✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #21

Michelle 18歲生日的晚上，我整晚輾轉反側，那個天台的光景在我腦中揮之不去。
我甚至懷疑過那只是妄想，但在左邊面頰上，彷彿還殘留著餘溫。
雖然我並非親眼所見，但仍可清晰感到那是一個吻。
問題是……那個吻，究竟有什麼意思？真的是為了致謝嗎？有必要做到這地步？
這根本不合她的個性啊，是因為她真的很激動？還是……？

...................................................................................
.《自修室》小說已登錄各大書店
. 全新特別篇及修改內容
. 已上架了，不容易找囉，要買的快喔，還可以情人節看


....................................................................................
 

想了一個晚上，當然是沒有結果。
最後我在天光之前說服自己，認真魔人Michelle之所以會選擇這樣致謝，只因她看太多英文台而被洗腦。
再者，她不是剛剛跟Abby和好嗎？她肯定是想跟Abby再接近一點，而學習Abby的個性。
如果是Abby的話，這行為就很正常吧？沒錯，就是這樣，一點異常都沒有。

我的理性一直這樣說服自己，可是第二天在補習社看到Michelle時，仍不免有點尷尬。
反而她本人落落大方，還跟Abby一起主動過來和我打招呼，有說有笑，神態自若，彷彿沒事發生過一樣。


接著，她還為了掌摑阿堅的事低頭道歉，而阿堅也微笑著安慰她說，自己早就忘記了。

就這樣，Michelle跟Abby和好了，只是我每次看到阿堅，就想起他說華小姐不會回來。
我了解阿堅，我知道他說的是實話，所以才更不想面對。
於是，我們兩個好像成了Abby和Michelle各自的跟班，因為大小姐而常常碰面，但跟班與跟班之間卻沒什麼好說。

說到底，要對別人說教珍惜朋友容易，自己要做到卻是難如登天。

.



應考生活繼續，我們仍每日上學、補習、做功課、做past paper、練Oral……
快要12月的某天，Michelle一走進補習社就跑過來︰
「我幫你問到啦！」
我一躍而起，但顧慮到阿堅，還是拉著她跑出補習社外︰
「係咪有好消息？」

Michelle卻沒有回應，只是呆呆站著。
我被冷風吹了吹，才注意到自己還拉著她的手腕，而她就一直盯住那隻手看。

我臉一紅，連忙高舉雙手投降︰
「Sor、Sorry呀，女俠饒命，我冇心架！」
也許因為風大，她也低頭把臉埋進灰色頸巾裡︰
「冇、冇嘢喎，你對個個都係咁架啦，嗯……我慣咗架啦。」

「係嘅係嘅，我要反省！始終喺女俠嘅世界，男女授受不親……」


她笑著毆打了我幾下，才正式道︰
「正經架。理科班嗰邊話，佢好似已經考咗入大學。」
「係邊間大學？」
「嗯……呢一點又未肯定到，不過應該都係東岸……紐約？波士頓？定係……」

我深深歎了一口氣︰
「咁都叫消息？女俠，你咪玩我啦。」
「肯定入咗大學都唔算係消息？你要求都幾高架喎。」
「佢入唔到大學先係消息呀……其實你個消息點嚟？係咪有人仲同佢有聯絡？如果有，不如問佢拎個聯絡方法仲簡單啦？」

Michelle托著下巴︰
「你諗得太簡單啦，線人都要養嘅。我同嗰個人又唔熟，仲要問人拎咁多嘢，人哋以為我有咩居心添……」
「咁又係呀。如果我第一次去你學校嗰日就問你，你都唔會答我啦。」
「……你係話，送筆畀我嗰一次？」
「咪嗰次囉，仲畀你打咗兩巴添！講起都痛呀真係。」



我裝模作樣地捂著臉頰開玩笑，心中猜著她究竟會笑還是會加碼打多我兩巴。
沒想到我猜的全錯了，她只是用認真的大眼睛盯著我︰
「嗰日……你，去咗物理室……唔係，應該話……你、你係叫阿Bi帶你去物理室嘅？」
「係呀，之後就遇到Ms Tiger，我同阿Bi匿埋，然後就畀你打喇。記起未？」

Michelle有一個不自覺的小動作，就是每次當她用腦時都會抿嘴。
這次，她抿著嘴很久，才緩緩說︰
「嗯，原來係咁……嗯嗯，我全部都記起晒啦。」
「喂，你……做乜你講嘢好似怪怪地咁？」

「唔係啊，只係啱啱諗起有份assignment唔記得做……總之呢，嗰件事我會幫你幫到底，契哥，你放心啦。」
說到「契哥」兩個字時，她輕抓我的手臂對我微笑，令我不由自主地覺得安心。
是啊，有這麼聰明的契妹幫我，我肯定很快就能找回華小姐吧？



想到這裡，就覺得自己這段時間跟Michelle和Abby建立的情誼太值得了！

.

然而，一直到聖誕假之前一星期，Michelle都再沒新消息。
我猶豫了好久，但想到放假時更難打聽消息，還是催了她一下︰
「呀係呢……最近，有冇收到乜嘢風咁呀？」
「我有幫你留意架，不過真係暫時都未有。我哋放假之前科科都要test，就算我想去問，隔離班同學都冇咁好心情理我。」
Abby也在一旁和應︰
「哥～你唔好迫阿Mi啦～佢真係好上心架，成日喺學校都有意無意提起囉～」

這時阿堅去完廁所回來，問我們聊什麼聊得這麼熱烈？
Abby雙眼骨碌碌地轉，舉起手指笑說︰
「我哋講緊呢～一世人一次嘅18歲聖誕節，冇理由淨係溫書嘅～今次我哋一定要4個人搵啲嘢玩～！」
Michelle也在一旁點頭附和。



我以為Michelle被鬼上身︰
「吓？但係3月就開考啦喎！仲有阿Mi，你唔使去幫人補習咩？錢喎！係搵錢好機會喎！」
「3月尾先考啊……而且，我啲學生去晒旅行啦，去歐洲過白色聖誕，去澳洲過海灘聖誕，一係去北海道……」
「得喇唔使再講。但我都係覺得應該plan好咗溫書先，不如我哋定咗要做幾多年pastpaper先呀？」

Abby以恐怖的眼神打量我，我知道在這場合仍會支持我的人只有一個，但我又不想向他求助。
沒想到阿堅卻彷彿知道我心思，馬上撲出來降火︰
「其實假期好長啊，又溫書又玩都得啊。」
「好呀，既然你咁講～咁我哋玩又好溫書又好，成個假期都要一齊過架啦～」

阿堅和Michelle都聽話地點頭，最後Abby以死光眼盯著我︰
「哥～？」
「講明先，我只係同你哋一齊溫書架咋！」
「得～溫書咪溫書囉～哈～」
Abby的笑容絕對有古怪。

.

結果，早就說好要溫書的聖誕假第一天，四人剛碰面Abby就說︰
「今朝呢～我同佢去平時間麥當當睇過啦～唉，一早畀附近啲友校坐滿晒囉～咁就，冇辦法啦～我哋轉場去玩囉～！」


.
by又曦
like Page追看最新章節︰http://bit.ly/2jHymHF