我只不過喺自修室溫書，點知比我遇番佢。: <四十五>沒有得你的允許我都會愛下去
「小涼...」我行埋去。
「做咩唔聽我電話啊？」點解佢仲可以咁冷靜，佢唔係應該好嬲我架咩？
「對唔住..我琴晚真係成個人好亂..」
「我都明嘅..尋晚我爹哋講啲野係過份咗..」
「唔係！佢講得好啱，我真係俾唔到任何幸福你。」
「尋日我一句嘢都答唔上口，我覺得自己好失敗。」
「你成日話我做人冇方向感，得過且過，我一向都冇理你講嘅嘢，原來呢個會成為我嘅致命傷。」
「不如你俾啲時間我，我好快會俾個答案你。」
我一嘴講咗好多嘢，將自己嘅感受講曬出黎，借啲意去鬧自己。
「好啦..我知你一定會諗通，我講過我永遠會係你嘅避風港。」
果一刻其實我好想好想好想攬住佢，同佢講我愛佢，但係我冇咁做，我只係默默講咗聲多謝。
之後咁啱有車，我就上咗車。我個心好難受，雖然我冇回頭望佢，但係我都感受到佢嘅痛苦，唔會比我好過。
分分鐘佢尋晚都俾佢老豆話過黎。
「喂死人頭！」我好自然咁回頭望，我以為係叫我，原來係阿靜叫阿月。
「做咩唔嗌醒我！搞到我爭啲遲到！」
「我叫咗啦，你唔醒炸！」
「下次你再唔叫到我醒為止我就唔放過你！」
望住佢地，突然覺得好幸福，兩個都係有錢人，又係學霸，對前途已經冇任何顧慮。而我同小涼..
不過可能佢地又會有佢地嘅難題。
「喂！喂，費子楓！」我回過神，今次好似真係有人嗌我。
原來係小霖。
「做咩入曬神咁望住佢兩個？」
「冇..冇啊，望住佢地耍花槍幾好笑之麻。」
「你呃到我咩？望住佢地唔洗咁入神。」真係有咩都呃唔到佢。
「嗯..你今晚得唔得閒？」
「要溫書囉。」
「咁不如上我到溫，當探下我阿媽。」
「嗯..好啊。」
「媽！番黎啦。」
「噢！小霖你都黎啦？好耐冇上黎啦。」佢完全無視我。
「係啊auntie，呢排比較忙。」
「坐啦坐啦，好快食得飯。」
然後我地就喺廳溫咗陣書，過多陣老豆都番黎，之後我地都食飯。
食飯果陣佢地係咁問住小霖啲近況，佢地傾得好開心，但恕我投入唔到入去。
食完飯之後我地就入咗房..傾計，傾計炸！
「點啊，斷估都唔會就咁叫我上黎食餐飯？」
「係..嘅..有啲嘢想請教下你...」
「隨時愛相見 便見面 未怕疏遠了十萬年...」又係小涼打黎，我思索好耐聽唔聽好。
「小涼打黎喎..做咩唔聽？」
「我..唉，就係為咗佢啲嘢而煩。」之後我就cut咗佢線。
「尋日我去咗佢屋企食飯...」
「係啊..估唔到咁快喎。」
「連你都覺得太快啊？」
「時間上係嘅...不過如果你地認定咗對方又冇所謂嘅。」佢答。
「但係問題就在於..佢老豆唔接受我地。」
「我尋日上到去俾佢不斷咁追問，問我憑咩可以照顧到小涼，我一句說話都答唔上。」
「所以你就比佢老豆講嘅嘢影響，令到你都質疑自己同小涼嘅未來？」
「係啊！就係咁。」
「簡單啦，根本就係你自尋煩惱。」
「下？」
「如果你真係鐘意小涼嘅話，你就用行動去證明自己有幾愛佢啊。」
「佢老豆唔係要你本身有能力去照顧小涼，而係要你俾到信心佢去接受你同小涼，令佢相信你係有心去同小涼發展。」
「但係你就咁易退縮，咁你點叫人地父母交個女俾你啊？」
「係你自己信心唔夠咋。」
「係你自己信心唔夠咋。」
「係你自己信心唔夠咋。」
佢見我仲係一頭霧水咁，突然間扯住我隻手跑咗出去..
