「...見到你之後,好好多啦!」阿瑜再次展露笑容,
搞到我有啲意亂情迷咁,其實上次打籃球果陣阿瑜明明見到我同思敏拖哂手咁,
思敏又遞水比我飲佢冇理由唔知我同思敏拍緊拖架喎,而且佢同思做本身都係朋友,
佢今日約我出離...,真係純粹係朋友之間嘅聯誼?
 
野食好快就離到,我同阿瑜一邊食一邊傾計,今日嘅阿瑜同我之前識嘅阿瑜好唔同,
好熱情...好多野講,而且言語間...好似帶啲暗示,又問我最近過得點,
又話之前做左啲野好後悔,雖然佢冇講係咩,但係就好似暗示緊當初冇接受我嘅追求咁。
 
「...吖...真係好飽呀,多謝!」阿瑜講,因為食完之後,




作為男仔嘅我主動埋單,阿瑜亦好受樂。
 
「...咁...依家想去邊?」出到餐廳門口,我打開防盜準備開車門問。
 
「...er...唔好開車住,不如出海旁行吓囉!」阿瑜對眼釘左一聲,
好興奮咁講,我都未離得切回應,佢已經一手拉住左我手臂向前行啦。
 
比佢拉住果一刻,我啲心跳回憶又返返離啦,當晚喺將軍澳我一手拖住阿瑜嘅情景,
隨即喺腦海中乍現,阿瑜稍為比我行得前,我望住阿瑜嘅背影,對腳開始緊張到震,
心入面其實好興奮,但係又有種不明來歷嘅罪惡感。




 
阿瑜拉住我手臂,由加多近街行到出海旁,沿住海旁慢慢行到出海旁公園,
然後我地一齊坐左喺一張長櫈上面。

雖然依個公園好多人,但係個公園實在太大啦,而且周圍嘅樹生得密密麻麻,
我地而家坐嘅坐置相對較小人經過。坐低後...阿瑜望住個天發左呆咁,
而我就望住發緊呆嘅佢,完全猜唔透佢嘅內心世界到底諗緊啲咩!
我地呆坐左幾分鐘之後...
 
「...係呢...唔洗陪你男朋友嘅?」我問左一句試探性嘅說話。




 
「......!」阿瑜冇比到任何反應,只係繼續望住個天,個樣仲好似好感觸咁。
 
「....er....!」就喺我諗緊仲有啲咩講嘅時候,阿瑜突然慢慢將個頭挨左落我膊頭度,
而且仲用雙手緊握住我手臂....雙眼合實....嘴入面發出哽咽聲.....
 
「.......!」我繼續唔敢出聲,由得阿瑜飲泣,但係阿瑜佢越喊就越大聲,
搞到我都真係驚會比人望到咁不斷左望右望....
 
「...唔好喊啦,咩事姐!」我終於忍唔住問。
 
「......我地分左手啦!」阿瑜個頭由我膊頭慢慢挨到落我心口,
而且本來攬住我手臂嘅雙手亦都轉移攬住我條腰。
 
我個心跳得好快,從來未試過同女神有如此親近,而家嘅心情真係又開心、




又痛苦、又興奮再加小小咸濕....!依幾種唔同嘅情緒不斷喺我身體入面衝擊、
衝擊再衝擊....,我相信僕左喺我心口嘅阿瑜,依家亦感受到我嘅心跳,
但係佢冇出到聲...亦都冇後續動作,我地就係咁進入膠著。
 
「....嘟嘟....!」但係世事無常,就喺我地膠著左幾分鐘之後,我嘅電話忽然響起,
不過阿瑜好似聽唔到咁,繼續攬住我,搞到我都唔敢拎個電話出離聽!
 
「....嘟嘟....!」但係個電話響完一次又一次,終於去到第三次嘅時候,
我喺阿瑜嘅包圍之下拎出褲袋入面嘅電話接聽!
 
「...喂!」我細細聲講。
 
「....聰哥?你喺邊呀?」大獲...係思敏,點解我唔望吓就聽架,真失敗!
 
「...er...送緊貨!」對唔住...我講左個大話。




 
「...咁夜仲要ot,辛苦你啦...聰哥!」思敏你唔好咁好啦,
唔只冇懷疑仲鄧我辛苦,你咁我會好內疚架!
 
