我只不過喺自修室溫書，點知比我遇番佢。: <二十>阿晴與阿言

「阿楓，你有冇諗過贏個比賽？」有日放學阿言問我。

「都有嘅，當係再為班爭光。你呢？」

「有。我唔止要贏個比賽，仲要..」

「贏番阿晴係咪？」

「哈，從來都係我睇得透人，估唔到今次俾你睇穿我。」



「我知你仲鍾意佢架。上次見你救佢就知。」

「一直以黎，佢係唯一一個唔怕我嘅人，得佢先會反抗我。所以先令我對呢個女仔有興趣，令我好想征服佢。」

「但係慢慢相處落，我發覺佢嘅善良，同埋當佢為我著緊嘅時候仲吸引我，令我慢慢真係鍾意佢。」

「佢冇一科勁過我，唯獨係數學有得同我比較下，所以我永遠都會扮炒咗最後一題，令佢高分過我，當係哄佢開心又好，又或者令佢對讀書唔好冇曬信心。」唔怪得明明數學好勁，但係佢永遠數學都係第二啦。(如果疑惑可以睇番第2章)

「有咩野我都會問過佢，我知道得佢先會同我講出我每一個選擇有啲咩問題，佢就好似係我嘅明燈，指引我人生嘅明燈。」



「我好後悔當初冇聽佢解釋，我後來聽小霖講番原來佢果晚係想同個男仔講清楚，但係又唔想當聚落個男仔面先希望私底下解決，佢就係咁為人著想。點知個垃圾一聽到阿晴肯同佢食飯就興奮到周圍唱，所以我先咁嬲，仲講出以後大家互不相干呢啲咁不負責任嘅說話。」

我第一次聽阿言講咁多野，從來佢有咩事都係自己頂，從來唔洗我地干預，可能今次真係要靠我地幫手。

「你都係緊張佢姐，所以先咁唔理智。」

「放心啦，我地會幫你手贏個獎番黎，仲贏番阿晴對你嘅信心！」

「多謝呀，兄弟。」喺夕陽下，我地碰拳，簡單嘅一個動作，卻蘊含住男人之間嘅承諾。



自從開始準備班籃，每日我都會抽多一個鐘去屋苑個籃球場練波。

務求可以喺比賽果陣發揮得最好。

我係果啲懶得去做，但係一做就想做到最好嘅人。我都希望可以贏到個冠軍，當係幫阿言追番阿晴。

喺屋苑打有個好處就係可以同唔同嘅人鬥波，從而吸收更多唔同嘅經驗。

當然，打完波之後都會落去自修室溫書，唔可以荒廢學業加麻。除咗經濟之外，我另一個選修科就係會計，但係我冇咩放時間落去溫過。

「終於捨得溫accounting啦？」小涼問我。

「而家先溫都夠做啦。」

「牙刷刷咁，黎近個大考鬥高分呃，輸咗請食飯。」小涼都有讀呢科。換言之我地6科都一樣。



「咁你準備定錢都得啦。」對於呢科，我都有一定嘅信心。

「你練波練成點呀？」

「都幾好呀，都幾上手。」

「加油啦，支持你！」

「多謝啦，巴渣妹。」