搽到咁上下,阿瑜坐返低,將對腳伸左出離,
示意叫我開始幫佢搽佢對美腿啦。

我繼續抑壓住我興奮嘅情緒,繼續戰戰兢兢咁撫摸住阿瑜嘅一雙美腿,
阿瑜對腳真係好正,學啲網民話齋...真係玩對腳都玩幾日呀!!
 
 
幾經辛苦之下,我終於都幫阿瑜搽勻哂全身啦,阿瑜攤左喺度曬太陽,
而我就走左落去游水。講開又講喎,雖然我而家體能係差啲咋喎,
但係其實細過果陣我都真係幾鍾意游水架喎,仲喺小學果陣水運會攞個蛙式冠軍。


記得中學果陣仲去過考拯溺銅章添,果陣諗住考完十六歲之後去做兼職救生員嘅,
不過考完之後...不了了之囉!中一果年暑假...買左張(水上樂園)全年通行証,
差唔多日日都走左去游水,果陣潛落(開心河)真係乜鬼野都執到,一蚊、兩蚊、
五蚊依啲硬幣就不在話下啦,次次執埋執埋都夠哂食個m記,泳鏡都執過無數咁多副,
不過依啲都係小兒科,連金戒指同金鏈我都執過呀,最後仲同我阿媽拎左去金舖熔左佢添,
果陣阿媽笑到見牙唔見眼呀,仲請我食自助餐添呀。

大家唔好鬧我住,攞人野就緊係唔啱啦,之但係...都係人之常情姐,唉~依家諗返起細個果陣真係開心,
可惜果年之後(水上樂園)就執左笠吖,不過聽講下年會開個新嘅(水上樂園)而且仲有條八彩天梯添,
布望到時可以同阿瑜佢去玩吓啦。


 
我一個人無無聊聊咁游左出防鯊網附近,來來回回咁游左幾轉,
游游吓...我注意到最近防鯊網嘅果個浮台,零零丁丁咁坐左個女仔喺上面喎。
係一個少女,望落應該十八廿二,非常之瘦...皮膚偏黑,
攞住塊浮板眼定定咁望住左我應該有一段時間架啦,
我再望望四周附近一個人都冇,再游多一陣...個女仔忽然企左起身,
而且仲向住我果邊嘅方向行左埋浮台邊喎。
 
「...唔...唔該!!」女仔向住我叫,果種叫聲係唔大唔細咁,
好似想叫我,但係又好尷尬果種咁,於是我就慢慢咁游左埋浮台度啦。


 
「...小姐,有咩幫到你呀?」我行左上浮台上面問,依一刻先清清楚楚咁見到佢嘅全相。
非常瘦...就咁睇落,我諗佢九十磅都唔知有冇,身高160cm左右,擁有一身健康膚色,
黑色泳衣再加件白色t恤,紮住條馬尾、單眼皮...都係走日本妹路線果種典型qq妹妹咁,
未至於醜...不過個樣就真係唔太靚啦。
 
「...er...係咁嘅,我啲friend呢...就玩野陪完我出離依度之後就走左去,
唔知你...可唔可以陪我游返去呢?因為我唔識游水架!」女仔笑笑口問。
 
「...吓...咁牙...」我猶豫左幾秒。
 
「...唔該你吖。」女仔楚楚可憐咁...我都真係好難再拒絕,於是我就應承左佢啦。
 
「...ok,咁你落離先啦!」我跳返落水,然後一手捉住浮台鐵梯,一手遞起示意女仔捉實。
 


「......!」女仔戰戰兢兢咁遞左隻手比我,然後全神貫注咁踏出佢第一步啦。
 
睇離佢真係好驚,向前踏左一步之後,又停左落離...誓願咁,
搞到我都開始有小小唔耐煩啦。
 
「...唔洗咁驚喎,落離啦!」我隻手比左小小力,嘗試逼佢向前再次踏出,
但係唔知係我太大力定佢跣腳,個女仔忽然失重心,向前一仆....
成個人插左落水喎!今次仆街啦...佢唔會屈我拉佢落水掛?
 
