「....!」眼尾望到思敏已經一絲不掛,
我唔敢出聲當咩都睇唔到咁繼續沖涼。
 
其實自從第一次同思做發生關係之後,雖然表面上我地成為左情侶,
但係因為之後都冇上過大家屋企,所以除左攬攬錫錫之外,
就再冇做過進一步嘅過激動作啦。
 
「.....!」思敏同我一樣唔出聲,伸手唧左啲皂液,
開始幫我背脊捽起上離喎!
 


我繼續唔出聲,個頭唔敢擰過去思敏果邊,
因為我驚我見到思敏全相之後會忍唔住...,
內心掙扎左好耐...終於.....
 
「...我自己沖得架啦,哈哈...都辛苦左成日啦,出去休息吓啦。」我忍唔住開口,
暫時用我嘅人性克服住我嘅獸性, 保持我嘅理智去拒絕左思敏,
或者你地會覺得有冇可能呀?靚女送到上門都唔食?無錯我真係好想食,
而且下面已經有左生理反應添,但係一諗起阿妹上次責怪我嘅果句說話,
我個心就好虚...,我唔敢再糟蹋一個咁好嘅女仔,我實在唔敢肯定我依家到底有幾愛思敏,
諗真啲應該係問我到底有冇愛過佢。


 
「...哦!」思敏細聲回應,之後我就聽到佢推門行返出去啦。
講真就算幾厚臉皮嘅女仔,咁樣比人拒絕後都識知難而退啦,
對唔住呀...思敏,我係唔想再傷害你咋。
 
最後等我沖完涼,思敏先自己一個人行入浴室。到佢沖好哂涼吹好哂頭出返離之後,
我已經熄哂燈訓左上床。我訓左埋牆邊,用個背脊對住外面。思敏好快訓左上離,
但係我繼續扮訓冇擰到過去。思敏好香...訓左喺我隔離之後,身上散發嘅香味清香撲鼻,
令我有種好舒服嘅感覺,思敏挨住床頭撳左陣電話之後,就放低電話訓左落離。
 


「...早抖啦...聰哥!」思敏同我一樣側住身咁攬左埋離,好溫柔咁喺我耳邊講,
搞到我心跳加速,呼吸亦同樣加劇。我相信思敏其實係知我未訓著架,
不過見我唔出聲亦都唔敢叫我...喺咁嘅情況下到最後,我係唔知幾耐先訓得著嘅。
 
第二朝返工...,我亦都一樣喺唔嘈醒思敏嘅情況下,靜靜地溜走,
之後照常咁揸我部七人車返工。因為早左去到柴灣,
所以兜左部車去祥利街果邊整返個招牌車仔麵食吓。
其實我公司係比較近小西灣果邊嘅,所以平時真係好小會過離,
不過早左就無所謂啦。
 
自從同左思敏一齊之後,思敏成日都帶我去食好野,久而久之...而家連我都對食開始有要求啦。
講返碗麵先...雖然喺橫巷咋喎,而且舖面仲好似幾污糟咁,但係碗麵就確實唔錯嘅,
湯底夠濃、辣汁夠辣、大腸夠淋、魚蛋呢...一句講哂,彈牙果過。
叫足七個餸都唔洗五十蚊,性價比一流。
 


食完真係好滿足,因為部車就咁放左喺馬路邊,所以拍拍籮柚行幾步就行到返部車度,
但係頂佢個肺唔知邊q個咁仆街做泊車L,成部車泊左喺我部車側邊,
doublepark咁頂到我正一正,司機仲逃去無蹤添。
 
「你老母湊大你吖,邊條粉腸咁q大膽呀?」我邊小邊行埋部車到兜左一圈,
確定車上真係一個人都冇。

部車係一部黑色benz b200,唔知點解硬係覺得部車好熟口面咁嘅?
正當我諗緊喺邊度見過依部車果陣,背後遠處突然傳離叫聲。
 
「...唔好意思...走啦走啦。」係一把男人聲,因為都真係就離遲到嘅關係,
我望都冇望就急急腳跳左上車準備開車走啦。
 
「...埋你個位牙、後鏡、撻匙、極力子、廁所棍!」我做好開車準備...
果個男人亦都走到埋離,但係佢冇上自己部車,反而行左埋離我窗邊。


 
「...咦...阿聰!」仆街啦,唔怪得部車咁熟啦,原來係阿榮呀!
 
「...喂...咁啱呀!」我扮到若無其事咁。
 
「...無呀,啱啱去完青年廣場放低啲板咋嘛!」阿榮答。
 
係喎,可能冇同大家交代過,我地公司運輸部有個花名,
叫做(xx藝術家協會)係其他部門嘅人幫我地改嘅,點解?
因為佢地覺得我地幾個都係藝術家囉,唔只卑氣咁簡單喎,
而係我地三個司機每人都有一種技能。

占士其實未做司機之前係一個髪型師,而家放假間中都會返去兼職,
而我呢...佢地歸納我為一個音樂家,至於阿榮呢,除左司機之外,
其實佢仲係一個滑板運動員兼教練,平時收工之後都會去教啲青少年踩板,


