估唔到我同思敏,會係用咁難睇嘅方式結束我地嘅關係,
而且仲離得咁急咁突然。我離開左酒店之後,就截左部的士,
好有型咁直接去到機場,然後坐最快嘅飛機,一個人咁返左香港。

我承認咁好似好不負責任,但係...其實都好過拖泥帶水吖。
我亦都承認我對思敏係有好感,但係亦都唔可以否認,
喺依一刻我最愛嘅,仍然都係阿瑜,所以我更加唔可以再拖住思敏。
 
果日之後...我取消左休假,提早返工繼續我嘅歌手生活,
或者咁樣係我逃避思敏嘅唯一方法啦。兩日之後阿妹佢地就返左離,




出奇地...今次阿妹竟然冇嬲到我,只係問我點解走得咁急,
亦都冇再喺我面前提過思敏。
 
工作一日比一日忙,公司幫我做左兩首新歌,兩首都順利幫我派到台,
各大電台間中都會播我嘅歌,而且間中又會上吓j2嘅一啲音樂節目唱吓live咁,
開始多左人識我,喺街度亦都會有人認得我,對我指指點點咁,
雖然辛苦...但係就好有成功感。阿瑜同樣都小見左,平均每個星都見唔到佢兩日,
只係間中夜晚會抽啲時間出離同佢食餐晚飯。
 
忙左幾個月,終於都崖過左2017年啦,今日係2018年1月1日,




好開心呀...可能公司同商台嘅關係比較好啦,
今日我有幸出席(903吒叱樂壇頒奬典禮),
而且仲有份提名今年嘅新力軍獎添。
 
而家係傍晚六點鐘左右,我坐左喺公司安排嘅車上面,同其他新人呀、
助手呀...仲有好多set頭、化妝嘅工作人員一齊去到會展現場,
嘻嘻...我啲咁嘅新仔邊會好似啲大歌星咁有自己私人嘅保姆車吖,
有車比你坐咪偷笑囉。
 
部車駛到入特殊區域,之後我地就全部人一齊落車啦。




一落車就有一啲商台嘅工作人員帶住我地沿住停車場進入會場嘅後台區,
經過左一度又一度嘅門之後呢,我地終於都入到去會場嘅內部啦。
 
依度同頭先簡直係兩個世界,周圍都係佈幕同化妝枱,
仲打哂射燈搞都成個後台區超級光猛,依家周圍都係人喺度行離行去,
大家都好似好忙咁!
 
「...聰!!過離化妝先啦!」助手阿Kay叫我,係呀...係我助手,
不過佢同時係阿yan嘅助手,係呀...唔記得交代返添,
阿yan係當初同我一齊去試音果個女仔呢,可能大家都已經忘記左,
而佢同我兩個呢,就係公司今年力捧嘅男女新人啦,
所以好多時都會同阿yan一齊出席活動。
 
而家阿kay幫我同阿yan兩個都安排到化妝師幫我地搞搞,
於是我亦都好乖咁坐左埋去啦。其實我一向都唔係咁鍾意化妝架,




始終男人老狗化乜鬼嘢妝吖,但係今日要出席咁大型嘅活動,
點都要化小小嘅。因為我叫化妝師輕手啲關係,所以唔洗十分鐘就化完,
而家百無聊賴咁行離行去。
 
因為始終我都係新人,所以除左自己公司嘅歌手之外,其實都真係冇乜人認得我,
有啲歌手仲以我係dj添,我同佢打招呼仲同我講辛苦哂...,無所謂啦...新人就係咁架啦。
 
「...hi!」忽然有把女仔聲叫,我下意識回頭一望,
原來係今年女新人yanki,佢...唔會係叫我掛?
 
