我只不過喺自修室溫書，點知比我遇番佢。: <二十五>數學筆記
第二朝翻學，去到巴士站。
「喂，早晨！」我見到小霖喺到等緊車。
「呵，早晨，愈來愈早喎你。」
「嘩，搞咩呀你？成晚冇瞓啊？」
「下..唔係啊，瞓得唔好之麻。」
「係喎，你啲數溫成點啊？」
「嗯…還好啦，都叫有啲進步。」
「咁就好啦。」
之後我地就陷入好長嘅沉默，唔知點解會產生呢種生疏感，但係一時之間真係唔係太諗到話題。
直至翻到學校，阿月佢地自成一角喺到吹水，我冇專登埋去參與。
我同佢就一直維持住佢唔犯我，我唔犯佢嘅關係。
就係咁，我一個人無無聊聊咁做下呢樣，做下果樣。其實唔係好知自己想點，但就係想搵啲嘢做等啲時間可以快啲過。
「喂，阿言！」佢一入課室我就嗌佢。
「有冇刮到啲咩料？」佢行到過黎我就細細聲問佢。
「暫時未有，佢地都好似冇咩動靜咁。」
其實我唔係想抽絲剝繭咁去搵真相，我係想佢地可以露出少少破綻而可以俾我問個明白。
畢竟如非必要，我都唔想傷害我地兄弟感情。
放學果陣，我去完廁所翻課室拎完書包就去咗搭巴士。
呢條路好似行得特別長同特別耐咁。平時總係一班人同我行，又或者有小霖，今日就得我一個人。
上到車之後諗住喺書包拎支水出黎飲，打開書包之後俾我見到本野...
係一本notebook喎...
我掀開第一頁，
《費子楓的數學雞精筆記》
係小霖啲字...
「就黎大考啦。今次係我地中學最後一次嘅期終試。
相信你都想考得好好睇睇，做場好戲俾伯母睇。
我應承過佢會幫你溫好啲數，所以就整咗呢本筆記俾你。
鐘意數嘅話其實會覺得數學好好玩，你一定要好好學呀，唔好浪費我一番心機。
意象係做數做重要嘅野，特別係trigo，少啲想象力都唔係好做得到，要花多啲時間。
你得嘅一定，希望呢份野真係幫到你啦！」
我一路喺到揭，裏面啲嘢真係好詳盡，每一個topic都分好曬，有好多唔同嘅題型，簡單啲講都可以係一份百科全書。
佢一定整咗好多晚....唔怪得佢個樣殘曬。
果一刹那我真係好感動，竟然有人為我咁樣付出。
我即刻打俾佢，同佢講多謝。
「喂，小霖？」
「喂，阿楓？」
「你喺邊呀？」好老套嘅開場白。
「啱啱當完值，行緊去巴士站。」
「哦....好多謝你本筆記！」
「你要好俾心機溫啊，今次數學再肥我實唔放過你。」
「放心啦，我應承你，我實做得到高分！」
「加油啦！」
.
.
「阿楓，今日放學C'est Cafe等。」阿言小息同我講。
C'est Cafe係我地學校嘅一個休憩區，俾學生喺一間房入面休息。
去到果到之後，我正諗住敲門睇下有冇人。
點知...