「...轟隆~~」個女仔直插冇水花...動作比美金牌運動員,跳水王后郭晶晶呀!
 
「...吖!!救命呀!!」兩秒之後,個女仔蒲返上離,好似痴左線咁不斷大叫。
 
「...喂...冷靜啲先,我學過拯溺嘅,你唔洗咁緊張!!」因為好驚佢會引離救生員嘅注意,
所以我即時拉一拉佢隻手,希望佢可以盡快收聲。



其實我地離個浮台都只係兩三呎,都唔知佢驚乜?
 
「...吖!!」個女仔捉實左我隻手,
之後成個人擒左上離攬到我實一實!
 
「...喂...小姐,你...你放手先啦,我就離窒息啦!!」比佢攬到我差啲透唔到氣,
好彩我一早捉住左佢快浮板姐,如果唔係分分鐘連我都比佢搞死埋,
到時真係千年道行一朝喪啦。
 
「...!」我發力游返埋浮台邊,一手捉返住鐵梯,
過左半分鐘左右,個女仔先稍為冷靜落離。
 
「...呼呼~~!」個女仔係咁深呼吸,個人依然係夾到我實一實,
就好似(喜劇之王)入面嘅張柏芝咁。


 
「...定啲離,可唔可以鬆開我先呀?」我用輕鬆嘅聲線問,
務求令佢盡快放開我,雖然話有女攬應該人人受樂姐,
但係須知道我純情小DJ並唔係一個水性楊花嘅人!
況且阿瑜就喺沙灘上面,一陣比佢見到咪水洗都唔清。
 
「...唔...唔得呀!!!」女仔繼續好驚咁講。
 
「...咁...咁你起馬都唔好喺我前面攬住我好喎...好尷尬喎大佬,
一係...不如你轉一轉去後面啦!」我繼續遊說佢,睇得出佢嘅態度開始軟化啦,
開始好似隻樹熊咁,慢慢由我嘅胸前,轉到去我嘅背脊。

就係咁...我就咩住佢,利用佢塊浮板慢慢咁游返埋沙灘度啦。
 
但係去到可以企到嘅位置,個女仔依然係唔肯放手喎。


 
「...喂...小姐,到地架啦...可以落返離未呢?」我都開始有小小唔耐煩咁問啦。
 
「...咦...小苑,自己返到埋離嘅?」忽然有另一個女仔喺岸邊叫左落離,
睇個勢應該係個女仔嘅朋友,原來依個女仔叫小苑?
 
「...仲好講,果兩個八婆帶左我出去,又唔帶返我返離,好過份囉...!」小苑回應。
 
「...咦...喂,依位係?」岸上面個女仔,望一望我...之後好疑惑咁問。
 
「...佢係我條仔離架,好彩有佢帶返我返離咋,唔好阻住我地鴛鴦戲水。」
小苑答,喂...咪亂講喎,邊個係你條仔呀!
 
「...吓...咁你都溝到仔,服左你啦...唔阻你地啦!」個女仔o左咀,
之後就行開左啦,喂...返離呀...唔好聽佢亂講呀!
 