「...我牙?」我問。
 
「...係呀,張敬聰!!!」Yanki好興奮咁指住我叫我個名。
 
「...係...係呀,哈哈...你好你好!」我好尷尬咁回應,估唔到佢會認得我。




 
「...上次上勁歌我地咪見過囉!!」Yanki笑笑口講,
諗諗吓又好似係喎,不過果次成四、五個新人一齊上,
真係唔係好記得原來佢都喺度。
 
「...你首(世頭謠)我好鍾意聽架!!」Yanki繼續用興奮嘅聲線講,
搞到佢好似我friends咁,不過諗落大家都係今年新人,大家都咁高咁大姐,
點解我會睇唔起自己呢?講返首(世頭謠)又真係幾好聽嘅,係我第一首主打歌,
都叫做上過幾個星期903專業推介架,歌曲主要講人情世故、同許廷鏗隻(青春頌)、
或者關智斌首(預言書)有異曲同工之妙咁囉,公司話想我行成熟路線喎,
所以離緊都會做多啲有關人生主題嘅歌比我。
 
同yanki傾左一陣之後,我地就分開左,佢有佢繼續周圍去soso,
而我就繼續行行企企咁,眼見另一個女新人cherry喺附近比幾個記者圍住傾計,
我都不時偷望幾眼,無計啦...人地係今年新人王,歌影視三線都玩哂,




人氣當然爆燈,睇離今年個新人金獎都真係非佢莫屬架啦。
 
話咁快就已經差唔多夠鐘,有dj走左埋離同我地講解吓,一陣出場嘅方式,
次序、各樣那樣...等等,我痴住阿yan一齊好留心咁聽,之後過左無耐,
dj就示意叫我地出場啦,好緊張添!
 
「...我地有請歌手準場!!!」
 
「...wu~~」
 
就係咁,我地就一個跟一個咁行出去啦。司儀按次序讀出我地每個人嘅名。
之後我就同阿yan一齊被安排坐左喺第三行左右嘅位置,都係坐返喺我地自己公司嘅大師兄、
大師姐後面。估唔到吒叱就睇得多,第一次自己坐喺歌手席入面,果種感覺真係好特別。
eason、joey就坐喺我前兩行,感覺就好似同佢地好friend咁。
 




「...~噔噔~噔噔噔噔~」音樂不斷響起!
 
「...專業推介,吒叱十大 !」一輪音效之後,又走左個dj出離講野,
原來一開波就即刻頒奬,dj司儀講完一輪廢話之後,就即刻揭曉第一首十大歌。
 
我亦都開始欣賞各位師兄師姐們嘅表演,睇吓人地嘅唱功,亦都睇吓人地嘅台風,
全場我同阿yan就不斷食花生,換個心態去諗,可以免費坐喺咁近欣賞咁多歌手表演,
簡直係神級享受啦,有冇獎已經唔重要啦。歡樂嘅時光過得特別快,
轉吓眼就已經差唔多去到尾段啦,其實中途都頒左好拿多個獎,當然我同阿yan依然係食花生啦,
但係跟住落離嘅環節,終於都關關地我地事啦,因為跟住落離要頒發嘅係叱咤生力軍獎,
而家所有今年嘅新人都開始緊張起上離啦,講真過左今年,下年要同其他天王天后掙獎喎,
機會真係相當之渺茫,所以個個都想嚫仲有新人獎攞果陣就攞返個頭炮,
而家連坐喺我隔離嘅阿yan都緊張到拉住左我件衫。
 
「...大家好,唔知各位新人會唔會覺得自己生不逢時呢?」有兩個dj走左出離講廢話開場白,
講左大約三分鐘左右,內容都係圍繞住我地所有新人,大家都聽到津津樂道咁。
 
「...叱咤樂壇新力軍銅獎!」音效響起,應該都係同其他獎一樣由銅獎開始頒起。
 
「...依位歌手,我地近依幾個月先開始聽到佢嘅聲音,
因為原來佢喺年頭嘅一個歌唱比賽開始比人發掘出離架喎!」吓,歌唱比賽?唔會掛!
 
「...2017年度叱咤樂壇新力軍銅獎得主就係.....」全場靜哂等緊dj宣布!
 
