✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: #29

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
．作者FB︰http://bit.ly/2jHymHF
．作者IG︰http://bit.ly/2rxGoFA
 
///////////




怎麼辦？華小姐居然找上門來了，但我還沒想好怎樣應對她啊。
她這麼關心我，我當然覺得高興，但轉念又想起Suki的話︰
『但有啲女仔比我更衰，會同人玩曖昧，咩都唔講清楚，令每個人都以為自己好有機會……』
她真的關心我嗎？還是，她對每個人都是這樣子？
我……分不出來。

.

換完制服向經理報到，她馬上取笑我︰


「喂，做咩無嚟精神？醒啲！你女朋友嚟咗啊。」
我探頭一望，果見華小姐又坐在窗邊那位置支著臉，似乎在盼望什麼。
我反射性回答︰
「佢唔係我女朋友哩……」
「你啲感情關係我唔知啦，但佢明顯嚟等你囉。你男仔嚟架，唔好要女仔等啦！」

華小姐一直坐在這裡也不是辦法，我向經理交待一聲，便走向她。
她遠遠看見我，笑逐顏開；我走近時，笑容卻漸漸凝結。我想，我現在的臉色一定很差。
她微微張嘴似乎想說什麼，我搶先說︰
「你不如都係返去先。」


「咦？我啱啱坐低咋……我一陣會買嘢食架。」

「唔係，我嘅意思係……暫時你唔好嚟麥當當搵我住。」
她怔了怔︰
「吓？點、點解？」
「經理認得你，知道我識你。你又成日嚟搵我，好似我掛住玩咁。我上次返返下工又突然早退，經理印象已經唔係咁好，我……我廢事畀佢鬧啦。」
「Sorry……我無諗過……」
她搶著道歉，然後雙眼凝望我︰
「我……我哋可唔可以約個時間？我等你放工啊？我有嘢想同你講。」

我的心漏了兩拍︰
「講……講咩？」
華小姐垂下微紅的臉︰
「……上次咪……咪有嘢未講完嘅？我諗住……諗住……」



聽見她的話，我不禁想起那晚我送她回家，在四目交投時，我的手擅自捏住她的臉頰。
那溫熱的感覺，彷彿尚留在我的指尖。
我忍不住搓了搓手指︰
「咁呀，咁……一係……」

只聽她又說︰
「嗯，同埋我仲有啲嘢想問……」
「問乜嘢？」
她望了我一眼，又悄悄別開眼神︰
「我想知點解，你會無啦啦問起阿堅……」

一聽到「阿堅」兩個字，我的大腦就被澆了一盤冷水那樣，瞬間清醒過來。
「唔……都係問下啫，你做乜咁緊張？」
「但係，你……你呢兩日都好似……好似怪怪地咁。你係唔係誤會咗啲咩？」
華小姐一臉憂心，看在我眼內卻有點虛偽。


她會不會在心底裡嘲笑我傻？

我別過臉，不再看她的表情︰
「……無乜誤會呀，我只係覺得返工時你嚟搵我唔係咁好。如果無乜特別事，我都係做嘢先，我哋遲啲先講喇。」
「咦？遲啲……即係幾時？」
「你好心急咩？」
「咁又……唔係……」

華小姐低下頭，一臉失望。我有一瞬間心軟，轉念又想，我的心軟可能也在她的計算之內？
我刻意不再望她，拋下一句「拜拜」，便轉身走回櫃位。 

.

我躲回廚房裡工作了一個多小時，再探頭張望，窗邊的位置空空如也，華小姐不知何時已經回去。
我這樣對她，她應該不會再過來麥當當找我吧？


我覺得太多事在腦中搞不清狀況，她不再迫我，感覺輕鬆不少。

華小姐提起阿堅時，有點欲言又止。
總覺得很在意她這種態度。
根據我和Suki當年的情況，變化可以來得很快很急促。三人行的日子已經結束一段時間了，我難以想像他們現在會怎樣相處。
會很開心嗎？
阿堅會偷偷拖她的手嗎？會擁著她的肩嗎？
我非常非常想知道答案。

.

我想了兩天，還是無法釋懷。
這兩天，華小姐每天都在MSN上問我，什麼時候能約出來見面，她說時間可以遷就我。
如果再見她，可能就要跟她攤牌了。
阿堅跟她怎樣？她跟我又怎樣？要談這種事，想想都覺得是一場痛苦的戰爭。


我還沒心理準備，只能迅速登出當自己看不見她的訊息。

第二天的晚上，我想通了。
我問華小姐，她也不一定會告訴我真相，還不如去問阿堅。
於是我在放工回家路上，坐在樓下公園的韆鞦上，打電話給阿堅。
坐在這韆鞦上，就不期然想起那晚她在這裡盪韆鞦，那張可愛的笑臉。
我搖搖頭，集中精神等阿堅聽電話。

不久傳來阿堅興奮的聲音︰
「阿翔！我啱啱想打畀你！」
「做、做乜事？好似好開心咁嘅你……」
「我得咗啦！」
「得……得咗……乜嘢？」
我從電話裡聽到自己的心跳。

隔著電話，阿堅聽不出我的憂慮︰
「佢同我講咗！」
「咁……咁即係講咗乜嘢先……」
「生日！我知道咗佢嘅生日啦！耶——阿媽我得咗啦！」

我的心稍安︰
「哦……生日咋……」
「梗係唔係咁簡單！我第一次同佢過生日喎，好緊要架！原來佢係七月生日架，而家仲有一個月鬆啲，我一定要畀個生日驚喜佢！阿翔，你話應該點準備好？點先會令佢覺得又開心又感動呢？」
阿堅興奮得像吃錯藥，我的心卻一直往下沉。
也慶幸他過度興奮，看不出我的異樣。
我敷衍地給了幾個爛主意，他說要上網找資料，便匆匆收線。

韆鞦盪來盪去，傳出生鏽的「丫—丫—」聲。
我不禁想起那晚她說的話︰
『我覺得，今年真係好開心呀……今年識到你哋，覺得個世界大咗好多咁。』
而我甚至還不知道她的生日日期。

.

我頹然回家，全身被超乎想像的倦意包圍。
匆匆吃飯洗澡之後，我打開電腦本想找些娛樂分散精神，沒想到一開機，馬上傳來MSN響聲。
asd34567派出狗熊親切地打招呼︰
「喲，上來了？」

我看著她的蟲洞頭像，衝動打下︰
「你幾時生日？」
「咦？為什麼突然這樣問？」
她沒有直接回答，我的心又沉了一截︰
「你答咗我先，幾時？」

狗熊奸笑起來︰
「7月7日，怎麼了？準備送我禮物？」
「就算我唔送，都有人會送架啦」
「嗯？這說法好奇怪喔」
「你同阿堅講咗，佢一定會送畀你架」
不知不覺把心裡的嫉妒，說出來了。


 


/////

​ 

《時光機》現已出版，網店發售
實體書購買︰https://morningrays.boutir.com/
Patreon訂閱初稿連特別篇︰http://bit.ly/39Ab0N3
 
*【時光機】由作者自資出版，外邊書店沒得買
你購書支持，將令我不必再苦練光合作用維生~衷心感謝
 
．作者FB︰http://bit.ly/2jHymHF
．作者IG︰http://bit.ly/2rxGoFA