我只不過喺自修室溫書，點知比我遇番佢。: <八>逃

第二日我將個rundown俾佢地睇，佢地睇完都話好掂。

「嘩廢紙，個medley真係你諗架？啲歌揀得好好喎。」阿豪講。

「確實唔錯，有曬起承轉合。」阿言講。

經過一番商討，我地首先決定咗人選。

鋼琴絕對係阿言嘅囊中物。上次隨手彈首約定都繞樑三日。



鼓手係阿堅，BASS同結他係子妮同阿揚。

小霖同阿月，我同詠詩會負責主音而其他就係和音。

「你肯定要咁安排？」我問阿言。

「係！」佢都好堅定。

由於我地級個比賽係得一級參加，所以時間上比較充裕。係獨唱環節完咗之後，每班至多有8分鐘表演時間。用盡啲時間都唔代表好，因為仲容易會亂同埋做得唔好會好悶。



係禮拜六，我地約咗出去練。我地去咗阿豪舅父嘅BAND房練習。凡果到地方好闊落，係練習嘅好地方。

「一追再追，只想追趕生命裏一分一秒..」琴聲緩緩奏起，阿言配合住琴聲唱起《追》。果然係才子呀。呢一刻嘅阿言真係好迷人。

「一追再追，追縱一些生活最基本需要..」之後阿月仲加入埋合唱，變成一幅好美麗嘅畫面，在場嘅人都聽到如痴如醉。

「有了你即使平凡卻 最重要。」最後呢句由小霖唱出，平淡得黎又不失光彩嘅歌聲，令到第一首歌華麗收尾。呢啲就係學霸之間嘅默契？只係第一次練就已經練好一首歌。

不過接下來就輪到我了。我一路行去Mic Stand，個心一直砰砰跳。仿佛世界都得翻我嘅心跳聲。我握到個拳頭實一實，神經都繃到十分緊。
 


「開始啦。」
 
為何能呼吸這麼好
 
「你黎睇我比賽好冇？」
 
能同享多一個清早
 
「好呀，你唱我一定黎支持你！」
 
誰還有入夜才共舞
 
「醒呀！你唔好離開我呀！」
 
你令我記得 我也要傾訴


 
「對唔住！」
「對唔住！」
「對唔住！」
.
.
 
「夠啦！唔好再逼我唱啦！」
 
我奪門而出，我唔記得我係條街到跑咗幾耐，總之淨係想離開band房，離開我嘅回憶。
 
當我跑到攰果陣我見到架的士，我諗都冇諗就沖咗上去。
 
翻到屋企，唔知點解果種不安感仍然未散退，我好想發泄。果一刻，我淨係諗到一個地方，我淨係諗起佢。
 


我著番鞋，諗住出門口。
 
「啱啱翻黎又去邊呀？」我阿媽問。
 
「我落自修室之麻！」
.
.

喺Band房入面..

「阿楓佢做咩..啊？」子妮唔知道發生咩事，好愕然咁問。

「殊，唔好出聲。」阿星示意佢。

「你而加打算點？」阿月問阿言。



「等佢冷靜下，可能佢未習慣先會咁。」

「你肯定咁樣做真係為佢好？」

「你諗下啦阿月，除咗件事發生果日，你幾時見佢為咗呢件事喊過？佢一直都係死頂炸，如果唔俾佢克服嘅話，佢成世都會活喺恐懼架炸。」阿星講。
呢個時候，小霖突然沖咗出去..
.
.
我落到會所之後，即刻行去自修室。行到入去之後四周圍望，但係都唔見佢。突然有一絲嘅失望，之後我行落去休息區諗住靜下，經過洗手間果陣..

「傻佬，今日咁晏先落黎嘅？」小涼咁啱喺洗手間出黎。

咦！？點解佢又會喺到嘅。



「點解你係到嘅，明明係上面唔見你？」我問。

「頭先上面冇曬位呀，所以就落咗黎溫。」

「等陣先..做咩咁留意我呀？」

「邊…邊有姐，我見唔到你不知幾開心。」

「噢..係呀？咁我走架啦。哈哈。」

「喂等陣，可唔可以陪我傾陣？」

「都feel到你有唔妥架啦，行啦，你唔係想係個廁所門口講呀？」

我地翻咗去小涼坐開果個位，之後我就將今日Band房嘅事話咗俾佢聽。

「你心病都好重喎，究竟之前發生過咩事？」

「你係純粹八掛炸？」

「超，你咁唔好講囉，我只係想幫你，估唔到你咁睇我！」佢愣開臉，好似真係嬲咗咁。

「好啦好啦,我講啦。」