「...喂...你住邊架?」我一邊揸車一邊問。
 
「...香港仔呀!」小苑一邊撳手機一邊回應。
 
「...乜原來你住香港仔架?」我有啲驚訝咁回應。
 
「...有問題咩?」小苑回應。
 
「...冇...我之前都係住依邊姐。」我答。
 


「...係??未見過你嘅,緊係好小出離蒲啦。」小苑講。
 
「...!」我冇出聲,繼續專心揸車,因為真係比佢講中左,
我事實係未出離蒲過,由細到大都喺溫室長大,
冇乜經歷過啲咩風浪,就算讀書果陣喺球場打波果陣同人嘈,
永遠我在場嘅時候我地果邊都咁橋處於強勢,次次唔夠人果陣,
我都咁好彩唔喺度嘅,有次我唔喺度,我班同學仲打人打到比人拉左添,
諗落真係要還神。
 
好快我部車就穿過左香港仔隧道,


沿住黃竹坑道繼續行駛。
 
「...喂...你住香港仔邊度架?」我問。
 
「...喺中心求其搵個位放低我得架啦。」小苑回應,
於是我就將部車兜入中心裡面,喺利港商場附近將部車停埋路邊啦。
 
我見小苑佢冇乜反應,於是就落車行左過去佢果邊,開埋度門請佢落離啦。
 
「...到啦...小姐,洗唔洗送埋你上樓先捨得落車呀!」我一手幫佢拉開左度車門,用諷刺嘅語氣講。


 
「...最好啦!」小苑繼續串咀,仲要斯斯然咁慢慢行落車喎,瘟神真係易請難送呀!
 
「...聽日仲離唔離接我收工呀?」小苑問。
 
「...邊個接你收工姐,都話我咁啱經過囉!」我無奈回應。
 
「...哦...okok,咁你聽日仲會唔會咁啱經過呀?」小苑嘴角戚起,
個樣好似奸笑咁問,擺明串我咁款。
 
「...你....!」我都唔知講咩好啦,比小苑激到我爆咁濟...!
 
「...姨~姨~!」但係遠處忽然傳離一把小朋友聲。
 
「......!」我回頭一望,原來係一個六、七歲左右嘅細路女,


眼大大、長長頭髮,著住條白色連身裙仔,加對涼鞋...
彈吓彈吓咁跑緊埋離。
 
「...咦...浠琳!!點解你喺度嘅?你媽媽呢?」小苑一手拖住左個細路女,好疑惑咁周圍望緊。
 
「...媽媽喺果度囉!」細路女指向街尾處,我隱約見到一個身型纖瘦嘅女仔,
慢慢咁從街尾行緊過離,仲揪住一袋二袋,好似啱啱買完餸咁。
 
個女仔越行得近,個樣就越清楚。個女仔遠睇大約廿六、七歲左右,
同小苑一樣有一頭長直髪,身材同樣瘦削,不過比小苑嘅排骨身材,
依個女仔嘅身材就略為標準,可能生過仔嘅關係啦。但係望吓望吓,
越望就越唔對路...,點解依個女仔好似咁熟面口咁嘅...,
到我地同個女仔嘅距離只有幾米果陣,我直頭成個人呆哂,因為....
 
「...嘻嘻...家姐,同浠琳出離買野牙?」小苑對住個女仔講。


 
「........!」但係喺依一刻,個女仔同我一樣,
都係比人點左穴咁,呆左咁望住我。
 
「...家姐!喂!」小苑見到佢家姐呆左咁,於是不停叫佢,
但係佢家姐依然係一啲反應都冇,於是小苑轉移望向我,
我同佢家姐你眼望我眼咁對望左成分鐘咁濟....,終於....
 
「...hi,er....好...好耐冇見啦!」係我主動開聲。
 
「...er...幾...幾好!」小苑家姐面紅紅,好尷尬咁回應。
 
「...姨...家姐,乜你地識架?」小苑驚訝大叫。
 
「...唔好阻住人啦,阿女我地行啦。唔好意思呀,趕住煮飯,走先啦。」


小苑家姐講完之後,就好匆忙咁拖住個細路女急急腳走左啦,
而小苑亦追住佢家姐尾一齊走,佢地走哂之後,我就跳返上車度,
開車返屋企啦。
 
揸緊車果陣...我心情真係好忐忑。好多回憶喺腦海入面一一浮現。
講到依度我諗我都無謂再賣關子啦,其實小苑嘅家姐,正正就係我嘅ex,
我嘅前度女友,佢個名叫做陳詠恩,我地係讀毅進果陣識嘅,
應該係我地廿一、二歲果陣,本來我同另外一個女同學曖昧緊,
但係一次做(人際project )嘅時候,miss將我同詠恩編埋同一組,
之後一次我地約出離傾野果陣,...我地就撻著左,之後...我地就一齊左,
原本同我曖昧緊果個女仔,大受打擊...仲拉埋佢幾個friend一齊杯葛我地添,
不過果陣愛情大過天,加上都差唔多學期尾啦,杯葛咪杯葛囉,我地一啲都唔在乎。
 
