我諗住都係同一個地方溫書,可以順便俾佢地認識下對方,當識多個朋友嘛,所以都冇因為一個而推咗第二個。

「阿楓,呢到啊。」我落到自修室就見到小涼,佢細細聲嗌我。我冇同佢講我花名,反正呢啲名真係唔提都罷。

「咁早嘅你?」

「我聽日有Econ quiz啊,所以早啲落黎溫,順便有咩唔識可以問你啊嘛。」

「咁你溫到邊?」



「溫緊啲inflation 囉,做極啲CPI都係錯。」

「哦~呢啲好易姐,首先你要清楚base year 同current year個price index..」

我一路教佢就一路似懂非懂咁點頭,都唔知佢係咪真係明,不過見佢冇特別野問我就當佢真係明。

後來見佢再做多幾題都啱,咁就應該真係明啦。

「好嘢,我識啦,阿楓你好勁啊!」



「殊,細聲啲啦。」

「係喎,哈哈。」

其實我生平最憎嘅係果啲嗲聲嗲氣,懶係可愛果啲偽女神。

但係小涼把聲完全唔係呢種,所以當佢讚我同埋扮傻果陣嘅語氣完全係我杯茶,淨係J把聲都有排J...

我要澄清我冇咁變態,打個譬如姐。



呢個時候,小霖都落到黎了。

我向住佢猛咁揮手,我驚佢睇唔到我地。佢見到我地果陣,又係先有啲愕然 (可以睇翻<六>果篇就會明。),即使好快又帶住微笑行過黎,都令我覺得個笑容好牽強。
 
佢坐低之後我突然feel到個氣氛有啲尷尬,所以就即刻介紹佢地俾對方識。
 
「哈哈,你地未識呀可?佢係...」
 
「巴渣妹呀麻,阿楓成日講起你。」
 
小涼突然睥咗我一眼,好似好唔滿意我周圍叫佢做巴渣妹咁。
 
「哈哈..之前未知你個名呀麻..」嚇得我騰..騰..震..啊..
 
「哈哈,唔洗理個傻佬啦,我叫小涼呀!你好!係呢,未知你叫..?」


 
小涼呢招高呀!先黎嗌我聲傻佬,以顯得同我經已好熟,再扮唔知小霖嘅存在,等如話俾小霖聽我從來冇提過佢。
 
包大人!伸冤呀!我有提過小霖架!
 
「我叫小霖呀。係阿楓個'好''朋''友'。」小霖特登拉長最後幾個音,聰明嘅你地
都明咩意思。
 
包大人...我暈啦。
 
小涼主動伸出手,之後佢地握起手。喺果一息間,我感覺到一陣嘅風起雲湧,好似要將我嘅理智捲走咁。
 
佢地一直都係笑住,係笑住架!我終於體會到笑裡藏刀嘅威力,仲厲害過虎頭鍘。
 
包大人你都係殺咗我罷啦。


 
「哈哈..大家識咗就好啦..溫書啦..溫書啦..哈哈。」請原諒我嘅無能,鬼唔望可以好似包龍星咁能言善辯咩。
但係當下除咗笑我都唔知點樣黎舒緩我嘅老尷。
 
但係原來頭先果啲先係序幕。
 
喺接下來嘅兩個鐘,我完全體會到當初劉華係點樣2間戲院周圍走。下?咁都唔知我講咩?你地冇睇過「最佳損友」架?
 
「費子楓你咪要我教你數?坐過黎啦。」

「你想學咩?」

「我啲Trigo好弱,完全唔知點做。」

「Trigo你首先要學識點樣用sine formula同cosine formula啦,之後就..」



對我黎講,數學就好似數碼世界咁,係好危險嘅地方,個個topic都好似吸血魔獸咁。

「你試下做呢幾題啦,唔識再問我。」

隔咗一陣...