「阿言嗌我地黎做咩？唔通佢知道咗？」係阿豪把聲，咁即係仲有阿月。
「唔出奇，我都預咗佢遲早會知。」果然有阿月。
「咁點算？俾佢話俾阿楓知你為咗幫我先搞咁多嘢，佢地實嬲死我地。」
「冇得避，都要攤牌，鬼叫你同阿楓仲有小霖都係我好朋友。」
我一路聽就一路覺得好乸亂，係好叉亂！
阿月要幫阿豪啲咩？
佢地喺我背後搞咗啲咩？
佢地當我兄弟咁有咩瞞住我？
仲有究竟關小霖咩事？
「你聽到好亂呢？」係阿言同阿晴。
「你地知發生咩事？」
「咔」一聲，阿言就打開度門，阿豪同阿月就好驚訝咁棟咗喺到。
「你地...」阿豪嚇到講唔到嘢。
「大家都係兄弟，今日唔講清楚邊個都唔准走！」阿晴好大聲講，好有阿嫂風範。
我地4個就好似玩緊2 on 2 WWE咁，一直對峙住。
「你地，知道曬？」阿月首先發動小攻擊試探。
「你覺得我地應該要知啲咩？」阿言好一個反客為主。
「頭先你地講嘅嘢我聽到曬。」我適時作出個助攻，暫時擊退阿月。
「你地都以為我真係想追果個小涼呢？」阿月終於肯講出真相。
「唔係，我識嘅阿月唔會咁魯莽。」我答。
「冇錯，我的確唔會，我係為咗個人先咁做。」
「為咗你意中人？」我問。
「唔係，我根本冇咩意中人。」
「我係受人之託先阻止你同小涼一齊。」
「係阿豪！」阿言講。
阿豪果陣已經好尷尬咁低曬頭。
「唔係！」估唔到佢仲維護住阿豪。
「咁樣我地好難講落去，做兄弟唔係要坦白咩？」
「好啦！係我呀！阿月一直維護嘅係我！」阿豪怒吼。
「你地究竟有咩瞞住我？」
「你仲好問？費子楓，都係因為你炸！你點可以背叛小霖同小涼一齊？」相信小霖黨嘅你地都係咁諗。
「你知唔知道小霖對我係幾重要？我暗戀咗佢5年啦！」
「係我求阿月幫我手阻止你同小涼，俾你同小霖一齊！」
原來係阿豪求阿月咁做..咁我咪怪錯阿月？
我望一望阿月，佢聳聳肩，表示阿豪講嘅係真話。
「你…講咩呀？我唔同小涼一齊都唔代表會同小霖一齊架。」我講。
「小霖鐘意你呀！唔係得阿月同佢求證，我都會覺得自己有機會！」
「但係佢一直眼入面都只得你，得你先可以俾幸福同快樂佢，我想佢得到快樂，所以先想撮合你地！」
「之前你同天蕊件事搞到佢幾唔開心？」
「之前你同佢一齊翻屋企佢又開心咗幾耐？」
「你醉醒之後多謝佢佢又有幾興奮你知唔知？」
「你放低天蕊冇幾耐又走個小涼出黎，令佢幾折磨你又知唔知？」
「當佢以為終於到佢有機會，你又整熄佢希望，仲要對住你扮冇嘢果種痛苦你又明唔明？！」
「點知你個仆街識到個新女就完全唔記得佢！」
其實我唔太能夠接受阿豪講嘅嘢。原來阿豪一直鐘意小霖。
但係小霖原來係鐘意我？！佢竟然會鐘意我？Are you kidding?!
