「...ok架啦阿聰,你可以返去先啦,有咩消息我地會再聯絡你架啦。」seven講完之後,我就開門行返出廳出面啦。 
 
一出到去,肥dodo已經走左,
只係淨返壓尾嘅阿yan坐左喺梳化度戰戰兢兢咁等緊。
 
「...點呀,點呀?」一見到我行出離,
阿yan就即時成個人彈左起身,個樣勁緊張咁問我。
 
「...ok啦!」我好鬆容咁答。
 


「...死啦,好緊張添!」阿yan講。
 
「...冇咩嘅,放鬆啲啦!」我微笑咁拍一拍阿yan膊頭講。
 
「...阿yan到你啦。」說時遲 那時快,seven已經企左喺房門口叫阿yan準備啦。
 
「...加油啦!」我同阿yan講。
 
「...嗯!」阿yan點一點頭就行左入去啦。
 


而我呢...同女職員講聲byebye之後,我亦都開門離開,一落到街我就即刻打左比思敏問佢喺邊啦。
因為有小小肚餓,所以我叫思敏喺附近嘅華星冰室門口等。因為只係兩三個街口之隔,
所以唔洗十分鐘,我就行到去華星門口。但係呢...唔知係咪星期六嘅關係呢,
華星門口人山人海咁,大佬唔洗錢架咩,門口仲要打哂蛇餅咁。
 
「...聰哥!」思敏亦都離到。
 
「...華星唔好食架,我帶你去第二度食啦。」思敏講完之後,
我地就一齊行返去停車場攞車啦。思敏提議返過旺角食,
於是我就載住思敏過返去旺角啦。思敏叫我將部車泊喺雅蘭中心,


泊好之後呢,我就跟住佢行到去山東街果邊嘅一幢商業大廈度啦。
 
「...依度?」我問,因為個門面只係一幢好舊嘅商業大廈。
 
「...係呀!」思敏微笑回應,之後就拉住我行左入去搭𨋢啦。
 
部𨋢上到一樓,一開門原來係一間日式餐廳,
但係睇個樣唔係高級果啲,似係港式小本經營嘅店舖。
 
「...歡迎光臨,兩位係咪呢?」一個似係經理啲四眼仔好有禮貌咁問,
之後就安排左一張四人卡位比我地啦。點解係四人卡位?因為間舖而家其實得果小貓三四隻喺度,
思敏唔講我仲以為佢落緊場添呀!
 
四眼哥哥好快咁遞左兩個餐牌比我地,咦...睇吓先,嘩...唔拿係吖嘛!
下午茶餐,三十幾蚊一個,我有冇眼花呀? 啲餐仲要跟埋小食同野飲,


佢到底比啲咩我食呀?
 
「...放心啦聰哥,ok架!」思敏見我望住個餐牌望到呆左,所以同我講。
 
既然思敏咁胸有成竹咁,唯有相信佢啦。最後我係叫左個地獄拉麵餐嘅,
個餐仲有跟炸雞翼添,而思敏呢...就叫左個餃子拉麵餐跟牛肉薯餅。
可能間野真係乜人嘅關係啦,唔洗五分鐘,啲野食就離到。睇吓先...啲野食個樣呢,
望落唔係話好靚,都係不過不失啦,至於食落呢...其實都ok喎,當然唔好諗住有成舊水果啲拉麵質素啦,
不過都叫做中上架啦,大佬三十幾蚊,仲要跟埋野飲、小食,絕對對得住依個價有餘囉,
反而我係好奇佢啲野食賣到咁平,仲要喺旺角開舖喎,到底係點為皮架呢?真係點諗都諗唔通。
 
食完之後...我陪思敏去左行花園街,其實都只係佢有佢行,我有我喺門口出面等姐,
我相信十個男友九個都應該有同樣嘅遭遇啦,不過唔緊要啦,依家科學昌明...等緊嘅同時,
當然係打返舖機先啦。思敏睇完一間行前幾間舖,我又行前幾步咁,時間過得好輕鬆。
但係思敏行左大概半個鐘左右,忽然有whatapp send左過離喎!於是我就撳左入去睇吓邊個send離啦。


 
「...聰,在那裡?」19:02pm,原來係阿瑜,係喎...差啲唔記得約左阿瑜嘅添,原來已經七點架啦。
 
「...喺旺角!」聰19:03pm
 
「...我在始創,你現在過來啦。」阿瑜19:05pm
 
「...ok!」聰19:06pm
 
「...ok,我在奇華門口。」阿瑜19:07pm
 
點算呢...思敏仲喺度添,到底點先可以甩到身呢!
 
「...聰哥!!!」
 


「...吓!」正當我望住個電話,聚精會神咁諗緊點算果陣,
思敏突然從後彈左出離叫我,嚇到我差啲連電話都跌埋。
 
「...諗緊咩諗到入哂神咁呀?」思敏問。
 
「...吓...er....!」到底點答好呢!
 
