第二朝我地就去咗台中,同樣又係轉車轉到頭暈,淨係到新民宿已經冇咗半日,諗住去食嘢,點知去到間鋪又冇開喎,黑到痺。
 
最後我地求其食咗啲嘢就走咗,去咗條大街shopping,條街簡直係成個旺角嘅濃縮版,但係入面嘅貨品仲齊過旺角,至少唔會得成行成市嘅化妝品店或者電器鋪。
 
「掃貨啦去!」班女仔去到之後都癲曬咁,咁樣都難免,但係連我地班男仔都好興奮,因為果到啲貨品平過香港多多聲啊!
 
「阿楓,你睇下呢件嘢幾靚。」小霖拎起咗件T-shirt,叫我幫佢睇下眼。
 
係啊,第二朝起身佢又再次冇事發生咁,咁我又當冇事了。
 


「都唔襯你..」
 
「唔襯咩..?」佢好似有啲失望。
 
「你鐘意啊?買囉咁。」
 
「唔買啦,睇睇下都好似真係唔太襯。」
 
「你唔洗因為我嘅意見...」
 


「我信得過你眼光。」
 
「噢..咁再睇下啦..」一時都唔太識反應。
 
一路上,我地見到咩鐘意嘅都會叫對方比下意見,我唔知佢點諗但係喺我立場黎講,佢嘅意見仲中肯過我自己!
 
抑或係因為佢已經比我更加了解我自己呢..?
 
「阿楓阿月!」阿豪冇啦啦嗌我地。
 


「頂帽啱你地啊!」之後佢將兩頂一樣嘅帽帶落我地個頭。
 
「屌你老母咩!」我地舉曬中指咁。
 
係一頂綠到發青嘅cap帽!
 
「咩姐,咁你地走咗咁多日,點知你地條女有冇..」
 
「你唔好咁口賤啦,肥仔!」阿晴都講。
 
「咪係,咁嘅嘢都亂講。」阿言幫口。
 
「okay fine!我錯 !」
 
「喂阿楓,你過黎啊!」小霖喺對面街大嗌。


 
「你係咪好鐘意惡魔嘅嘢啊?」係啊,我好鐘意!鐘意佢果種邪惡,好有魅力。
 
「送俾你啊!」係一個惡魔鎖匙扣。
 
「嘩,好靚!多謝曬!」
 
「唔洗..你鐘意就得啦。」小霖好羞怯咁講。
 
「勁鐘意啊!不過..點解得半邊嘅?」
 
「唔知喎,個老闆話個設計係咁,話咁先型喎。」佢答。
 
「噢..又真係幾型,即刻扣落袋先。」
 


我地足足行咗3個鐘,掃咗好多好多貨先肯走,個個都滿載而歸。
 
我地果晚都好早瞓,因為要去個機動樂園玩,亦都係我地留喺台灣最後兩日!
 
果晚阿豪真係好醒,喺我地仲忙梗執呢樣執果樣果時,佢唔知喺邊到聯絡咗個司機,可以車我地去個公園,估到到佢又幾識未雨綢繆。
 
我地朝早就買定早餐上車,我開頭以為一個飯糰就食得曬,點知完全唔夠食。