「阿楓,點解呢題個答案係Gold好過Silver做錢嘅?」

「因為.......」

「我聽得唔太清楚呀,不如你坐翻過黎講啊。」

於是我又坐翻過去講咗一大輪,因為小涼一次過又問咗幾條問題。



搞到我都有啲亂,所以啲數亂咁做完之後就俾番小霖對。

「錯咗好多呀..費子楓,係咪我解釋得唔太清楚呀?你過黎我再講一次俾你聽啦。」

又隔咗一陣..

「阿楓呀...」OH SHIT!!

今日問題如不盡,像處圈中圈,了斷也了不斷。」

嗯,唔該曬EASON ,你可以休息下啦。

根本是心聲啊。

「好啦,我係時候翻去食飯啦,得閒再一齊溫書啦。」小霖講。

佢指一啲書,再同我打一打眼色就走咗。佢意思應該係將啲書放番佢屋企再去我屋企。

佢走咗,就代表我應該折騰完了。點解溫個書好似仲辛苦過耕田咁,但係其實我好似冇咩收穫。

「阿楓,點解你好似咁攰咁嘅?」

「冇啊,唔係啊,可能尋晚唔夠瞓姐。」真係問得好啊。

「其實我知道頭先係搞到你好辛苦架啦,但係唔知點解我頭先我有一種好久違嘅感覺,所以先...」

「久違嘅感覺?」

「我...di..di..唔好意思。」佢電話突然響,出咗去講電話。

「唔好意思呀,我要翻去食飯啦,下次再講啦,拜拜。」

個自修室突然變得好靜,明明頭先好嚮往呢種寧靜,而家就有啲唔慣。

不過算啦,都係時候走。

「你番黎啦?」係小霖。

「衰仔咁遲翻架,要人地霖霖等你咁耐,洗個手幫手開飯啦。」

「得啦,Auntie,我開得啦,佢今日應該好攰架啦。」

我一行去廁所,老豆咁啱又係廁所出黎。

「嘩屌,好心你著番件衫啦,你想你啲蛇貓鳳俾人睇曬咩。」我係講緊佢啲紋身。

「哈哈係喎,我都唔記得添,幫我拎件衫啦,一陣嚇親新抱仔就唔好。」

「妖!」

食飯果陣,又係一場嘅攻防戰。

「點呀,霖霖,啲餸啱唔啱胃口呀?」

「啱呀,好好食!」

「啦人地都話好好食,你兩父子仲成日嫌三嫌四。」

「呵呵呵!」你笑乜春姐老豆。

「唔係呀,阿楓成日係我面前都讚你啲手勢架。」

「佢個衰仔有咁好心?佢呀,成日都搞到我咁激氣。你得閒幫我管下佢啱架啦。」

「媽呀..」

「呵呵呵!」你又笑乜春姐老豆?

「佢平時係貪玩啲姐,其實個人都唔差嘅。」講完之後佢面頰都有啲紅。

「係啦,玩啦麻,玩到冇曬心機讀書,啲數學呀,黎黎去去都咁差。」

「媽呀!食飯啦。」

「呵呵呵!」我忍夠你啦死老嘢!

「我會幫手教佢啲數架啦,郭SIR都會幫佢。」

我承認呢場仗我輸咗,仲好徹底。

食完飯我就翻咗房溫數,做咗成日都係果啲數,都係唔識做。

「都估到你唔識做啦,晏就咁樣騰黎騰去。」

「你仲好講?」

「其實你Feel唔到..果個小涼對你有啲意思架咩?」

「點會呀?傻架咩。」

「唔係今日就唔會..」

「唔會咩?」

「冇野啦,做數啦,我教多你一次啦。」

今次教完之後,真係明咗好多,原來都好似真係唔太難。

「夜啦,我走啦,有咩唔明whatsapp我啦。」

「我送你啦。」

「唔洗啦,咁近。細個我都係自己走架啦。」

「係喎可,咁你自己小心啲啦。」

「嗯!」

「err..小霖!」

「吓?」

「呢2日..多謝你。」

「聽日見啦!」佢嫣然一笑,轉身就走。微微一笑真係很傾城架!

撻落床之後,我好快就瞓著。梗係啦,一日打2場仗,老虎都變老鼠啦!各位睇故嘅都早抖啦!