「...我...我同緊思敏一齊架喎!」擁吻完之後,我主動申報利益,
因為我真係唔知我地依家到底算係咩,我個心好忐忑,
想有個答案,或者係一個藉口...一個合理化嘅籍口。

「...我知呀!」相反...阿瑜表現得好冷靜。

「.....!」我比阿瑜咁冷靜嘅語氣搞到唔知講咩好!

「...咁你鍾唔鍾意我吖?」過左十幾秒,阿瑜問左個咁嘅問題,
令到我更加不知所措,但係無論道德上有幾咁忐忑,


喺依一刻心入面嘅真實感受係呃唔到人架。

「....好鍾意!」我好合理亦好舒坦咁講出感受,
阿瑜聽完之後,表情亦都變得喜悅。

「...咁咪得囉,你又鍾意我,我又鍾意你!」阿瑜好開心咁一邊講一邊攬住我,
而我亦好配合咁攬住佢,我地就係咁正式一齊左啦。

送完阿瑜返屋企,我揸車返到自己屋企已經凌晨一點幾,快快翠翠沖完個涼後,
我就攤左上床。望吓個電話原來思敏十一點幾果陣打過離幾次,到十一點半左右,


就send左個whatapp過離話訓添。唉...其實思敏對我咁好我係咪唔應該咁對佢呢,
之但係...由day one到現在...我都真係鍾意阿瑜多啲喎,我都係揀自己鍾意嘅姐,
唔算係做啲咩壞事吖,最多盡快搵機會同思敏講清楚佢囉,希望佢會理解我啦,
唔講啦...講講吓...真係幾眼訓....zzz....訓先啦。

「~當潮流愛新鮮 ~當旁人愛標籤~幸得伴著你我 ~是窩心的自然~」電話鈴聲響起,
我由甜夢中醒過來,訓喺床上面伸手去床邊拎起我部電話接聽。

「...喂~~!」我用疲弱嘅聲線講。



「...嘻嘻...仲唔起身?」

「...ng...幾點呀!」我問。

「...十一點幾架啦!琴晚做賊離咩!」

「...你琴晚都咁夜點解可以咁早起身架?你唔攰咩!」我繼續hea聲。

「...我好早訓左啦!」咪住先,好早訓左?依個邊個離架?

「...係...係咩,幾點訓呀?」我醒左一醒,口窒窒咁問。

「...十一點幾就訓左啦,聰哥你走左之後我自己行多一陣就返左屋企啦!」
呼...原來係思敏離,仲以為係阿瑜添,好彩頭先冇亂講野。



「...哦...哈哈,係咩係咩!」我講。

「...聰哥你琴晚搞到好夜牙?」思敏問。

「...er...係呀,同阿業睇完車之後,再同佢去遊左陣車河同食埋糖水先返囉!」我答。

「...哦...出去食野囉!」思敏講。

「...吖嗚~~咁你等我一陣啦,我梳洗吓先。」我打住喊路答。

「...咁好啦,廿分鐘後你樓下茶記等啦咁!」思敏講。

「...ok!」之後我就收線梳洗啦。

落到樓下茶記,思敏已經搵左位坐左喺張兩人卡位度,仲篤緊杯檸茶添。



「...hi!」我坐左埋去。

「...嘻嘻...早晨聰哥。」思敏講。

「...早呀!」我答。

「...叫野食先啦,我叫左架啦!」思敏隊左個餐牌比我,
於是我就叫左個侍應埋離落單啦。

野食好快離到,中途我都冇乜點講過野,只係一邊食一邊聽思敏講佢嘅野,
其實我個心...早已經飛左去阿瑜度,腦入面諗緊...阿瑜到底起左身未呢?

「...喂!」琴晚返到去,阿瑜都冇搵過我,唔知佢依家做緊咩呢?



「...喂!」

「吓....係!!」原來思敏叫緊我,我仲係呆呆地咁回應。

「...心不在焉咁架,我話好唔好呀?」思敏有小小抱怨咁問。

「...哦...好...好呀!」我口窒回應,其實都唔知佢問緊乜。

「...嘻嘻...咁就好啦,記住早啲攞定假啦喎!」思敏興奮回應。咪住先...攞咩假呀?

