✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #13

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3

．作者FB︰http://bit.ly/2jHymHF
．作者IG︰http://bit.ly/2rxGoFA

///////////




Suki早已看透我似地笑了︰
「做咩喎？咁嘅樣嘅？唔想見到我？」
「唔……無、無啲咁嘅事……」
「哦～即係認錯人啦？以為我係邊個喎？」
「你講、講咩、咩呀……」
真麻煩，一看見Suki，我的口吃變得比阿堅更嚴重。

Suki一副吃定我的樣子，伸出手到我腿上，拍拍我的Notes︰
「真係估唔到你咁勤力喎。我放心啦！」


「吓？」
「之前見你喺學校懶懶閒咁喎，我當然會擔心你啦。你都知，呢個考試對我哋最緊要喎。」
「係、係嘅，你講得好啱……」

Suki嫣然一笑，湊近我的耳邊︰
「唔通……呢啲就係愛情嘅力量？」
我全身發滾，想轉頭偷望她，又恨自己沒有勇氣。

只聽她又說︰
「你個女朋友係咩人嚟？皮膚好白，幾靚女喎。」


「乜、乜嘢女朋友呀？我除咗……唔……我無呀……」
她按住嘴唇作思考狀，我偷偷轉眼望向她。她短髮輕柔在撫在臉上，好想像誘惑我的手指去摸。

她的話驚醒了正看得入迷的我︰
「咁好奇怪喎。我考數學果日，明明見到你拖住一個女仔架喎？唔通你想呃我？你幾時變到咁曳！」
我心跳差點停止︰
「……吓？你、你都係下官考數學？」
「係喎。我本身都想問你去邊度考架，點知你又一直都唔上MSN喎！」
她斜眼啤著我，滿臉嬌嗔。

這是她的絕技，以前只要她使出這招，我必然馬上投降，這次也不例外︰
「sor……唔知你想搵我……」
「你仲未答我問題喎。你拖住個女仔，仲唔認係你女朋友？」
「咁……真係、真係唔係呀……」



她用眼睛盯著我測謊，最後曖昧地一笑︰
「算啦，唔逼你啦。不過，你要上MSN喎，我有啲嘢想搵你傾呀。」
「吓？」
「唔急喎，考埋試先啦。我哋MSN再講。」
她拋了一個秋波，然後離開了長椅。

Suki從來都是這樣，說來就去，說去就去，不給我半點心理準備。

.

當知道Suki看到下官那一幕時，我心中想的卻是︰
「嚇死！好在唔係阿堅見到！」
但Suki跟我們同班，她也知道我跟阿堅是死黨，現在最怕Suki會向阿堅八卦。
只要Suki一問，一說出華小姐的特徵，阿堅肯定馬上會猜到是什麼回事。
不，他肯定會想多才對。



所以考完卷一之後，我馬上急call阿堅︰
「喂！問你一樣嘢！」
「使唔使咁急呀？你頭先有題目唔識做？」
「唔係呀。你……Suki有無搵過你？」

他幾乎想都沒想就用白痴的聲音答︰
「你講你……嗰個Suki？佢點會搵我呀？」
他刻意用「嗰個」指代了「前女友」三個字，我聽起來卻更覺礙耳。
「哈，咁就好。」

「阿翔，你講清楚啲？點解佢要搵我？係咩事？」
「冇呀，乜事都冇！」
「你唔係以為咁講就可以使走我呀？」
「其實真係冇嘢喎……我只係頭先係考場撞到佢。」



「Wow，估唔到世界咁細。」
「佢頭先有話……話佢搵過你，所以問下啫……嗯，就係咁！」
「佢搵我做咩？我完全唔明！」
「佢話……MSN見唔到我，所以搵你問……咁上下啦。」
「真係無哩！佢講嚟激你咋？」

「嗯可能啦……佢最中意咁。喂，如果佢真係搵你呢，無論佢講乜，你都唔好理佢！」
「佢搵我，我收線都收唔切啦！唔怕你打我咩？」

阿堅笑著說，我卻聽出了冷汗。
我最怕的，不是被人打，而是失去阿堅這個兄弟。

.



認識阿堅是小一那年的事。
我們同一個學校，家住得近，所以坐同一輛保母車上學。
那年紀的小男生坐在一起聊動畫玩玩具，很快就混熟，但也很快就會換個玩伴。
所以我們也沒有深交。

直到小五的時候，我們已經不坐保母車，改為走路回家。
有天走到半路，看見矮小的阿堅被一班男同學整蠱，我便學特攝超人那樣挺身而出。
那時我長得高大，對著那些男生罵幾句粗口，便把他們嚇跑了。
自此之後，我們就常到對方家裡玩，他來我家打機，我去他家看電視，跟雙方家長都交情不錯。
選中學時，我也受阿堅影響努力讀書，考上了同一間學校。
看著他在中三時像變魔術般長高，一下子把我拋離。
到我追到了女神又迅速被甩，是他偷家裡的啤酒出來陪我喝。他喝不慣，難喝得整張臉皺在一起，卻還是一瓶接一瓶地陪我喝到爛醉。

我想一直跟他做兄弟。
不需要有別的原因，也不會被任何事影響。
只是，阿堅本人怎麼想？

.

星期五在生物的考場，我又遇上了華小姐。
她還是紮著孖辮戴著眼鏡，一看到我就嚇得整個人跳起來︰
「點解你又喺度嘅？唔係呀嘛？」
我冷靜地搶過她手上的準考證，對了三次︰
「你冇去錯呀，唔好咁大驚小怪啦。」

她用力拍拍胸口，臉上露出笑容。
她的笑容很單純，跟之前那些惡魔微笑不一樣，跟初戀更是完全不一樣。
因為華小姐今天穿上緊身短袖T恤，我這才注意到，華小姐的身材真的比Suki多了幾級……

華小姐把file緊緊抱在胸前，擋住我的視線︰
「你望緊咩呀？死變態佬！」
「喂，你自己係咁拍，我咪望下拍咩囉。你做乜咁多手先得架？」
「最衰天氣熱，唔係我一定會著恤衫嚟考試……」
「你啲讀女校嘅女人真係唔化，人哋望你，係欣賞你囉！」

她跟我的目光碰撞一下，又匆匆移開︰
「……等我仲諗住……搵你幫手添……」
「吓？幫乜嘢？講清楚先，我唔係乜都肯幫架！」
「咁……我最近成日都好驚去錯試場呀嘛……」
「咁你咪小心啲囉。」
「但我信唔過自己對眼嘛……」

她害羞地低下頭，雙頰微紅︰
「聽日就係星期六……我想……搵你幫手，帶我去下星期嘅試場……」

 


/////


《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3

*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝

．作者FB︰http://bit.ly/2jHymHF
．作者IG︰http://bit.ly/2rxGoFA