中左六合彩頭獎四千八百萬，依家唔知點算?: 46
估唔到思敏會咁激動，我係咪真係多事左呢？離開左酒店之後，
我揸車返左屋企，返到去果陣已經差唔多十一點啦。
好彩出去果陣叫左阿媽留飯比我姐，如果唔係又要食街外野。
喺廚房拎返啲飯餸出離之後，我就坐左喺飯枱度食我嘅晚餐。
食緊果陣...我都不忘打比老大，而家都成十一點啦，
應該收左工返左屋企啦掛。
「...嘟嘟～～嘟嘟～～」我打緊比老大。
「...喂，謝霆聰！」好野呀，係老大接聽呀！
「...嘻嘻...老大！」我奸笑。
「...搵我有事牙，笑到咁嘅？」老大問。
「...冇呀...恭喜你姐，升左（士沙）喎！」我繼續擦鞋。
「...多謝，...哦...冇咩大不了姐！」老大雖然係咁講，但係語氣呃唔到人，
聽得出佢非常開心，又係嘅...當左廿幾年差...終於比佢升到上員佐級警員嘅最高層喎，
開心都好正常嘅，不過睇離佢完全唔記得左我份（親子鑒定）報告囉。
「...er...係呢，之前果份（親子鑒定）報告，唔知...出左未呢？」我口窒窒咁問。
「...吖...係喎，冇左件事添！」老大恍然大悟咁，唔會真係搞都未搞掛？
「...上個月已經出左架啦，不過果排忙緊見board，
所以唔記得同你講添！」哦...嚇得我吖，幾驚你整都未齊呀。
「...哦...咁就好啦，唔知幾時比到我呢？」我有啲興奮咁問。
「...但係我放左喺差館locker喎，而且入左camp又唔會返局，
我諗要我出camp之後先比到你啦。」唔係掛又要等，可唔可以專登返去攞呀，
...但係又講唔出口喎，人地已經無條件幫我，仲點敢對人要求咁多姐。
「...哦...好...好吖，咁幾時出camp呀？」我問。
「...應該過多一個月左右，放心喎...報告喺度，所有野都已成定局架啦，
係你就係你，唔係你嘅早一個月知同遲一個月知都冇乜分別架姐！」
佢就緊係咁講架，心急果個唔係佢吖嘛。
「...哦...咁好啦，到時再搵你攞份報告，順便請你食飯同你慶祝升職啦，唔該老大。」
講完一堆恭敬說話之後，我都係要死死地氣咁收線，而家唯有等多一個月啦。
收左線之後，我食完我嘅消夜，再沖埋個涼，之後我打左比阿瑜，
但係原來佢已經訓緊覺，又係嘅...成十二點幾，一個正常返朝九晚五嘅OL訓左都好合理嘅。
唉...咁難得嘅一日大假，估唔到咁快就結束，好似做左好多野咁，
又好似乜都冇做過，救左思敏...但係佢又好似唔多領情，心急睇報告又攞唔到，
連搵阿瑜傾兩句都傾唔到，聽日又要開始過忙碌嘅工作啦，唉...又唔知幾時先有假放啦.....！
一月三號之後，我重新投入我嘅工作。攞左新人獎真係唔同啲，
公司比我嘅資源多左，接嘅job又多左，就連練習都多左，
比起之前...我更加冇時間，但係好充實...好有挑戰性。知名度就緊係大左啦，
依家去到邊都有人認得我，今日仲有個人約左我出離傾野添。
而家係下午三點幾，上午出席完活動之後，我見有小小時間，
所以應約去左尖沙咀見依一個人。而家我坐左喺半島酒店嘅coffee shop度等緊依個人，
一邊等一邊玩緊手機。
「...咁早到嘅！」係一把女仔聲，我抬頭一望，果然係佢...約左我嘅人，
佢仲同另外一個唔識嘅中女一齊離添。
「...咁上下啦，坐啦！」我回應，其實依一個約左我嘅女仔，係阿瑜嘅堂家姐Carrie，
唔知有冇同大家講過呢，阿瑜全名叫譚嘉瑜，Carrie本身亦都係一個歌手，
因為阿瑜同佢唔係真係話好close，所以我都係入左行先知，至於carrie係邊個呢...我就不便透露啦。
而今次Carrie亦都係透過阿瑜約我出離嘅，唔知佢搵我咩事呢？
「...你最近好忙喎！」Carrie笑笑口講。
「...大家咁話啦，你又拍劇又唱歌咪仲忙。」我回應，其實都係果啲應酬說話。
「...入正題啦，其實今次呢，係我經理人想見吓你嘅！」Carrie望一望佢身邊中女講。
「...你好呀...聰...我叫ella，其實我地公司對你好有興趣，所以想睇吓阿聰你，
會唔會考慮轉投我地唱片公司呢？」中女講，原來係想搵我過檔，