「...阿業囉,我醒唔起原來約左佢去睇車呀!」人急智生,我講左個咁嘅大話。
 
「...阿業,係咪你之前提過果個(失散多年兄弟)呀?」思敏諗一諗之後問,
不如等我同大家交代返先,阿業呢...其實係我一個絕無僅有嘅朋友,
至於點解會叫做(失散多年兄弟)呢,當然我地唔係真係有親啦,
而係因為我地雖然唔係識左好耐,但係又可以話識左好耐喎,點解咁講呢?
講落真係一匹布咁長,我諗應該由我讀毅進講起,廿一歲果年...唔知邊個同我講話讀毅進可以考紀律部隊喎,
於是我咪膽粗粗咁走左去讀囉,而阿業就係喺果度認識嘅,佢同我同班,大家都係兼讀班,


當時我第一眼見到佢就認得佢,因為雖然我唔識佢,但係其實由細到大都成日見面,
因為佢同我一樣都係喺同一條屋邨大,大家都係住同一座,細個果陣見親佢都覺得條友眼啤啤好q串,
但係識左之後,發現原來阿業份人好nice,大家好似一見如故咁,講返細個果陣啲野,
差唔多大家都有同樣嘅經歷,包括大家都識嘅人啦,大家都知嘅屋邨玩兒,
所以之後我就叫佢做(失散多年兄弟),而且阿業同我一樣係愛車之人,
所以大家都好啱傾,而今次唯有搵佢過橋啦。
 
「...死啦,阿業等緊我添架!」我繼續扮傻。
 
「...快啲去啦,唔好要人等啦!」思敏微笑回應。
 
「...咁...你?」我問。
 
「...唔洗理我啦,我一陣自己返去得架啦。」思敏講。
 
「...咁...咁好啦!」講完之後我就轉身走左,我承認我咁做真係好衰,
但係一諗起阿瑜等緊我,我就完全失哂常性啦。
 
我一個屈尾十走左過始創,一入到門口...就見到阿瑜企左喺奇華門口。
阿瑜今日同上次一樣係紮住條馬尾,著住件灰色短袖衫,出面再加條白色喱士吊帶裙,
再加果塊化左小小裝粉紅色嘅臉,簡直係令人想入非非呀!
 
「...等左好耐牙?」我問。
 
「...一陣姐,行啦!」阿瑜微笑咁回應我,之後就一手翹住左我行啦。
 
阿瑜話想去新世紀睇戲喎,翹住我沿住弼街向住新世紀方向行緊過去,
但係當去到花園街附近,惡夢就開始啦。離遠已經見到思敏企左喺角位嘅一間小食店度買緊野食,
大獲...再係咁會撞到正架喎....仆街啦。
 
於是我即時拉住阿瑜一百八十度轉身掉頭。
 
「...去邊呀?」比我拉住嘅阿瑜問。
 
「...er...我有啲肚餓,不如食啲野先啦。」我一邊講一邊行左入一間快餐店度,
但係惡夢邊有咁快完吖,一行到入快餐店,眼尾已經𥄫到阿妹坐左喺近門口位,
於是我即時搭住阿瑜膊頭,格硬拉左阿瑜入快餐店比較入嘅廁所方向。
 
「..er...我有啲急,想去個廁所先。」我邊行邊講。
 
「...我搵位?」阿瑜問。
 
「...唔好...一齊吖!」因為驚阿瑜會走返出門口啲位,所以我繼續拉住阿瑜,
阿瑜雖然無奈唔知我搞咩咁,但係都繼續乖乖咁跟住我。但係高潮真係一浪接一浪,
喺我地差唔多行到廁所附近,竟然見到黑仔背向我地行緊去男廁果邊。
 
「....你又話急?」阿瑜問我,因為我又拉住阿瑜轉灣。
 
「...er...我想忍忍先。」我答。
 
「...你忍到架啦?」阿瑜繼續問。
 
「...er...世上無難事嘅,睇你有冇誠意嘅姐。」我邊行邊答,
帶住阿瑜行到去快餐店內部一個比較暗嘅角落希望唔好比佢地見到。
坐低左之後,我繼續左望右望閃閃縮縮咁,好驚比人發現。
 
「做咩呀聰你,神不守舍咁嘅,係咪真係好急呀?」阿瑜見我面都青埋,所以問我。
 
「...唔...唔係呀,係呢...想睇咩戲呀你?」我反問阿瑜,希望可以轉移視線。
 
「...我想睇(神奇女俠)呀!」阿瑜好興奮咁講。
 
「...神奇女俠牙!」我講。
 
「...係呀,阿聰你有冇睇開依啲英雄電影架?」阿瑜問。
 
「...都有嘅,不過我鍾意睇美漫果啲多啲!」我答,因為其實我都幾鍾意睇(iron man)、
(美國隊長)果啲,dc果啲就比較小睇,不過都可以接受嘅。
 
「...美漫果啲我都鍾意,之前套(英雄內戰)好鬼死正呀!」原來阿瑜係英雄電影迷,
好彩我對英雄電影都唔陌生姐。阿瑜好興奮咁講左十分鐘,之後我話買野食咁行左出去,
確認左阿妹佢地已經離開左之後,我就同阿瑜急急腳咁走啦。
 
