我只不過喺自修室溫書，點知比我遇番佢。: <二十四>鬼打鬼
「你今日都攰啦，翻去好好休息啦，唔好落自修室啦。」小涼講。
之後我地就喺街口分別，我翻到去之後，沖完涼就攤落床瞓著咗。
去到第二朝，我見今日放假，所以就whatsapp問小涼一唔一齊食晏。
「我今日要翻學校幫手搞funfair啊！」
「係呀？！咁算啦。」
「你記得落自修室溫書啊，大考就黎啦！」
「收到巴大人！」
「巴你個頭！」
我是但食咗啲野就落咗自修室溫書，確實，籃球比賽之後就真係差不多大考。
我一落去就見到小霖。
「咁早就落到黎啦？」我問佢。
「就黎考試啦，仲唔溫咩。」
「你又啱，我試下今次數學可唔可以再考好啲先。」
「有野幫手就出聲。」
「我實會，唔會錫住你！你唔好嫌我煩就得。」
「我係嫌你煩晨早同你絕交啦。」
「小涼呢？冇落黎？」
「佢番咗學校幫手啊，今日應該唔會黎。」
唔知點解，今日嘅小霖好似比平時開朗，仲係由心而發嘅自然。
「我又唔係好識做呢題，個Locus應該係點？」
「佢地係perpendicular ，所以應該...」
成個過程唔知點解好和諧，和諧到有啲唔正常。
就咁就溫咗兩日書...
去到星期一，我知道我同阿月應該要講清楚。
「喂，阿楓！我有野問你啊。」我一入課室阿月就行過黎，啱曬，自己搵上門。
「想點啊你究竟？」
「我上次原來冇拎小涼電話，你可唔可以..」
「你喺到講乜春啊？要咩電話啊？」我一時大聲咗，令到好多人都望住我地。
「係你自己唔追佢咁我咪去馬囉，你咁緊張做 咩？」
「之前你未見過佢，你又話我唔可以鐘意佢，當你見到佢，你又話要追佢，一見鐘情都唔係咁呀？」
「同埋你同小霖講嘅野我都聽到，就算俾小霖聽到又點，你同我講清楚！」
佢好似一時俾我嚇窒咗，就講：「你俾就一句唔俾就兩句，唔好咁多爹！」
「唔撚俾！」
「好，咁咪撚俾。」之後佢就走咗去。
阿言行埋黎叫我坐低冷靜啲。
「你話阿月喺到做咩野？點解突然變到成隻狗公咁？」
「係囉，你話有冇可能呀？」阿言反問。
「冇...下？你話佢可能只係扮出黎嘅？」
佢冇答我，只係點頭默認。
「傾緊咩呀？」阿晴行咗入黎搵阿言，咁啱見到我地傾計。
「阿晴，你覺得一個人突然轉變咁大會有咩原因？」
「點轉先？」
「由個對愛情無欲無求嘅人變到成隻狗公咁。」
「下？咩事？」
我瞟一瞟阿言，示意問下佢講唔講好。 佢up一up頭。
之後我就講咗件事俾阿晴聽。
「嗯..咁奇怪？」
「你地有冇聽過阿月好似有個鐘意嘅人？」
「有呀，但係好似一直冇人知係邊個。」
「會唔會係因為阿月鐘意嘅人鐘意咗你...所以佢傻到希望追走個自修室女仔而...」
「而令到我可以鐘意佢鐘意嘅女仔？」
「可能係。」佢答。
「咁..關小霖咩事啊？」我再問。
「可能因為佢同小霖講過所以先搵小霖求助。」
「我覺得冇咁簡單。」阿言呢個時候講。
「點解？」我地都抱住個疑問。
「你地覺唔覺頭先你地喺到鬧交，有個人一直冇咩反應？」
.....阿豪？
「你係講阿豪？」我問。
「嗯，以往我地嘈交佢都係做和事佬果個，但係頭先佢竟然坐喺到咩行動都冇。」
「你講講下又係喎...」我都冇留意到呢點。
「我地去觀察下佢地兩個再算啦。」
呀！！點解會咁煩？前幾日我地幾個仲係好地地，點知無聲無息就搞到咁，究竟係發生咩事？
我地將對阿豪嘅顧慮變成一個秘密，所以佢仲未知我地對佢有所懷疑。
每當佢行埋黎同我地講嘢果陣，我地都感到佢有啲唔自然，好似喺到做緊戲咁。
「呃，阿豪，你睇到陳浩南由菲律賓翻黎果段未？」我有一次問佢。
「下..睇..睇咗啦。」
平時嘅佢，係一個超級漫畫迷，佢對所有睇過嘅漫畫情節唔會有記錯嘅時候。
一有人講錯，佢就會即刻糾正對方。
但係，陳浩南其實係喺老撾番黎，並唔係菲律賓，佢真係有啲問題。
佢愈唔自然，我就愈怕，我怕件事真係同佢有關，咁樣我可能會一次過冇咗兩個我最好嘅兄弟。
平時有親咩事，我都會同小霖講，問佢意見，但係今次我冇咁做，畢竟佢都係牽涉在內，令到我都唔知應該點開口。
但無論點都好，日子都總係要過，個大考都係一日一日咁逼近，我唔可以俾呢啲嘢擾亂。
其他科我都唔太擔心，都係得數學我先唔太掂。
「阿楓，可唔可以教我呢題？點解個Sales要加三十萬？」小涼喺到問緊我會計。
「睇下...你漏咗個Sales or return Basis啊。」
「咦，係喎，哈哈。」
唯有同佢一齊，我先可以唔諗其他嘢，盡情去溫書。喺佢面前，已經冇任何嘢需要我牽掛。
「你同你啲兄弟仲未和好啊？」佢溫溫下問我。
「未呀。而加每日番學都好似鬼打鬼咁，都唔知邊個真，邊個假。」
「阿言又有番阿晴，成日都糖痴豆咁。搞到我成日都係一個人。」
「小霖呢咁？」
「佢啊..表面上其實冇咩嘢嘅，但係一諗到佢都有嘢瞞住我，就好想逃避。」
「我真係人如其名啊可，廢紙廢紙，咩都做唔到。」我不禁悲從中來，喺到自嘲。
「放心啦，所有嘢都會水落石出，你等下啦。」佢拍一拍我個頭講。
由細到大我都好憎人拍我個頭，但係呢一刻，我覺得好warm，可能係因為我感受到佢對我果份支持。
「唉，唔諗啦唔諗啦。溫好啲數先算啦！如果有份雞精notes溫下就好。」
「放心啦，我會幫你操好啲數嘅，嘻嘻。」
「傻妹！」我篤一篤佢額頭。
「傻佬！」