就係咁...我地好開心咁生活,毅進畢業後,詠恩冇繼續讀書或者做野,
而我就已經做緊貨車司機,記得果陣詠恩仲成日離接我收工添,


有次詠恩等緊我收工果陣,我喺公司走廊唧緊貨,詠恩仲走埋上離部唧車度,
我戴住佢喺走廊度兜圈添,唉...回憶總是美好,不過咁歡樂嘅時光只係維持到大半年,
至於我地點會散架呢?講起上離應該係我嘅問題,因為當時年少氣盛,皮氣臭到爆炸,
直頭好似有燥狂症咁,雖然未去到話會打人,但係就經常小小野就會發卑氣,
有次同詠恩為左啲無謂野而嘈,我嬲到一腳踢爆左詠恩屋企個衣櫃度門添,
至於點解會分手呢?er...等我諗諗先,吖...我記得啦,果次我同個friend去督波,
當時應該係夜晚十一、二點左右,詠恩過左離搵我,到督完走果陣,唔記得為左咩事啦,
好似係我同個friend爭論緊一樣野,傾到咁上下問詠恩意見,點知詠恩唔幫我不特止,
仲夾埋我個friend一齊話我,可能我大男人啦,女友夾埋第二個男人一齊話你喎,
簡直係死穴啦,於是我一怒之下自己走左....,可能詠恩亦都忍無可忍啦,
加上佢本身都係個好倔強嘅人,就係咁...我冇再搵佢,佢亦都冇再搵我,
我地慢慢咁飛out....!依家諗返起其實都幾可惜,不過人生總係會有啲遺憾啦。

 
返到屋企我照常沖涼,之後循例坐左喺電腦枱前面。思敏照常十點零鐘打比我報到,
傾左半個鐘左右就收左線。之後我就繼續坐左喺電腦枱度打一陣機。
 
「....嘟嘟~」電話再一次響起...
 
「...喂!」我接聽左。
 
「...喂!」一把女仔聲。
 
「...阿瑜?」我問。
 
「...小苑呀!」吓...小苑??佢點會有我電話架?唔通係詠恩講佢知嘅?
 
「...吓!!」我好驚訝咁吓左出離。
 
「...阿瑜係你女朋友牙?」小苑問。
 
「...er...你點會有我電話架?」我反問。
 
「...車...果日喺沙灘已經攞左你電話號碼啦!」小苑理直氣壯咁,
係喎...諗返起果日,小苑曾經搶過我部電話去用架喎,
仲以為係佢家姐比佢嘅添!
 
「...你快啲從實招來,你同我家姐到底係咩關係?」小苑突然好似審犯咁。
 
「...吓...咩...咩呀!!」我比佢嚇到窒左一窒。
 
「...家姐見到你之後成個樣變哂,返到屋企之後仲咩都唔肯講,
你地之間一定有啲咩不可告人嘅秘密!!」小苑繼續進逼!
 
「...咩...不可告人姐,只係舊男女朋友關係咋嘛!」比佢咁嚇一嚇,搞到我乜都講哂出離添!
 
「...吓!!唔通你就係浠琳嘅爸爸?」小苑忽然爆出一句驚人嘅說話!
 
「...吓!你...你講咩呀??」我口窒回應,到底發生咩事呀?邊個浠琳呀?
 
「...我話...你係咪我姨生女浠琳嘅親生阿爸呀?」小苑今次講得更清楚。
 
「...痴...痴線,點會呀!」我嚇到口都窒埋,痴線架...邊有可能呀,
我地都散左咁耐啦,依啲野唔關我事嘅!!!
 
「...你係幾時同我家姐一齊架?」小苑問。
 
「...做...做咩姐,唔...唔會嘅!」我支吾以對,驚到心肝仔都跳埋出離咁濟。
 
「...你唔敢講即係你係啦!」小苑咄咄逼人咁,繼續向我進逼!
 
「...都...都差唔多成七年前嘅事啦,點...點會係我姐!!」我緊張回應。
 
「...七年前?係啦...浠琳今年生埋日就七歲,計落九成九係你啦,
原來你就係我果個負心嘅哎呀姐夫!!」小苑諗左一諗,
之後好堅定咁講出依句說話。
 
「......!」我個腦一片空白,完全唔知講咩好,成個人輕哂機咁....
 
「...喂!」
 
......
 
...........
 
已有 0 人追稿