我只不過喺自修室溫書，點知比我遇番佢。: <二十六> 和好如初

接下來呢幾日，我都全力博盡去溫書，有時都溫到不知晝夜。

「你仲溫呀？8點啦喎，食啲嘢先啦。」好多時我都會溫到連食嘢都唔記得，今日都唔例外。

「我唔餓呀，你去食嘢啦。」

「但係…」

「你肚餓就去食啦，我餓都會去架啦。」



當我仲喺到努力背緊accounting啲priniciple嘅定義果陣，有個魚柳包喺我眼前飄下飄下，我諗係我肚餓得制有幻覺。

「你睇你餓到，真係有個魚柳包喺面前都唔覺。」原來佢幫我買咗個餐。

我坐咗喺出面食嘢，突然覺得而家雖然每日都好過得好匆忙，但係就好充實，好滿足。

「慢慢食啦，濁死你呀。」小涼坐喺我隔離講。

「食你買嘅嘢死，都抵曬啦。」



「呃！亂講嘢。」

「我係咁口沒遮攔架啦，吹咩。」

「再亂講嘢我就打死你！」

「你捨得咩？」我捉住佢隻手問，果陣佢塊面已經紅過紅蘋果。

「我…」



喺佢仲諗緊點答果陣，我又敲番佢個額頭。

「但係我捨得喎。哈哈。」

「衰人又玩我！」

每日咁樣吵吵鬧鬧，令我有啲唔捨得呢啲生活。

但係大考始終都到了…

第一日就係考通識。我成日覺得呢科真係好吊詭，又冇固定model answer，啲分又俾得好主觀，咁取巧嘅嘢點可以用黎考驗學生？

不過今次考果份問啲嘢都係我比較了解嘅課題，如果啲概念字用得啱我諗問題
應該都不大。



過往考完試，我地幾個都會圍埋一齊討論啲答案。但係今次得翻我地三個傾，阿豪好似想疏遠我地咁，考完就撇咗。

「幾時搞搞佢？」阿月問。

「仲問？而家啦！」之後我地3個就追咗出去。

我恨不得想馬上同佢講清楚，雖然佢成日串我，窒我，但係因為有咗佢先令我人生變得咁豐富。佢同我地一齊成長，我唔想之後嘅人生都冇咗佢同我地一齊見證。

「阿豪！」我地嗌停咗佢。

「我地有嘢想同你講。」

「我冇嘢想同你地講。」

我地三個互望咗眼，就一齊抬起阿豪去到後山籃球場。



「喂！放我落黎呀仆街！」

「想點姐你地？」

「我地想點？我地想同你講清楚炸。」我答。

「仲有咩好講，我都俾你地揭開曬底牌！」

「我知你想為小霖做啲嘢，但係為咗佢而搞到我地冇朋友做值得咩？」

「但係每一次見到你咁對佢我都好憎自己，只係可以喺旁邊睇住你地點樣開心，只可以喺阿月口中知道佢點受傷害，而自己咩都做唔到，呢種感受真係唔好過架！」

「咁你就可以一直逃避架咩？懦夫！」阿言嬲啦，阿言嬲啦 ！



「你鍾意小霖咪自己爭取囉，你以為自己自把自為撮合佢地好撚偉大呀？」

「你睇下而加搞成點？爭啲阿月同阿楓冇朋友做，搞到阿楓夾咗喺小霖同果條女中間，搞到我地4個面左左，呢個真係你想要嘅結果？」

「阿言冷靜啲。」阿月喺隔離講。

「阿豪，你信我地啦，我地一定會幫你追到小霖，唔好為咗咁小事而令到我地感情有損啦。」佢再勸阿豪。

「真係可以咩…」阿豪終於態度有啲軟化。

「信我，一定得，就算唔得都至少嘗試過，咁樣人生先會無悔。」我一個完美嘅助攻。

「對唔住各位兄弟！我真係好戇居，做埋啲白痴嘢令咁多人受傷害。」

「我地冇怪你，我地都知你只係為小霖付出。」阿言終於嬲完之後講。



「好！完咗大考之後，我地就實行黃金聖鬥士求愛行動！」

「聖鬥士萬歲！」我地手搭手再大嗌！