估唔到連大台都對我有興趣。
「...以我所知呢...，阿聰你依家同你公司簽果份合約，只係一年嘅新人合約，
而且仲有幾個月就約滿。」好野喎，連依啲野都知，仲知得清楚過我添，果然做捉功課。
「...你地公司一向嘅作風我都略有所聞，對新人一向都冇乜保障，
而我地公司保證可以比到捉夠嘅亮相機會你，
而且我可以保證比到二至三線歌手待遇嘅合約你！」ella同mani一樣，
都係用專家口吻一輪咀咁講左好多野出離，都係聽落好似好有計咁，
但係始終都唔係小事，所以到最後我都係返去考慮吓先。
之後嘅日子，我當然係繼續忙碌啦。好快又過左一個月啦，
我分合約仲有兩個月就到期，公司開始同我地傾續約嘅事啦。
今日...經理人mani叫左我返公司開會，美其名開會，其實就係傾續約嘅事，
所以今日一早，我出席完一個商場show之後，就返左公司搵mani。
喺會議室坐左一陣之後，mani就斯斯然咁拎左啲文件行入離。
同平時一樣咁cool，一入到離就坐低整理一下果啲文件，
以我今時今日嘅知名度，份合約點都唔差掛。
「...咁嘅...阿聰，你都應該知...你份約都差唔多到期啦！」mani打開話題。
「...知！」我淡定回應。
「...就咁嘅，我都知阿聰你近排人氣急升，知名度高左好多
，...但係上便啲老細...er...咁嘅...我地諗住同你簽一份五年嘅合約，
但係呢...頭兩年嘅待遇就跟返你而家嘅新人合約，到第三年起，
合約會變成二、三線歌手約！」mani講解合約。
「...吓...唔係掛？我咁嘅知名度，仲要等多兩年先比到二、三線待遇我？」我有啲無奈。
「...我明...但係budget有限，公司今年業績又唔係咁好，
老細仲啱啱買左架新遊艇添，所以就....er....兩年好快過架姐，
咪當磨練吓囉。」平時好正經嘅mani，今日竟然烚熟狗頭咁對住我，
鬼咩...要諗啲咁嘅藉口出離都真係考起佢，喂...大佬...老細買左架遊艇關我L事咩？
架遊艇我有份用架？佢不如話自己屋企又要買車又要買樓，仲有成家人要養吖笨！
我返去考慮左兩日，雖然見阿yan份約比我起我果份好似仲差，
之但係...我假假地都叫做攞左新人獎吖，叫價點都會高小小掛，
所以到最後...我決定唔續約，轉投阿瑜堂姐Carrie所屬嘅唱片公司。
mani雖然有留我，但係可能老細真係企得好硬啦，
mani講離講去始終都冇提高到對我嘅offer，最後mani可能知我去意已決，
所以主動提早結束我地嘅合約關係，等我可以順利同新唱片公司果邊交接。
就係咁...我簽左比Carrie嘅經理人Ella，簽左之後...佢首先安排左我去新公司同啲高層見吓面，
講解吓公司未來嘅發展，都係果啲門面野啦。跟住落離果幾個星期，除左安排我去練歌之外，
仲開始要我學埋跳舞囉，雖然我真係對跳舞零興趣，但係公司叫到都冇計，唯有頂硬上啦。
好唔容易終於上完啲跳舞堂啦，
但係今日又無啦啦叫我返將軍澳公司，
唔知又要我搞啲咩囉！
「...聰，到左啦！」係Ella 叫我，而家我身處喺公司餐廳，
Ella啱啱喺門口行左入離。
「...哦...一陣姐！」我回應，之後ella就坐左埋離啦。
「...係咁嘅...今日叫你離總公司呢，其實係有個劇集角色想你演出一下嘅！」
「...吓！！！」我驚訝回應，唔係掛？我淨係識唱歌架咋嘛，拍劇？玩我咩！
「...唔洗咁興奮住，只係客串吓姐，因為公司想你盡快入屋，
所以想你多啲出鏡！」喂...我唔係興奮囉，我根本就對做戲零興趣！
「...咁...係咩劇呢？」我好疑惑咁問，眼神仲有小小空洞。
「...哦...處境喜劇離姐，詳細內容...一陣我交比導演同你講解吓...」吖...低得佢吖，
ella講到乜都唔關佢事咁款，乜都冇講過就帶左我落廠見導演啦。
Ella帶住我左穿右插，唔知兜左幾耐之後，終於都入到廠啦。
啲廠大到呢...成個會展咁，諗諗吓又講得誇左啲，不過都真係幾大，
我跟住ella行左入其中一個廠度，一落到廠十九幾人，都唔知邊個打邊個，
又場務、又編導、又茶水、又特約咁，其實我到底算係咩野呢？