「...吖!」小苑大叫,因為我一野fing開左佢。
 
「...搞錯呀!」小苑即時企返起身話我。
 
「...小姐...我唔係你條仔,加上我已經帶左你返埋你啦,
我諗你都應該玩夠啦。」我有啲無奈咁講。
 
「...咩...咩喎,講吓笑咋嘛,咁鬼死認真架,都唔好玩嘅!」小苑繼續死撐。
 
「...係咁先啦!」我冇理佢轉身就走啦。
 
「...喂喂,嘻嘻...不如你真係做我條仔啦。」嘩...
我已經走緊架啦,佢都仲要跟住我,面皮幾呎厚。
 
「...大佬呀,唔好再跟住我好唔好呀,
我有女朋友架啦,唔好煩我啦!」我邊走邊講。
 
「...你...好...野!」睇離佢放棄啦,跟左一陣之後終於都回頭走左,
都係快快翠返去搵阿瑜先。
 
好快我就行返埋去,阿瑜依然係坐左喺沙灘蓆度曬緊太陽。
 
「...咦...返離拿!」阿瑜見到我之後講。
 
「...係呀,游左轉防沙網吖嘛!」我回應。
 
「...哦,好啦...我都落去游吓先!」阿瑜企左起身,
於是我就同阿瑜一齊行返落水啦。
 
阿瑜其實都唔係好識游水,所以我地都係喺岸邊企到嘅位置附近徘徊,
但係游吓游吓...又離左個不速之客囉!
 
又係佢呀,果個好似叫小苑嘅女仔,好似隻冤鬼咁喺我地附近徘徊,
而且仲不斷喺阿瑜後面望我打哂眼色咁,仲不時對住我奸笑,
唔知有啲咩陰謀咁。
 
「.....!」嚫阿瑜睇唔到果陣,我不停用口形加肢體動作,不斷打發小苑,
但係佢見到我咁緊張咁,唔單止唔走開,仲笑得緊加開心添。
 
我比佢搞到我心神彷佛咁,隔左一陣...佢又走開左,睇離此地都真係不而久留,
我唯有盡快叫阿瑜速逃,但係當阿瑜去左廁所沖涼換衫果陣,
果個小苑又失驚無神咁喺我身後彈左出離喎,
而且仲一手搶左我手上撳緊嘅電話添。
 
「...喂,快啲攞返離!」我即時企左起身,有小小嬲咁講。
 
「...做咩姐,我電話冇電吖嘛,借離用吓都唔得咩!」
小苑有啲不爽咁一邊撳我部電話一邊回應。
 
「...問人借野係咁嘅態度架咩?」我回應。
 
「...咁應該咩態度呀?」小苑繼續串串貢咁一啲悔意都冇囉。
 
「...起馬都講句唔該吖!」我諗唔到點樣反駁佢添。
 
「...哦...想聽唔該咋嘛...講比你聽囉!」小苑繼續得勢不饒人,
好似出離蒲開咁,一啲都唔怕羞。
 
「...唔洗啦,快啲比返部電話我就得啦...攞離!」
我有啲唔禮貌咁伸出我隻右手講。
 
「...車...比返你囉!」睇離小苑終於都玩夠啦,放低電話之後就轉身走左,
而依個時候,阿瑜正好返離,同小苑擦身而過,好彩都冇啲咩事發生姐,
真係有驚無險...估唔到而家啲𡃁妹咁唔要面,睇離我都真係老啦。
 
等我沖完涼換完衫之後,就同阿瑜一齊離開。返到部車度竟然乜事都冇,
仲以為實比人抄牌添,睇離今日有啲運仔喎。

我車住阿瑜順路去左赤柱,泊低部車喺赤柱廣場之後,
我地就行左落下面美利樓對出嘅酒吧街度睇吓有啲咩啱食啦...
其實望落間間都好似差唔多樣咁,最後我地行左入其中一間食pizza嘅舖頭,
雖然揸左車,但係我都忍唔住叫左杯啤酒,一杯應該唔超標掛,飲小小姐...定啲喎。

我同阿瑜飲飽食醉之後就開車送阿瑜返屋企,
再自已吉車返將軍澳啦。
 
返到去已經十一點幾,個廳空空如也,我如常行返入自己間房沖涼換衫,
搞掂哂行返出離之後已經十二點啦。我慣性動作坐左埋電腦枱度撳吓...,
睇吓有啲咩新聞咁。
 
「...嘟嘟...!」睇睇吓...電話響起,於是我好自然咁接聽左。
已有 0 人追稿