✏️(結局篇已出書)陪朋友去自修室追女神，點知女神鍾意咗我【自修室】【補習社】【時光機】網店有售: 補習社篇 #25

#25
我接過來，只見文件夾裡有一張學校常見的B4單張︰
「2007-08 Psyche Girls’ College
Cycle 12 Assembly
Topic︰Studing overseas」
正想抱怨給我看其他學校的通知幹什麼，我的目光突然被底部一行字抓住︰
「Guest speaker︰……，Wah Chi Yan (Alumni)，……」
 
...................................................................................
.《自修室》小說已登錄各大書店


. 全新特別篇及修改內容
. 華小姐派必讀
. 死忠華小姐派建議人手一本 <3
....................................................................................
 
我忍不住抓緊阿堅肩膀大叫︰
「07至08學年咪即係今年囉？Alumni係咩……是旦啦！你、你係點拎到呢張嘢嘅？」
「你冷靜啲聽我慢慢講……嗰日喺麥當當，你咪追咗出去嘅？其實我……我都覺得嗰個係子……係華同學嚟。」
「妖！咁我嗰陣問你，你又講到我思覺失調咁？」
 


他托了托眼鏡︰
「因為打電話畀你嗰時，阿Bi望實我……」
「有異性冇人性得你……喂，講返張紙先！Cycle 12 Assembly即係咩呀？」
「你畀我順時序咁講啦。嗰日你追出去，其實阿Bi佢哋冇講啲咩。咁冇耐阿Bi話要上我屋企玩，Michelle就話拎返啲嘢畀你……後嚟聽阿Bi講你搵唔到佢，我諗住件事告一段落啦。」
 
「呀你……你想知我搵唔搵到華小姐，點解唔自己打個電話畀我呢？」
「嗰陣我……我淨係諗緊點叫阿Bi做我女朋友……諗唔到其他嘢……」
看阿堅那張比日式章魚更紅的臉，我狠狠地鄙視他。
對華小姐的忠誠才這種程度，當年竟敢來和我爭？
 


.
 
阿堅似乎也看穿了我的心思，嚥了嚥口水︰
「頭先講到……係，咁到平安夜嗰晚我終於表白咗，然後阿Bi就……」
「可以講返張紙未？」
「而家就講到啦！有一晚阿Bi突然間講返你走咗嗰日嘅事，仲話︰『哈，估唔到呢～阿翔個夢中情人近睇有少少似阿Mi喎～你覺唔覺～？』咁我覺得怪怪哋，點解咁強調近睇……」
 
他頓了頓，再次拿起那單張︰
「然後第二日去阿Bi屋企嘅時候，就喺佢書檯啲雜物入面見到呢樣嘢。」
「你嘅意思係……」
「阿Bi學校用cycle制，呢幾日係cycle13。所以cycle12，應該係放聖誕假之前。」
 
我腦裡如有電流閃過︰
「即係話，華小姐佢……一早返咗去佢母校……？」
阿堅點點頭︰


「冇錯，雖然只係我嘅推測……周會嘅話，阿Bi同Michelle都一定要參加，亦都會遠望到佢……所以阿Bi先會話近睇點點點。」
 
單張上雖然沒寫上日期，但阿堅說的話確是最有可能的推想。
我手微微抖動，多少想法在我腦中此起彼落，最後統統變成憤怒。
「阿堅，張嘢借畀我！」
我掐緊那張紙，轉身就衝下樓梯。
 
背後阿堅還在叫嚷︰
「喂！記得唔好話畀阿Bi知係我報串喎！」
「得啦，女奴！」
 
.
 