「去邊啊？」
「去搵番佢講清楚啊！唔通你成世都唔搵佢啊？」
「但係我都未諗好點同佢講。」
「仲洗咩諗姐？你想講啲咩就同佢講啦。」
佢拖住我一直跑去自修室，唔係我唔緊張，但係佢好似仲緊張過我咁...
去到自修室，小霖一支箭咁衝咗入去，成個自修室啲人都望住我地..包括小涼。
「小涼，出一出黎啦，個傻佬有嘢同你講。」
.
.
當佢出到黎之後，小霖就講：「有啲咩你地傾點去啦，我走先啦，啲嘢你聽朝先俾番我啦。」
「唔該曬你啊小霖！」真心的。
「點啊死人頭，肯搵我啦咩？又cut我線，又唔應whatsapp！」
「林小涼！」我大嗌
「係..」佢就好似隻小綿羊咁應我。
「我知我俾唔夠信心你，俾唔夠信心大家去維持呢段關係，但係由今日開始，我會以行動表示，我真係好鐘意你，無論第日係點我都唔會離開你，我會盡力考好DSE，升咗間好大學，為我地嘅未來鋪路。」
「我可以咩都唔要，只係要你嘅信任，只係要俾到安全感你！我淨係要你做好我個巴渣妹！」
「阿楓..」只見佢眼泛淚光，大概俾我感動到。
「我想講，無論我地第時係點，或者生活未必可以好富庶,但係只要我地係相愛，我唔介意同你捱架！」佢講。
「我唔會要你捱苦，你放心。我地快啲去搵你阿爸，我會盡力令佢信我，信我可以好好咁對你。」
「唔洗啦，我已經聽到曬。」嘩屌，佢阿爸突然喺我後面彈出黎。
「爹哋..你信阿楓啦，佢一定會好好咁對我..」只見世伯舉一舉起手掌，示意小涼停口。
「細佬你真係可以做到你講嘅嘢？」
「絕對得！」
「好，咁我就相信住你先，我唔希望我有一日見到我個女番屋企果陣係喊住咁番去，唔係我唔會放過你。」
「仲有，考好個DSE，之後我先會正式俾你同我個女一齊，雖然你地都可以繼續見面。」
「知道知道uncle！」
「好啦，睇黎你地繼續溫書架啦？咁我走先。」
「再見uncle！」終於可以好由衷咁叫佢一聲。
「Yes！！」佢走咗之後，我同小涼興奮到攬埋一齊。
「係喎，點解你老豆會失驚無神出現嘅？」
「佢本身話黎接我番去，我見你又冇黎咪話好囉..點知俾佢見到呢一幕。」原來真係有啲嘢冥冥中自有天意。
「仲好講！我未嬲完啊！又唔聽我電話又剩，知唔知我好擔心架！」
「對唔住啊小涼大人！以後唔會架啦！以後唔會架啦！」
「聽住先啦，成日都呃我蝦我，死人頭！」
「嘻，都係你嗌我死人頭最好聽。」
「仲有第二個咁嗌你咩下！！」shit，講錯嘢。
「冇..冇..冇呀，呃溫書啦！」我跑番入自修室。
「講唔清楚你唔好走！」
只係3日，好似發生好多事咁，好彩可以及時修補好我地嘅關係，唔係就真係大檸樂，不過天啊！唔好再俾呢啲大獲嘢我扛啦，我要考試啊！！
臨瞓之前，我send咗個whatsapp。
「唔該曬你，汪映霖同學。」