「...拿...大家好兄弟,有咩唔開心唔好擺喺個心度喎!」話口未完黑仔真係有啲野喎,
可能佢都以為我會唔鍾意佢同阿妹一齊。 
 
「...講埋啲衰野,有野我就唔離啦!」我回應。
 
「...係...咁就好啦,幾驚你嬲呀!」黑仔鬆一口氣咁。
 
之後黑仔就興高采烈咁同我把酒談心、高談闊論咁,三個男人坐埋一枱傾嘅野當然離唔開女人啦,
我地傾傾吓講到我地嘅初戀,黑仔好老實咁講出佢喺讀中三嘅時候已經暗戀過一個女仔,
但係因為當時嘅佢仲係薯仔一名,所以此終都唔夠膽同人表白。



而喺依方面肥恆就比黑仔優勝好多啦,因為從黑仔口中得知,
肥恆就喺中五果陣鍾意左個識左好耐嘅best friend,而且仲對依個friend展開左猛烈最求添,
不過聽黑仔講果個friend冇接受到肥恆,最後仲好似嫁左比個消防隊長添。但係諗諗吓,
一個識左咁耐嘅best friend,點解會到中五先無啦啦鍾意嘅呢?真係諗極都諗唔明,
不過anyway ,我最後都有將我初戀係一個肥婆嘅秘密講左比佢地知,
依一個亦都係我人生中嘅污點,事關當年中二果陣我都係死肥仔一名,
即係果啲永遠都溝唔到女嘅可憐蟲呀,咁...果陣有個肥婆溝我,
就係咁我就.....而家諗返起都有啲後悔,可能依個亦都係我之後好憎肥妹嘅原因。
 


「...你兩個依家就親上加親啦!」傾傾吓...肥恆忽然講。
 
「...吖...如果第時你地幾個真係結哂婚生埋仔,咁黑仔個仔應該點叫阿聰呢?
應該叫姑仗吖,定叫舅父呢?」肥恆繼續忽發奇想,諗諗吓...又真係喎,
如果跟阿媽叫我就係舅父,如果跟阿爸叫呢我就係姑仗啦,諗落都真係幾亂,
不過講真...我又點會真係同到思敏結婚吖,依家啲關係已經搞到鑊粥咁,
我驚到時同思敏講分手果陣,黑仔都唔知接唔接受到添...,
分分鐘連兄弟都冇得做,到時影響埋阿妹佢地兩個嘅感情就唔好啦...唉....。
 
 


飲飽食醉之後,我同黑仔、肥恆佢地就各散東西。
其實第二日都仲要返工,所以我都係同平時一樣返返上樓沖涼換衫。
 
思敏照常打比我,匯報佢今日嘅所見所聞比我知,之前一向都覺得冇咩問題嘅,
但係依家連阿瑜都係依啲時間搵我,搞都我真係有啲應接不暇,聽思敏講野嘅同時,
又要覆阿瑜嘅whatapp喎,搞到我個人成日輕機,又驚會將覆阿瑜嘅野一個唔小心講左出離喎,
原來一腳踏兩船真係好辛苦架,勁大壓力...我都唔明點解有啲人可以踏三、四船嘅,
兩個已經係精神虐待啦,唉...我真係唔識點開口同思敏講分手呀,有冇人可以幫吓我呀!
 
第二日...照常返工,都冇咩特別事發生,但係好快又到左星期三。
今日返工依然平平淡淡,但係放工之後,我同阿妹就準時出席黑仔嘅籃球活動。
本來都相安無事嘅,但係今次同上次一樣阿瑜都有出席,
變相係考驗緊我同時協調兩個女人之間嘅能力。
喺咁多人面前唔可以同阿瑜有太多嘅眼神接觸之餘,
又唔可以同思敏表現得過份親熱喎,每次思敏翹住我或者對我親近果陣,


我都feel到遠處嘅阿瑜果一種充滿仇恨嘅氣場,真係令人不寒而栗。
 
打完之後,大家都各散東西。但係我呢...表面上係同阿妹返返上樓,
其實暗地裏...阿瑜早已經企左喺樓下商場等我,去到電梯大堂,
我借啲易話去seven買啲野,其實轉個頭已經走左過商場果邊同阿瑜匯合。
 
「...sorry呀,要你等咁耐!」我同阿瑜講。
 
「...一陣姐!」阿瑜回應。
 
「...送你返屋企?」我問。
 
「...去食啲野先啦,收工都未食飯呀!」阿瑜講,
於是我地就喺附近求其搵啲野食吓啦。



因為好驚會撞到黑仔佢地,所以我搵左間好隱蔽嘅餐廳,
坐低左之後,我亦都不時留意四周,希望減低風險。
 
「...做咩姐你...做賊咩,依家我地好唔見得光咩?」
阿瑜見我鬼鬼鼠鼠咁,終於都忍唔住話我啦。
 
「...唔...唔係!」我口窒窒咁答。
 
「...你知唔知頭先我見到你地咁親熱果陣,個心係幾難受呀!」阿瑜有小小悔氣。
 
「...我明...!」我繼續死狗,都明嘅...比著我係阿瑜我都嬲。
 
「...我唔係話想逼你啲咩呀,只係想我需要你果陣...
你可以喺我身邊咋...!」阿瑜語氣無奈,再加小小眼發唳光。
 


「...對...對唔住呀。你比啲時間我,我會盡快解決件事佢架!」
我坐左喺阿瑜對面,捉住佢隻手好認真咁講。
 
「...嗯!」阿瑜亦都比我嘅真誠所熔化,
點一點頭咁嗯左一聲。
 
食完野之後,我揸車送左阿瑜返海怡半島,之後返到屋企已經差唔多十一點半啦。
一入到屋就見到阿妹坐左喺梳化度開著部電視喺度撳緊電話,
而且一見到我仲瞇住對眼咁望住我....,擺出一個睇通哂所有野嘅樣咁....。
 
