呢日,我地齊集咗喺西貢,為嘅就係參與一個高峰會議。
.
.
.
講笑姐,過多陣,我地就會去到阿王屋企BBQ,慶祝之前嬴果個歌唱比賽。

「HI大家,你地係咪郭SIR啲學生呀?」有把好好聽嘅聲音講起野,嘩,把聲咁好J嘅,等陣…

WTF係表姐呀!!!!唔怪得啦。



「係呀係呀!」阿揚突然好似隻狗咁衝上前講,爭在未伸埋脷。

阿揚係全班出曬名嘅淫蟲,成日講埋啲有味笑話,我地都見慣不怪。但係今次唔同!

「死開啦,你惹唔起架啦!」阿豪好醒咁拉走咗佢。

「咦,表姐,點解你係到嘅?郭SIR呢?」阿月問。

「吓,表姐? !」成班嘩然。



「指意果舊飯一個搞曬啲野你地天黑都未燒得。」表姐所言甚是,所言甚是。

「我頭先落惠康買野咪順便黎接你地囉,橫點見到你地幾個都唔會認錯架啦。」

「喂死仔,仲唔過黎幫我拎野?想重死我呀?」

「死仔?!」佢地又再嘩多次。

個死仔梗係講我啦,仲有邊個,唉。



「我幫你拎啲啦。」咁善解人意嘅梗係小霖啦xd

現場,除咗我地幾個知情者,就留下咗一堆問號俾其他同學。見到佢地一頭霧水個樣真係諗番起都好笑XD。

「咦,你地黎啦?」阿王開門迎接我地。

見到佢圍住條HelloKitty圍裙真係好好笑,雖然佢平時已經冇咩形象淨。

「嘩郭SIR你屋企好大呀。」阿星同子妮入到去就講。

佢同表姐遲啲就係住係到啦..我四周圍打量。

「你地想打機果到有PS3,想打麻將呀鋤D果啲就自己拎,自己招呼自己啦,我仲要腌埋啲雞翼。」阿王同我地講。佢呢刻真係成個家庭主夫咁。

「我換件衫再過黎幫你手啦。」表姐講。好一個準賢妻呀。睇見都幸福。



我同阿言入廚房睇下有咩可以幫下阿王。

「醃得有板有眼喎。」我笑佢。

「梗係啦,唔係你以為我淨係識教書呀?」

「聽講你教書都唔係好好炸喎,我啲數仲係咁差!」

「超,關咩事,又唔見我係咁。」阿言串我。

「收皮啦學霸,邊個教你都係咁勁架啦。」

「咁唔通我分唔到邊個真係識邊個唔識咩?郭SIR真係教得好,係你天資差。」



「好啦好啦,唔好拗啦,阿楓其實我都想搵你傾下,我發覺你啲數唔係差,但係就成日錯埋啲大意野。」

「我知我果套未必適合你,但係都想盡量幫下你,我都唔忍心睇到你因為數學而拉低成績。如果唔係我無論係數學老師定班主任,什或至表姐夫呢個角色都難辭其咎。」死啦,突然覺得佢好MAN添。

「你表姐真係執到支好籌。」阿言講。

「做咩呀,邊個係到講我呀?」

「嘩操,阿言你先同表姐有親呀?2個都咁神出鬼沒嘅。」
.
.
.


「可以黎燒啦!」阿王一聲令下,個個就好似燕歸巢咁,捕實個燒烤爐。



「我要燒腸!」

「我要燒雞翼尖!」

一開波,個個就好似餓鬼上身咁,爭到好似七國分地盤咁。

燒到咁上下,阿王就開始講野。

「好啦,今日嘅目的就係慶祝我地班贏咗個比賽啦,呢2個禮拜大家都辛苦啦。今晚盡情食,盡情玩!黎,飲杯先!」

「飲杯!」齊聲喧嘩。

「除此之外呢,係要同你地宣佈一件事嘅。



終於要來了嗎..

「就係我同你地身旁嘅呢位,即係阿楓嘅表姐,就黎結婚啦!所以就誠邀你地黎觀禮嘅。」

「WOW!!」個個都拍曬手叫曬囂咁助興。

「原來阿楓有個咁靚嘅表姐,點解阿楓又...」阿堅講。

「收聲啦!妖!」

「你地果日早啲黎啦,我表弟會通知番你地詳情架啦。」表姐講。

「小霖,可唔可以幫我拎罐啤酒?」我問。

「仲飲呀你,第四罐啦喎?」

「高興呀麻!」

確實,果晚真係玩得好開心,個個都打成一片。連表姐同阿王都玩埋一份。或者因為佢地2個都係我屋企人,所以唔會有啲咩隔膜,令到我更覺得呢個團體好溫暖。

一個好嘅班主任真係可以好好咁提升一班嘅團結。呢樣野阿王無可否認做得好好。佢令平時COOL到死嘅阿言都願意放低身段同我地玩餐飽。

但係呢啲日子真係只會發生喺學生年代。出到社會,根本唔會有咁大班人同你一齊玩,一齊癲。好多謝阿王為我地留下一個咁美好嘅回憶。

「今晚個個都玩得好開心呀可?嘻嘻」翻屋企果陣,我問小霖。得佢同我同路。

「都叫你唔好飲咁多啦,你醉啦。」

「我邊有醉姐?」

「冇你又係到傻笑?」

「我..冇...」我記憶中最後嘅畫面就係訓咗落小霖嘅膊頭。

而第二朝起身,我已經喺屋企張梳化。

一坐起身,個頭勁痛,仲暈下暈下咁。

「你醒啦?」阿媽問。

「衰仔,唔飲得又學人飲,搞到尋晚不省人事咁。」

「咁我點解⋯」

「多得阿霖送你翻黎炸!你自己牛高馬大,抬得人幾辛苦。」

「呢個女仔真係唔話得,咁辛苦抬你個衰仔翻黎之後仲幫你敷埋熱毛巾先走都冇怨言,你好去多謝番人添呀!」

聽完之後都搞到我有啲內疚,真係要好好多謝佢先得。

我即刻拎部電話出黎打俾小霖

「喂,小霖?尋晚唔該曬!」

「你醒啦?」

「茶几放咗粒頭痛藥,你送水食啦。」

佢真係好貼心。

「好呀!係喎,阿媽話今晚煮餐飯多謝你,你過黎食啦。」

「唔洗啦,咁勞煩auntie。」

「你唔黎佢都會煮架啦。」

「咁好啦..」

「咁我地落自修室溫陣書再上黎食啦,我想你教下我啲數。」

「嗯,自修室見。」

收咗線之後,我就去刷牙,刷完牙之後就見到小涼ig direct我:「去唔去自修室呀?」

「去啊!」我答。

之後我好後悔果陣咁口響...