而且間中仲會幫人畫畫添,可算係多才多藝。
我諗佢頭先去青年廣場都應該係放低啲教學用嘅滑板。

 
「...咦...部車幾靚仔喎,新買架?」阿榮問。
 
「...er...!」點答好呢?雖然阿榮冇占士咁煩,
我點答佢都唔會懷疑我,但係如果佢同占士傾開計果陣溜左口風,
以占士嘅性格一定會打爛沙盤問到篤架喎。
 
「...er...我老豆嘅!」佢地唔識我老豆,
又唔知佢有冇車牌,話係我老豆嘅應該會合理好多。
 
「...哦...依部今年新款要三十幾個架喎,你老豆咁捨得嘅!」阿榮好讚嘆咁問。
 


「...哈哈...佢近排搞左間裝修公司,要買部車出去見客掛,好似上會供架咋嘛!」我笑笑口答。
 
「...吖....係喎,早排見你fackbook都有你老豆開張啲相!」阿榮諗一諗之後講。
 
「...哈哈...係囉係囉,仲講遲到啦...開車啦!」我笑笑口打完場。
 
「...係...係喎!」揸住袋外賣早餐嘅阿榮,比我講一講先如夢初醒咁衝返埋部車度開車,
而我就等阿榮開車之後跟住佢尾一齊開返過公司果邊個停車場啦。
 
行返公司果陣,因為阿榮本身都係一個愛車之人,所以不停問我關於部車嘅野,
又問大唔大食呀、或者好唔好力之類,諗諗吓中六合彩單野其實都過左差唔多兩個月啦,
我係咪應該唔洗再咁驚呢?但係日日對住,此終都會良心過意唔去,
睇離我真係要下定決心快啲離開依度啦。
 
返到公司之後,同平時一樣都係做返果啲刻板工作,
但係到中午送完貨,回緊程返公司食飯果陣,
忽然有個不知名嘅電話打離喎。
 
「...咇...咇...!」藍芽耳機響起,我望一望係一個三字頭嘅商業電話。
 
通常遇到依啲三字頭電話,我嘅做法就係直接cut線,
之但係因為今朝打過比個客約佢下午收貨,
又唔知佢會用咩電話覆返我,所以我破例聽左....
 
「...喂...邊位!」我大叫。
 
「...請問...張敬聰先生喺唔喺度呀?」係一把女仔聲,
叫得出我個名,睇離又係宣傳電話。
 
「...我係,點呢?」我有啲悔氣咁答。
 
「...哦...你好呀,我喺(英皇娛樂)嘅職員。」吓...搞邊科呀?今次係推銷定騙徒呢?
 
「...唉...唔好意思我唔得閒啦...係咁!」正當我準備撳掣收線果陣,
果個女仔好緊張咁大叫喎!
 
「...唔係呀張生,今次打離係關於歌唱比賽架!」吓...歌唱比賽?
係喎...差啲唔記得左歌唱比賽單野添,果日胃痛到乜都唔理就走左去...
唔通我真係贏左?
 
「...歌唱比賽?」我回應。
 
「...係呀,張生你早前係咪參加左一個由我地公司主辦,
xx航空贊助嘅模仿歌唱比賽呀?」 女仔問。
 
「...係...係...,唔好意思...正話唔記得左。」我答。
 
「...上次張生你好似提早離左場呀呵?」女仔似係一邊睇緊啲資一邊問。
 
「...係呀,唔好意思呀...因為突然胃痛,所以走左去睇醫生姐,結果點呀?」
嘻嘻...唔通真係比我贏左?諗返當日好多都好垃圾,有個扮張智霖帶哂超、
著哂機師衫咁以為自己好有型,點知一開口唱五音不全咁,玩咩大佬...
咁都夠膽離參賽,睇勻都係得個唱容祖兒同個唱楊千樺嘅有料到。
 
「...er...恭喜哂張生先,你係得到季軍嘅!」吓...季軍咋?好過冇啦...諗諗吓好似有獎品架喎!
 
「...哦...!」但係...問人有咩獎好似好小家咁,所以我哦左一聲,等佢比反應我。
 
「...咁而家我會同張生你做返個簡單嘅資料核對先!」女仔問左我幾個問題,
都係果啲身份証呀、地址呀、出生日期...等等。
 
「...唔該哂,咁同張生你講解返先,季軍嘅獎品係一千蚊嘅卡啦ok禮券,
再加一個我地公司提供嘅試音合約乙份。」女仔詳細解釋。
 
「...吓...咩係乙份?」我問。 
 
「...簡單啲講...即係可以離我地公司試音,睇吓可唔可以成為我地嘅轄下歌手囉!」女仔耐心解答。
 
「...吓...哦!」就係咁,佢就幫我約左星期六去試音,
諗諗吓...又有啲緊張啦,希望到時唔會再胃痛啦。
 
食完飯之後,阿頭生哥忽然間捉左我入佢房傾計喎,
個樣仲乸口乸面咁添,睇離唔方有好野。
 
入到房...生哥照舊坐左喺佢張大班椅度,雙手翹起...擺出一個沉思樣,
一貫作風咁粒聲唔出,而我就坐左喺佢隔離。
已有 0 人追稿