中左六合彩頭獎四千八百萬，依家唔知點算?: 45黃思敏視覺
黃思敏視覺。
大家好，我叫做黃思敏Jennifer，
啲friend平時都會叫我fafa。
果次去日本係我成世人最開心亦都係最痛苦嘅時刻，
點解咁講？因為去嘅時候，可以同我暗戀左好多年嘅男友聰哥一齊去囉。
但係估唔到結局竟然會係咁樣，其實我一早都已經知道聰哥係對阿瑜有意思架啦，
就喺我生日果次，我見到聰哥望住阿瑜嘅眼神，我已經心中有數，
但係未到最後我都唔想放棄，估唔到生日果晚，聰哥送完阿瑜走之後會再返返離我度，
可能受酒精影響啦，聰哥忽然...對我好熱情，就係咁...果晚我地發生左關係，
之後我就順理成章成為左佢女朋友。其實我又冇正式咁問過佢嘅，
之但係我見聰哥又冇乜表示咁，我就緊係當佢應承架啦，所以呢...我夢寐以求嘅生活就咁展開左。
可以同自己心目中嘅男神喺一齊喎，就算佢對我冷淡啲又有乜所謂喎，
只要可以留喺佢身邊，我已經無欲無求架啦。不過可惜...咁美好嘅關係只係維持左幾個月，
其實早喺去日本之前嘅一個月，我已經無意中喺聰哥嘅電話度發現左佢同阿瑜嘅關係，
其實都係意料中事，所以為左可以繼續同聰哥一齊，我決定扮唔知，
我希望聰哥有一日會回心轉意，又或者比我嘅愛所打動。
但係到最後...好明顯係唔得啦，要走嘅始終要走，就算我留得住佢個人，
都留唔住佢個心。終於...聰哥喺我生命當中消失左。當時我傷心欲絕，
曾經諗過要自殺，但係一諗起我嘅屋企人會好傷心，
到最後我都衝破左依個心理關口，我同自己講我要忘記聰哥，
於是我寄情工作。我連續返左兩個月工而冇放過一日假，
過左一段時間，我嘅情緒開始穩定返，我開始有返正常嘅社交。
幾日前我仲喺機場識到個日本離嘅男仔jerry，jerry份人好nice，而且仲好風趣幽默，
所以我對佢好有好感。jerry約左我出街，我見佢係遊客，咁我咪盡吓地主之誼囉。
今日佢同樣約左我出離，話想我帶佢行吓廟街喎，咁我咪約佢下午離將軍澳搵我，
再一齊出去行街囉。行完一輪之後，我就同jerry一齊食飯，食完飯之後呢，
因為下午果陣jerry話有啲日本手信想送比我，於是我就跟左佢返去酒店房啦。
入到房...jerry倒左杯香檳比我，然後就坐低左，喺度講吓佢喺日本生活嘅一啲趣事我聽，
我聽吓聽吓，不知不覺間...我就訓著左，到我醒返之後，我竟然訓左喺張床度，
而且仲衣衫不整咁，而jerry佢...就已經不知所蹤啦。
而家我一個人，對住一間空房，坐左喺張床度唔知點算，
連銀包同手提電話亦都不翼而飛，我...我而家...到底可以做啲乜呀？
「...咯咯～～」就喺我坐左喺度十幾分鐘唔知點算嘅時候，
門外忽然傳離幾吓敲門聲。我猶豫左一陣，到最後...我硬著頭皮咁去開門，
但係喺門外出現嘅...竟然會係一個我意想不到嘅人。
「...點...點解！」我成個人呆哂，而且口都窒哂，因為企喺門外嘅...竟然會係聰哥。
「...攞返住啦。」聰哥行左入離，手上揸住我嘅銀包同電話，
到底...發現緊乜嘢事呀？我有啲摸不著頭腦。
「...果個男仔喺咪叫jerry呀？」聰哥問。
「...你...你點知架？」我疑惑回應。
「...佢係咪話佢係日本離嘅遊客，屋企大把錢吖。」點解...聰哥會知道哂所有野嘅？
「...你自己睇吓！」聰哥遞左佢部電話比我。
「...世紀賤男....」係個電話上緊果個網嘅標題，主角張相竟然會係jerry。
「...晏晝撞到你地果陣我都覺得熟口熟面咁架啦，依條友呀...網上面出哂名架啦，
姓苗嘅...佢阿爺係我以前屋邨區議員離嘅，細細個就周圍去呃人錢，
淨係行騙案底都十幾廿單呀，專係扮日本仔，周圍去識女仔，之後話自己好有錢，
約左啲女仔出離就又食又拎。」聰哥一輪咀講，估唔到...jerry竟然係啲咁嘅人。
「...佢有冇問你借張信用卡用呀？」聰哥問我。
「...有...有呀！」我口窒回應。
「...唉...咁就死得啦，快啲打電話去cut咭啦，仲有佢...有冇對你做過啲....」聰哥講到依度停左落離，而我亦都忍唔住啦。
「...嗚～～嗚～～」我忍唔住喊左出離，因為我覺得自己真係好天真好傻，仲要所有野都比聰哥講中哂。
「...喊有用咩，唔錯都錯左啦！我喺樓下同佢糾纏左一陣先同你攞得返個銀包同電話咋，
咪當上左人生寶貴嘅一課囉，以後帶眼識人啦！」聰哥有啲語氣重咁話我。
「...嗚～你唔好理我啦！！」我喊住講。
「...點唔理你呀，話哂都係朋友！」聰哥有啲惡咁回應。
「...嗚～～你知唔知我好辛苦先忘記到你咋，嗚～～
點解偏偏你又要喺我面前出現呀！」我繼續爆喊暴走。
「......！」聰哥比我嚇到唔知點應我好！
「...嗚～～我而家先知道～原來鍾意一個人係咁痛苦架！嗚～我求吓你啦，
你唔好再喺我面前出現啦...嗚～唔好再比希望我啦...嗚～」我將心入面嘅說話講哂出離，
因為我真係好想忘記聰哥。
「...既然我唔可以保護你，你就要好好保護自己....我講完啦！」聰哥deadair 左一陣之後，
講左依句說話出離，之後就轉身走左啦，個動作同喺日本果次幾乎一樣，
...聰哥...我知你係為我好，但係為左你...亦都為左我自己，我今次一定要灑脫啲，
黃思敏...堅強啲，你一定得嘅！
https://youtu.be/Vw9hHwwwHSM
謝霆鋒 多得你小
作詞：林夕
作曲：謝霆鋒
編曲：Eric Kwok
知你願意聽聽表白和概況 全部已過去了是否失你望
還是似欠了你 甚麼都再來一趟 難道你會以為沒相干
其實你已分手 晨早都講過夠
做臨時朋友 等哭乾過後
＊如若你想交友 何必專揀我鬥
(如若你想交友 無謂強自出頭)
無謂扮侍候 扮問候
瀕死了沒有 無需要內疚
＃為何再電我 為何再預我 讓我不得安坐
沒妄想太多 是我多得你少 為何當我也是傻
明明放下我 為何放任我 洩盡殘餘花火
我又要 超生過(重新醫過)
一吃下你手開的藥難醫好 門是你去閉上怎麼找去路
難道你要證據 你可失去又得到
難道我會以為 能忍到
黃思敏視覺完。