阿豪一時講得太激動諗住向我揮拳，我冇諗住避，如果可以令佢舒服啲。
阿言一隻手阻止佢嘅攻擊：「講還講，唔好郁手。」
「停手啊你地！！」
係阿星帶埋阿王衝入黎。
「有咩唔可以好好傾要打人？平時唔係稱兄道弟咩？」阿王好嬲咁講。
「阿言，你唔係叫我帶郭sir黎話有嘢傾咩？點解..？」阿星全然唔知咩事。
阿豪突然沖咗出去，應該唔想再留喺到。阿王同阿星都去追佢。
現場得翻我、阿言阿晴同阿月。
「我諗..你地男人嘅事都係你地解決啦可，我出去先啦。」阿晴真係個好識做嘅女人，難怪黎爵言會鍾意佢。
「咁你地而加都清楚曬啦。」阿月率先打破沉默。
「緊係唔清楚啦。」阿言講。
「成壇嘢根本就錯曬，阿豪叫你做咩你就做咩，你唔洗諗後果架咩？」
「你平時啲冷靜細心去曬邊？你憑咩可以左右佢地啲事？」
「阿豪係我兄弟，阿楓係我兄弟，小霖都係我好好嘅朋友。阿豪果陣不斷希望我幫佢，佢寧願扼殺自己嘅機會都想小霖幸福，我可以唔幫佢咩？」
「而且我又知道咗小霖係鐘意阿楓嘅，佢一定會好好咁對阿楓，阿楓同佢一齊一定可以好幸福，呢個媒人都係要做。」
「我知咁樣會對阿楓唔公平，但係如果我咁做可以令阿豪、小霖同阿楓同樣得益咁唔好咩？」
「你唔怕阿楓嬲你成世咩？」阿言繼續問。
「怕。但總好過小霖見到阿楓同小涼一齊，佢打擊一定好大。亦總好過阿豪見到自己心上人終日愁眉苦臉，就連佢自己都頹埋一份。你知佢係幾咁善良，個人又冇機心，好簡單，所以作為兄弟，佢願望係咩，我做到都會幫佢達成。我知道佢嘅決定已經諗得好清楚。只係估唔到，你地咁快就懷疑到阿豪。」
「所以你就寧願犧牲自己，寧願變成犯眾憎。」
「兄弟嘛。」
「對唔住，係我誤會咗你，果日仲打咗你一拳。」錯就要認嘛，咁我唯有認錯。
「傻啦，我練到咁大隻，洗怕你個廢紙？」
「呃你…講開又講，你幾時知道小霖鐘意我？」該面對嘅都要面對。
「記唔記得上次練sing-con果單野？」
「我唱唱下走咗去果日？」
「冇錯，果日你走咗冇幾耐，小霖就跟住沖出去 (可以睇番第十五章)，我即刻跟去睇下咩事，佢一路跑，一路係到嗌你個名，但係搵極都搵唔到你，果陣我都估到啲。之後再問一問佢，佢都直認不諱。」
「仲有我呀，你知唔知我幾擔心你呀？你愈冷靜我就愈驚，驚你諗埋一邊呀，你知唔知你好自私呀？」小霖一邊講，眼淚就不斷係到流。我都從未見過佢咁激動。
「之後佢就成日同你講阿楓啲野？」阿言問。
「係，無論佢點同小涼針鋒相對，佢飲醉之後啲嘢，巴士站啲嘢，抑或本筆記都知。」
再聯想翻阿豪頭先謂嘅嘢，點解我咁蠢，咁都睇唔出？仲以為係因為識咗咁耐先會咁做。
「點解唔一早同我講？」
「同你講有咩用？你係鍾意佢嘅唔洗我講，你唔鍾意佢我講黎都冇意思。」
愛情呢樣嘢點解咁煩，點解唔可以好似考試咁迫出黎？
阿月嘅決定都係啱嘅，我而家知咗真係唔知點算，我唔識點去對呢件事。
「不如我地拆掂阿豪單野先啦。」阿言開腔。
「冇錯，佢係我地最好嘅兄弟，一定要同佢解釋清楚。」我補充。
「我地仲係兄弟？」阿月問我。
「梗係啦！再問剃曬你啲腳毛呃啦。」阿月對腳真係好多毛..
翻屋企途中，我拎番小霖本雞精出黎溫，一拎上手，就諗起頭先啲野。原來小涼出現會引發咁多嘢，一定唔可以俾佢知道。
當我再睇睇第一頁果陣，我個心突然有一陣絞痛，小霖你真係傻，我根本唔值得你咁做….
「我應承過佢會幫你溫好啲數，所以就整咗呢本筆記俾你。
鐘意數嘅話其實會覺得數學好好玩，你一定要好好學呀，唔好浪費我一番心機。
意象係做數做重要嘅野，特別係trigo，少啲想象力都唔係好做得到，要花多啲時間。
你得嘅一定，希望呢份野真係幫到你啦！」