「張敬聰!!!」
 
「...噔噔~噔~噔~噔噔~上磅歌包括《世頭謠》、《兜路行》。」
音效再一次響起,我都仲係唔係幾清楚到底發生緊咩事。
 
「...喂,聰!你呀,上去啦!」阿yan喺側邊係咁拍我,我定過神後,吞一吞口水,
就硬住頭皮咁行上去啦。行緊果陣真係有小小腳震,大佬而家咁多天王天后嘅注意力都落喺我度,
唔緊張就假嘅,估唔到竟然比我攞到個銅獎。
 
「...thank you!」我接過個獎。
 
「...有幾十秒時間,講吓你嘅得獎感受啦。」dj講。
 
「...er...好緊張呀,唔記得哂要講咩添!」我講,其實我根本無諗過自己會攞到獎,
所以根本就無諗過要講咩,是但啦...求其講啲野啦。
 
「...多謝我公司....」都係果啲啦,多謝公司呀,經理人呀、903呀、dj們呀、作曲、
填詞果啲呀...等等,總之記得幾多就講幾多啦,幾十秒時間轉眼就過,
攞完獎之後,我就急急腳咁行返落去坐啦。
 
「...恭喜您呀聰,你就好啦!」阿yan用羨慕嘅語氣講,不過我知佢份人冇咩嘅。
 
返到埋去之後,好多公司嘅師兄師姐都有恭喜我,而阿yan直頭拎住我個獎喺咁影相。
可能佢真係好恨攞啦。大會繼續頒獎,結果亦都好正路。銀獎得主係頭先喺後台同我打招呼嘅yanki,
而金獎係由大熱門嘅新人王cherry順利跑出,其實我都係佢friends離架,
我最鍾意就係有對爆牙仔咁qq地果啲女仔,所以一陣頒獎典禮完左,
幾大都走去恭喜吓佢,同佢影返張相先。
 
頒獎典禮繼續進行,頒完生力軍之後,其實仲有好多個獎頒,多到我都唔係好記得咩獎打咩獎啦,
只係知我地公司嘅師兄師姐們都攞左唔小,應該算係今次頒獎典禮嘅大贏家。
再坐多一陣,連最後嘅大獎都順利頒完啦,現場觀眾陸陸續續離場,而我地歌手們緊係冇走得咁快啦,
我地又去返頭先果個後台度同啲記者影相同傾計,其實都幾無聊吓。
 
「...cherry,恭喜你呀!」見到cherry我仲唔拿拿臨走埋去博friend咩!
 
「...多謝,嘻嘻...你都攞個銅獎啦。」cherry開心回應,依個時候有記者喺度,
順理成章幫我地兩個新人獎得主一齊影返幾張合照,影完之後我仲順利抄埋cherry牌,
嘻嘻...以備不時之需姐。開完依個比面派對之後,公司嘅大師姐話請食飯喎,
本來我都唔想去架啦,但係你知啦,做得我地依行,人在江湖 身不由己,
大師姐叫到喎,點都要去應酬吓架啦,於是我同阿yan就跟大隊一齊去食晚飯啦。
 
其實都成十二點咁濟,嚴格離講依餐應該算係宵夜多啲囉,好多師兄姐都有自己嘅保姆車,
至於我同阿yan就跟左大師姐部車去啦,其實我都唔知去食乜架,開車之後大約行左十幾分鐘左右,
部車就去到跑馬地嘅一間飯店門口停低,都正路嘅大師姐就住喺跑馬地,佢話請食飯喎,
緊係返自己主場啦。落車之後...我同阿yan就跟住大隊一齊行左入舖頭入面嘅一間vip房度,
間舖係食小菜嘅,都唔算太豪華,似係啲老字號舖頭,我地所有人坐低哂之後呢,
大師姐就發板幫我地叫送啦。
 
「...大家想食咩隨便叫啦,唔洗同我客氣喎!」大師姐見我地冇乜意見咁樣,於是出聲。
 
「...聰!!新離新豬肉,你叫先!!」大師姐指住我講。
 
「...吓...er...咁...要個(椒鹽九肚魚)囉!」我望一望牆上嘅其中一個餐牌講。
 
「...good!!其他人呢...??」就係咁,大師姐逐個點名叫餸,正所謂集思廣益,
人多好辦事,好快就已經叫晒餸,而且啲餸唔夠15分鐘就陸陸續續擺到成枱都係!
 
食到七七八八果陣,我一個人行左出門口諗住透一透氣果陣,忽然.....