我只不過喺自修室溫書，點知比我遇番佢。: <十五> 忘了愛

「唉屌，又唔知醒！」

我又用我多年來苦練嘅飛翔境界勁快咁刷好牙換好衫就落樓。不過今次好彩唔洗爭的士。

「阿楓早晨！你氣都喘曬嘅，又唔知醒啦？」我去到巴士站嘅時候小涼仲等緊車。

「係呀，遲咗10分鐘起身，算遲得少架啦。」

「咁你咪未食早餐囉？」



「梗係未啦，諗住翻小食部先再買。」

「你唔餓咩？」

「餓都冇辦法啦。」

「喇，俾你啦！」係最愛嘅魚柳包！

「嘩正呀！」我抵制唔住心中嘅喜悅，不過冷靜落黎之後再問佢，



「你俾咗我你咪冇得食？」

「我食咗塊薯餅架啦，你肚餓就頂住先啦，我都可以翻小賣部買架姐。」

「呃係啦！你拎轉身呀！」佢突然叫。

「做咩？」

「你拎咗先啦。」



咁我唯有照做。隔咗幾秒之後佢又話可以拎番轉，但係我完全感覺唔到佢做過咩黎。

「好啦，巴士黎啦，今晚見啦。」

「拜拜！」

我等多幾分鐘，我架巴士都到咗，當我上咗車坐好之後，將個書包放係前面。

先發覺原來個傻婆放咗支水喺我書包執邊個袋。

「就咁食包好乾架，睇你都冇帶水架啦。」佢whatsapp我。

「傻架咩你，咁你咪冇得飲？」

「你估我喺荒島讀書咩！都話有小食部。」



「係喎哈哈。咁真係唔該曬啦，估唔到你個巴渣妹都幾細心。」

「唔好再叫我巴渣妹呀，衰人！」

「咁之前見你真係巴巴渣渣咁。」

「你再講今晚就知死！」

「小氣。」

「點解你仲可以咁有精力，明明尋晚溫Quiz溫到咁夜。」

「我青春呀麻，好似你咁咩成日無厘精神又唔知醒。」



是咁的，話說尋晚我沖完涼之後，見到佢又有野問我，佢仲喺到溫緊今日個Econ Quiz，但係direct send嘅相size有限，佢影唔曬條題目俾我睇，於是我就叫佢whatsapp
俾我，所以我就成功咁抄咗佢牌，嘻嘻。

就係咁，我地喺whatsapp 講下啲無謂野又搭咗一程，呢一程巴士好似比往時嘅短。

「呼，好彩趕得切姐。」一入到課室就打起鐘。

「早晨啊咁多位！」

「點呀楓哥，乜咁風騷啊？」阿星問。

「肯定係搞點咗個自修室妹啦。」阿豪講。

「痴線啦，friend黎炸。你都唔知我尋日幾...」我突然望到小霖，都係唔講咁多，費時俾佢鬧。



「幾咩呀？」

「幾...勁呀。竟然搞掂咗啲3D喎！」

「車！」佢地一見冇花生食就散曬。 你地睇下人類係幾咁現實。

我對住小霖好尷尬咁傻笑，佢回我一個無奈嘅微笑。

「係咩，咁勁呀？搞點咗3D添呀？咁冇野難到你啦喎」阿王入到黎課室就講。

我突然有啲極之極之不祥嘅預感...

「既然係咁，為咗應付大考，下星期一測驗，內容係今年教過嘅範圍！比足一個禮拜時間你地溫，比心機啦。」

Fuck...!



「阿郭sir啊，你可唔可以轉一轉身對住黑板？」阿星問。

「噢，好呀。」點解呢個人一啲戒心都冇= =佢地擺明要...

係咪衰呢阿王你，引起公憤啦

咦咪住，點解佢地全部都係「嗱」我架？！

「費子楓你真係當我傻架，啦各位同學我頭先咩都睇唔到，你地見證架。」 阿王你好野！
 
小息果陣，阿豪突然好心急咁衝入黎講。

「大件事，大件事！阿晴好似同個男仔一齊咗，仲要係C班果個阿Roy!」

我地不期然將個目光轉移到去阿言到。

「關我咩事，佢有啲新生活都好正常。」阿言好冷淡咁講。

「但係你明明仲...」小霖講。

「過去的就讓它過去 曾經畢竟只是曾經。」

妖，扮咩忘了愛姐。

「總之佢嘅野唔再關我事，我地都唔好理人咁多。」之後佢就借啲意走開咗。

「唉，真係可惜。」我感歎。

「你同天蕊可惜啲～」佢地異口同聲咁講。

「你班契弟呀！」

放學我地去咗星矢吧，點知爭啲攤上大事..