「...er...我收工打返比你啦!」我好急咁講,之後就cut左思敏線啦。
阿瑜見我收左線之後,亦都抬一抬頭望住我。
 
「...邊個離架?」阿瑜問。
 
「...er...阿妹咋嘛!」講大話開左個頭真係收唔到架,
我講果陣差啲連自己都呃埋,阿瑜聽完哦左一聲,
之後就繼續沉醉喺我嘅懷裏啦。
 
大家唔洗咁緊張住,除左頭先所講嘅野之外,我地係冇發生過任何野嘅。
喺公園逗留左大約一個鐘左右,我地就慢慢咁行返去我部車度,期間阿瑜繼續翹住我手臂,




就好似情侶咁...,最後我開車送完佢返屋企之後返到將軍澳已經十一點幾啦。
泊好車準備行去搭𨋢果陣...
 
「...嘟嘟...!」電話再一次響起,望一望原來又係思敏。
 
咁嘅情況緊係唔聽住啦,我冇理到個電話繼續入𨋢,到返到屋企之後,
我即時仆去九秒九沖涼,再極速走返出離,前後只係用左三分鐘左右,
差小小就可以破到世界紀錄架啦。一行到出離...思敏個電話再一次打離,
時間啱啱好...於是我就接聽左個電話啦。
 
「...喂喂!」我講。
 
「...er...冇阻住你呵...聰哥?」思敏有小小驚咁問我。
 
「...冇...冇,收左工啦,頭先沖緊涼咋嘛!」我答。




 
「...哦...,辛苦你啦...做到咁夜,係呢...星期六...約左幾點呀?」思敏繼續溫柔咁問。
 
「...er....好似中午十二點!」我諗一諗之後答佢。
 
「...洗唔洗我陪你呀?」思敏問。
 
「...er...佢果度好似唔比人陪上去架喎!」我講。
 
「...唔緊要喎,到時我喺樓下等你咪得囉!」思敏開心回應。
 
「...但係都唔知要搞幾耐嘅,我怕你等得耐喎!」我再三強調!
 
「...嘻嘻...放心喎聰哥,英皇樓下咁多野行,你唔怕悶嚫我架喎!」
思敏好堅持,咁就唯有同埋佢一齊去啦。
 
同思敏傾左一陣就收左線,正當我諗住上床訓覺果陣,whatapp又隨即響起喎!
 
「...咇...!」咦...咁夜唔知邊個呢,望一望原來係阿瑜!
 
「...聰,做緊乜呀?」阿瑜12:20am
 
「...準備訓囉,咩事?」聰12:22am
 
「...星期六得閒嗎?」阿瑜12:25am
 
「...星期六,有啲野搞....咩事呢?」聰12:30am
 
「....有套戲想搵你陪等睇姐!」阿瑜12:35am
 
「...er...咁牙,其實我下午有野做姐,夜晚應該得閒嘅,唔知夜晚o唔ok呢?」聰12:38am
 
「...咁好吖...就夜晚啦,我會早小小出旺角,你7點左右離旺角再電聯啦咁!」阿瑜12:40am
 
就係咁...最後我係覆左一個ok嘅emoji比阿瑜嘅,我承認我咁做係唔多啱,
但係對住阿瑜我真係一啲反抗力都冇囉。就好似頭先喺公園咁,比阿瑜攬住果陣、
果種感覺...同思敏完全唔同,會有一種由心而發嘅興奮,就算到依家返到屋企,
個心都會不停諗住阿瑜,好想佢打比我...心亂如麻咁....。
 
好快就到左星期六,今朝大約九點鬆啲我就起左身。
去完廁所...刷完牙洗完面,我就施施然咁行左出聽。
 
廳出面早已經傳離阿妹嘅笑聲,我沿住走廊一步一步咁行出去,
原來思敏已經上左離,而家同阿妹兩個坐左喺梳化度hea緊。
 
「...咦...阿哥訓醒啦喎,咁我唔阻你地啦!」阿妹望到我之後就即時閃左入房,
淨返我同思敏兩個喺度你眼望我眼咁。
 
「...嘻嘻...聰哥,早晨!」思敏對住我微笑。
 
「...哈哈...早呀,你等我一陣啦,我入房換件衫之後同你落街食早餐啦。」
我講完之後就行返入房,換完衫...攞齊野,我就同思敏一齊落街啦。