點姐!」
講到依度我都開始有小小激動,眼發淚光咁。
 
「.....!」阿妹dead air左幾秒。
 
「...阿瑜唔肯?」之後有啲疑惑咁問我。
 
「...係!」我答。
 
「...點解?」阿妹追問。
 
「...人地有男朋友架啦!」我好悔氣咁答。
 
「...吓...!」阿妹驚訝大叫。
 


之後我再交代返,我同思敏發生關係嘅來龍去脈佢知。
阿妹聽完之後,面有難色...雙手拓胸咁喺度皺哂眉頭喎。
 
「...唉...政府都成日奉勸各位唔好飲酒架啦,無知少女飲左就失身,
大好青年飲左都會意志消沉架嘛!」阿妹講啲野似飲大左多啲囉!
 
「...政府有奉勸人唔好飲酒架咩?」我回應!
 
「...你...你唔好理啦,總之依家你就搞左個大頭佛出離,
咁你話點收科啦?」阿妹都格硬離嘅!
 
「....唉....!」我都唔知講咩啦。
 
「...人地蝕底左比你,你仲唉聲嘆氣做咩喎!」阿妹得勢不饒人咁,
但係我想講...其實蝕底果個可能係我囉。


 
「...唉...點解會發展成咁架,雖然思敏係我best freind你同佢一齊我應該開心至係嘅,
但係明知阿哥你係唔鍾意人嘅,此終都好似於心有愧咁。」依家又到阿妹唉聲嘆氣啦。
 
「...不如同佢講清楚啦!」我講,因為諗諗吓...或者長痛不如短痛仲好!
 
「...你千奇唔好呀,思敏為人我最清楚,如果你依家走去同佢講話唔鍾意人,
分分鐘自殺都有之呀!」阿妹好緊張咁回應。
 
「...咁又唔得...咁你話點啦!」我悔氣回應。
 
「...有計...按兵不動,乜都唔好做,盡量比阿哥你啲缺點佢睇吓,
或者思敏見到後會嫌棄你呢!」阿妹咁都算有計牙?缺點?
我自己有啲咩缺點呀?自己點會知架,佢講依個辦法都唔知work唔work嘅。
 
「...傾完未呀你兩兄妹,快啲出離食飯啦!」傾到依度...
阿媽敲門替我地打完場,但係食緊飯果陣,老豆又無啦啦有野宣布喎!
 
「...我有啲野同大家宣布!」老豆好認真咁,
我地緊係唔出聲繼續聽吓佢想講咩啦。
 
「...我決定左同阿彪夾份搞一間室內設計、裝修公司!」
 
「...吓!」我同阿妹同時吓左出離。
 
「...老豆,你諗清楚架啦!」我有啲疑惑咁問,雖然老豆唔係話好老姐,
但係都成五十歲架啦嘛,家陣又有錢...做咩仲要走去博姐。
 
「...已經諗得好清楚,而且計劃都有埋,所有野都進行得如火如荼!」睇離老豆係認真架喎!
 
「...真係要咁博?」我再問。
 
「...阿仔...開裝修公司做老闆係你老豆一直嘅夢想,以前無能力冇得講,
依家有機會如果我都唔試吓嘅話,我諗我依一世都會唔安樂。」
老豆真係一個好有理想同目標嘅人,依一點睇離我一啲都遺傳唔到佢。
 
食完飯之後,我依舊係無所事事咁坐左喺梳化度打機,
而老豆就坐左喺飯枱度,繼續做佢嘅筆記。

講吓我老豆先,佢係一個好傳統嘅人,十五、六歲喺西環(漢華中學)讀到中三之後,
就同埋啲friend一齊走左去學師,樣樣都識啲咁啦,但係油漆同泥水方面,就係宗師
級數。至於老豆提到果個阿彪呢,佢係我老豆嘅老死,四十幾歲...由細睇到我大,
都算係我嘅契哥,而佢喺水喉、同電燈方面嘅造詣都相當之高。
見到老豆花左咁多心機同精神落去,希望佢地成功啦。
 
百無聊賴嘅我撳左入facebook,因為之前思敏已經add左我,
所以依家我可以睇到琴晚生日會佢地tag返我嘅相。唉...睇見幾張同阿瑜嘅合照就覺得心酸,
但係睇睇吓,突然傳離一個訊息喎!
已有 0 人追稿