「...seven搬左去元朗咩?」阿妹忽然講左句咁嘅野。
 
「...吓...唔明喎?」搞到我都一頭霧水咁。
 
「...你話去seven買啲野架嘛,去左成兩個鐘,我以為間seven搬左入元朗添!」


頂....原來阿妹係串緊我,佢唔講我都唔記得自己頭先係話去seven買野添。
 
「...洗唔洗咁串先!」我講。
 
「...自己做過啲咩,心知肚明啦!」阿妹好似真係知道啲野咁款,死啦...唔通我穿崩?
 
「...你...你....!」我比阿妹拋窒左,而家支吾以對咁。
 
「...唔洗唔認啦,頭先我見到哂啦!」阿妹講到實牙實齒咁。
 
「...你...見到啲咩呀?」我繼續死撐。
 
「...係咪要我講埋你同阿瑜拖左幾耐手行左入間餐廳度你先肯認呀!」
我投降啦,阿妹真係所有野都見到哂,想唔認都唔得啦。
 
「.......!」我無言以對,而家行左埋飯枱果邊坐左喺度。
 
「...阿哥呀,你知唔知你自己而家玩緊火呀!」阿妹見我唔出聲,
主動行左埋離我身邊,用心良苦咁講。
 
「...你知我同思敏由一開始,已經係一個誤會離架啦,
你亦都知道...我由此至終都係鍾意阿瑜多啲架!」我講。
 
「...係姐,咁你都可以處理得好啲架,你咪同思敏分左手先再同阿瑜一齊囉,
你咁做嘅話冇人會話你錯架!」阿妹有小小激動,睇得出佢其實係好肉緊我。
 
「...開頭又係阿妹你叫我唔好同思敏講分手嘅,依家我都真係唔知點做啦?」我亦都有小小埋怨。
 
「...咁...咁果陣我諗住將錯就錯,睇吓阿哥你會唔會有可能慢慢接受思敏吖嘛!」
阿妹緊張回應,我諗佢都覺得自己有小小責任咁。
 
「...無錯,思敏係好好,我承認...我真係有鍾意過佢,但係喺依一刻,
我鍾意思敏嘅程度,比起阿瑜仍然有一段距離囉!阿妹你...
你知感情嘅野唔係三言兩語可以講得清楚架,我承認喺依一刻可能對思敏真係唔係幾公平,
但係我而家唔試吓同阿瑜一齊嘅話,我驚我會後悔一世呀!」我有小小激動咁回應。
 
「......!」阿妹聽完我講之後靜左落離,慢慢行返去梳化果邊,坐左喺度之後...繼續沉思。
 
「...阿妹,比啲時間阿哥啦,我應承你...我會盡快同思敏講清楚。」
我行左埋梳化度搭住阿妹膊頭講。
 
「...唉....我唔知你啦,總之盡快解決啦。」阿妹有啲無奈,
可能佢都真係擔心緊黑仔知道左之後唔知會點。
 
到第二日,朝早送緊貨果陣,我接到一個電話,
一個熟悉又陌生嘅電話號碼。
 
「...喂...邊位!」我一邊揸車一邊接聽左個電話。
 
「...喂,係咪阿聰呀?」係一把男人聲,聽落似曾相識咁嘅?
 
「...係...邊位?」我回應。
 
「...steven呀!」哦...原來係steven唔怪得把聲咁熟啦,
咪住先...唔通試音果邊有結果?
 
「...哦...咩事呢?」我問。
 
「...er...咁嘅,想約你上一上去我地公司寫字樓,同公司高層見一見面,
咁唔知你幾時方便呢?」steven講得好玄,咁到底我試音點姐!!!
 
「...er....」我諗緊。
 
「...一係照舊星期六啦,好嘛?」steven似乎比我心急。
 
「...哦...是但囉。」我答。
 
「...咁...咁好啦,就星期六中午十二點啦,你到時去到灣仔英皇樓下再打比我啦,
我會落離接你架啦。」steven開心回應,就係咁...我地就約左星期六啦。
唔知點解...我冇特別興奮喎,可能係因為覺得...都唔會有啲咩大驚興姐,
得咪得...唔得咪算囉,又唔係等住佢開飯。
 
收工之後,因為思敏佢今晚返夜嘅關係,所以我揸左部車去跑馬地接阿瑜收工。
我將部車停左喺體育路,馬會總部門口前小小,之後再打比阿瑜。
已有 0 人追稿