雖然立刻想跑到Michelle學校找她對質，但她學校出名連雄性蒼蠅都飛不進去，現在過去也沒意思。
阿堅回到課室看到我還在，重重地鬆了一口氣。


冷靜思考過後，我決定要保障線人阿堅的周全，所以今天必須不動聲色。
那單張一看就是學校內部物品，我必須先想一個天衣無縫的謊言去解釋它的來歷。
 
正竭力編著故事，記憶中的Michelle卻不斷跑出來干擾我的思路。
那天我追著華小姐跑時，她明明表現得那麼幫我……
『唔使唔好意思喎，契哥。我簽咗約，講明點都會幫你搵到佢為止架嘛。』
 
甚至在寒風之中跑回來出謀獻策……
『我一諗到就即刻跑過嚟啦！華子昕個姓氏咁特別，呢楝樓個管理員一定記得架嘛。我話係佢同學，問下佢返咗屋企未，咁你咪唔使喺度白等囉！』
 
但是……這一切全是騙我的嗎？
事實上，她早在放聖誕假之前就在學校見過華小姐？
就算她認不出華小姐的臉，在周會聽到名字也肯定知道這就是我的華小姐啊。
 
她，明知道這是我一直在找的人啊。


她，明知道我最緊張的就是華小姐的下落啊。
明知如此，為什麼卻要暪著我？
 
我還記得在放假前，我也曾經追問過Michelle一次。
她一臉平靜︰
『我有幫你留意架，不過真係暫時都未有。我哋放假之前科科都要test，就算我想去問，隔離班同學都冇咁好心情理我。』
 
當時她笑得那麼溫柔，事實上，她已經上過周會了嗎？
她已經知道華小姐回來了，所以故意讓我乾著急？
她在心底裡，是不是為自己整了我一道而竊喜？
 
其實我早就猜上次去她們學校時差點被抓住，是Michelle背後搞鬼。
雖然我不太記得小學時的事，但我感覺到她討厭我。
只是，我一直以為經歷過Abby的事後，我們已經建立起友誼。
 


為什麼，卻要在我最重視的大事上，狠狠地摔我一交？就因為討厭小學時的我？
我們之間的友誼，一直都是虛假的嗎？
 
.
 
這天老師說的話我一句都聽不進去，只是翻來覆去想著Michelle的事，然後心底湧起一陣陣寒意。
好不容易等到下課，我馬上叫阿堅一起去補習社。
 
阿堅還在囉嗦地重覆千萬不要供出他，我便和盤托出我的計劃︰
去到補習社我會隨便挑一個全心女生，把她的筆記撞到地上，然後再幫她把東西撿起。
那周會單張就當是那時撿到的好了。
 
阿堅認真地讚我︰
「阿翔，喺講大話呢方面，你真係想像力同行動力超群啊。」
「傻啦！講大話呢味嘢，我哋幾時夠啲女人嚟？」
 
說話間兩女正好推門進來，我們連忙閉嘴，極力裝出自然的表情。
但不得不說，Abby和Michelle的神態完全渾然天成，彷彿從來沒有騙過我們。
也許，她們兩個才是影后吧？
 
.
 
這天補習時我雖然很努力演戲，但不知是否心理作用，眼尖的Michelle似乎察覺到我心不在焉。
幸好她們剛進課室不久我已經撞跌了某人的筆記，應該勉強可以連戲吧？
 
我拼命抑壓著心跳，等到補完習去吃東西，Abby竟然還要挑這天公開戀情，真是急得我如熱鍋上的螞蟻。
一大輪無意義的閒聊和祝福之後，阿堅終於很幫忙地去送Abby回家，而我和Michelle則像以往那樣結伴走去地鐵站。
 
我正蘊釀著應該怎樣丟出那張紙來質問她時，只見她兩手合在胸前，一臉悠然神往︰
「呵……佢哋終於正式一齊啦，真係好。」
「唔……係呀……」
「契哥你記唔記得？阿Bi生日嗰時，我哋做咗幾多手腳先令佢哋分埋同一組！」
「記、記得……」
 
「嗯？你今日做咩？好似心事重重咁嘅？」
本來我想跟她走到公園才慢慢談，但她突然這樣說，我再也忍不住︰
「阿Mi，我……我有啲嘢想問清楚你……」
她的大眼睛凝視著我，臉上泛起了淡淡粉紅︰
「……係？係咩事……？」
 
.
by又曦
like Page追看最新章節︰http://bit.ly/2jHymHF