「...er...哈哈,啲細節我聽得唔係好清楚呀,可唔可以講多次呀?」
我笑笑口問,希望chok到思敏講。

「...咁呢,攞假就攞28、29、30號,咁1號同2號係星期六、
日咁咪可以連續放到五日囉!」思敏拎住部電話,一邊睇日歷一邊講,


咦...喂,請咁多日假去邊呀?

「...哦...咁詳細地點呢?」我繼續套料。

「...未諗到呀,不過我想去奈良公園睇鹿呀,仲有呢...
要去環球影城,其他地點之後先諗啦!」思敏好興奮咁講,
原來思敏叫我請假係想同我去日本旅行牙?
頭先仲口快快應承左添,今次真係捉蟲。

「...哦...咁急會唔會訂唔到酒店、機票呢?」我問。

「...嘻嘻...聰哥你唔記得左我做邊行架咩,況且我公司仲有免費機票添,
放心啦聰哥,一切包係我身上。」思敏胸有成竹咁款,睇離佢係志在必得架啦。

食完野之後都冇咩野做,我同思敏好悠閒咁喺樓下商場度行吓。
思敏全程都好興奮咁,又話要買泳衣、又話要買定啲日用品到時去日本用喎,
點算好呢,依家咁嘅情況好難同佢講清楚架喎,都係遲下先算啦。

行吓行吓,無啦啦見到黑仔喎,佢著到好斯文恤衫西褲咁,
而家企左喺商場嘅中庭位置,好似等緊人咁款喎。

「...咦...你阿哥喎,洗唔洗過去同佢打招呼呀?」我講。

「...吖...聰哥...唔好住!」思敏叫住左我。

「...做...做咩呀?」我問。

「...我都未見過阿哥著得咁試正嘅,一定有古怪!」思敏有啲疑惑咁講,
之後就拉左我埋一邊睇吓佢阿哥黑仔到底等緊邊個啦。

但係等左成十分鐘,此終都未見動靜。正當我地想放棄之際,
神秘嘅檸檬突然出現,講笑....係有一個少女突然出現。

「...嘩...阿哥約女仔!」思敏異常興奮,仲手舞足蹈咁講。

「...好出奇咩?」我問。

「...我阿哥咁大過人都未拍過拖架,唔好話拍拖吖,連女姓朋友都唔多個囉,
嘻嘻...今日執到咁正,佢地關係一定非比尋常。」思敏詳細分析。

「...喂...佢地走啦,快啲跟住佢地啦!」思敏一邊講,一邊跟住佢地尾。

依家我地嘅距離大概係五十米左右,而且個女仔一直都係背對住我地,
所以暫時都未見到佢係點嘅樣,不過從佢背影望落身形偏瘦,都幾矮吓...
拍埋171左右嘅黑仔身邊都差成大半個頭,目測大約高150-155左右,
皮膚幾白...著住一件淺藍色T恤加熱褲,紮住條馬尾再加頂鴨咀帽,
唔知點解依個配搭好似似曾相識咁嘅!

我同思敏一直跟喺佢地後面,佢地由開頭只係並肩而行,
到行左兩分鐘左右開始拖住手,相信佢地情侶嘅關係已經無容置疑。

「...不如算啦。」我講,因為其實我都真係唔多關心黑仔條女到底係點嘅樣。

「...唔好啦,我真係好想知個女仔係點嘅樣架!」
但係思敏有啲唔願意咁,都冇法啦...唯有跟多一陣。

跟跟下...跟到入一間大型連鎖時裝店入面,但係一入到去,
竟然唔見左黑仔同佢女朋友嘅蹤影喎。吖...明明睇住佢地入左離架喎,
冇理由架...不過間舖確實係幾大吓,睇離到要搵一輪先搵到。

我同思敏圍住間舖兜左一圈進行地毯式搜索,
搵到去更衣室門口,終於都搵得返黑仔啦。
已有 0 人追稿