我拖住阿瑜急急腳咁行返去雅蘭果邊攞車,因為我唔敢再留喺旺角依個鬼地方,
所以我提議揸部車去數碼港睇,點解係數碼港?第一,返返南區睇,
之後送返阿瑜返屋企都方便啲,第二,數碼港本身就有偏僻嘅先天優勢,
好多明星、藝人都係貪佢依度夠偏僻,所以走離依度,
之前我都喺度撞過鄭伊健同蒙嘉慧兩個泊住拖離睇戲,哈哈...
每一個細節我都計算埋架啦...哈哈...我諗你地都無話可說啦掛。
 
「...喂...到左啦,你喺度眼定定口嗡嗡做咩呀?」係阿瑜叫我,
掛住諗野原來已經到左數碼港停車場都唔知添。
 
「...快啲落車啦。」阿瑜一邊開門一邊講。
 
「...哦!」於是我就鎖好部車,再拖住阿瑜行過去戲院果邊啦。
 
買完飛之後,因為仲有一頭半個鍾先開場,所以我地就諗住喺附近搵啲野食吓。
但係其實附近真係好偏僻,基本上除左間m記之外,就只係得返一間餐廳,
最後我地當然係入左依間餐廳啦。
 
間餐廳就喺戲院隔離,叫做(金記客棧),依個位呢...我記得以前喺一間叫(姬子廚房)嘅野,
唔知幾時會變左金記。講吓間餐廳先,裝修幾靚,其實即係以前(姬子廚房)嘅裝修,
我懷疑佢地根本就係同一個集團。 一入到去又係得小貓三兩隻咁,侍應安排左一張好q大張嘅四人卡位比我地。
阿瑜發板叫左幾個小菜,好似係黃金蝦、蝦醬通菜同薑蔥魚雲煲,啲餸呢...其實都幾好食嘅,
不過同之前(姬子廚房)啲味其實係一樣,我懷疑廚房啲人根本就冇變過,都係同一班人離嘅。
 
食完之後時間亦都差唔多。我同阿瑜急急腳咁行返過戲院,一坐低...套戲就開始,
時間配合得天衣無縫,就係咁...我同阿瑜就第一次一齊睇戲啦。
 
套戲呢...其實都好精彩,打鬥場面夠,女主角又靚女,不過我志不在此吖,
全套戲啲時間...我都集中喺阿瑜身上,差唔多每隔幾分鐘,我都會偷望阿瑜,
但係每一次望佢,都會比佢發現,唔通阿瑜同樣係偷望緊我?到尾段...
阿瑜直頭拉起左我地坐位間嘅扶手,翹住左我手臂成個人黐左埋離,
令我有一種幸福嘅感覺。
 
一百四十一分鐘嘅快樂時光眨吓眼就過,至於套戲呢...哈哈...唔多記得啦。
睇完之後...我揸車送阿瑜返海怡,但係去到海怡果陣,阿瑜忽然話想去海旁公園行吓喎,
於是我就將部車泊左喺利南道,再同阿瑜沿住利南道海旁公園門口行入海旁。

雖然已經凌晨十二點幾,但係海旁依度依然係人頭湧湧,
門口位依度聚集左好多釣魚嘅人,差唔多每隔一兩米嘅欄杆就會有兩三個人聚集,
再加上一啲沿住海旁跑步嘅人,令海旁依度非常熱鬧。
 
我拖住阿瑜沿住海邊,慢慢咁行入去。喺依一刻...
我腦入面再一次湧現返當日喺將軍澳同阿瑜一齊行公園嘅情景。
果啲淡黃色嘅燈光,再加埋四周圍嘅樹,每一個情節一一湧現。
行到咁上下,我同阿瑜就坐左埋一邊嘅一張長櫈上面。我地坐左喺度,
一齊望住前面嘅夜空,今晚萬里無雲,天色真係好靚,滿天都係星星,
再加上果啲海浪聽,令人非常之陶醉。
 
而家我嘅心情非常緊張,我feel到阿瑜亦都係一樣,可能我地行得比較入啦,
附近已經唔見哂果啲釣魚嘅人,連跑步嘅人都非常疏落,阿瑜拖住我隻手,
粒聲都唔出咁坐左喺度,而我亦都係一樣唔知講咩好,過左幾分鐘之後...阿瑜終於有所動作,
佢將個身貼左埋離,擔高個頭望住左我,我塊面同阿瑜塊面嘅距離,已經相當之近啦。

我地沉默對望左幾秒,望住阿瑜果塊已經紅哂嘅面,我終於忍唔住將個頭伸左埋去向阿瑜索吻,
而阿瑜亦都好配個咁攬住左我,然後再將塊面貼左埋離,就係咁...我地喺咁浪漫嘅環境底下再一次kiss,
而且今次係一個比之前激烈嘅擁吻...我...我....有一種幸福嘅感覺呀!!!

就係咁...我就正式同阿瑜一齊左啦。
已有 0 人追稿