我只不過喺自修室溫書，點知比我遇番佢。: <六十二>回港

(阿楓視角)
 
我沖完涼出黎，見到小霖攡咗喺床，但係又唔係瞓覺。
 
「仲唔瞓？」我問。
 
「等埋你啊嘛。」
 
「咁我而加出黎可以瞓啦。」
 


「嗯…嗯」佢擰頭。
 
「做咩啊？」我坐埋去床邊，坐喺佢隔離。
 
「我唔捨得你，想望多你兩眼。」佢將雙手放喺我雙膊，箍住我講。
 
佢吸一口氣，然後講：「費子楓，我鐘意你..鐘意咗你好耐。」
 
「小霖..你知我..」
 


「我知你鐘意嘅係小涼，我知你唔鐘意我，我知我係好傻，但係我淨係想將我嘅心意話俾你知。」
 
「我唔係要要求啲咩，我只係希望將自己鬱咗好耐嘅說話可以抒發出黎。」
 
佢嘅反應十分從容，應該係如釋重負。反而令我有啲唔太知點應對。
 
「你唔洗講任何嘢，我都知呢個時候講俾你聽你會唔識應對..我怕我再唔講明我嘅心意我會後悔。」
 
「你陪埋我呢晚啦好冇？」佢問，我只好點頭。
 


我地兩個瞓咗喺床上面，佢攬住咗我黎瞓，我亦冇推開佢。
  
「阿楓..」
 
「嗯？」
 
「你胸膛真係好好瞓..」
 
「早啲瞓啦..聽日早起身啊。」
 
「嗯..」之後就合咗眼，我唔知佢係咪瞓咗，我只係見到佢臉上掛住嘅笑容，係屬於汪映霖真正嘅笑容，見得番佢笑，咁就夠。
 
「醒啦..小霖..」第二朝我拍醒佢，佢睡眼惺忪咁望住我。
 
「咁早..」


 
「唔早啦，要執嘢啊。」之後佢先肯起身，伸咗個懶腰。
 
一起身就見到呢個咁靚嘅畫面真係特別精神。
 
搞完一大輪我地就開始去機場。
 
「我幫你拎啊！」我同小霖講，叫佢俾啲行李我。
 
「咁好死？！」
 
「咁算啦。」
 
「喂…我怕你辛苦姐..」佢一邊講一邊遞過黎。
 


「咁小嘢邊難到我！」
 
「啊！好唔捨得啊！」阿星大嗌。
 
「我都唔想番香港！」連阿月都講。
 
「你唔掛住阿靜架咩？嘻嘻。」子妮問。
 
「關你鬼事！」佢哼一哼子妮個頭。
 
就係咁嘻嘻哈哈，我地就去到機場，講真我真係好唔捨得同佢地一齊嘅呢幾日，每日都瘋瘋癲癲咁，好過癮。
 
上到機之後，今次坐我隔離嘅..係小霖。
 
「你唔同佢地坐？」我指阿晴同子妮。


 
「佢地同曬佢地男友坐啊…」
 
「咁多位唔揀係要同我坐？」我講笑。
 
「咁我淨係想痴住你啊麻..」
 
「你唔好..」
 
「得啦..我識做架啦..到咗香港我就會..變番朋友嘅身份，俾我纏埋你呢個幾鐘啦。」
 
唔知點解聽完我有啲心疼，所以都唔忍心拒絕佢。
 
「你嘅膊頭..係全世界最好挨嘅。」佢瞓咗落黎。
 


「你就好挨囉，不知搞到我幾攰。」
 
「真係架？咁你唔出聲？？」佢即刻縮番個頭。
 
「你挨得咁舒服咪借俾你囉。」
 
「嘻嘻。」笑完佢又挨番落黎。
 
我從來唔知原來佢可以咁易滿足，就好似細路咁。
.
.
.
「拜拜啦，遲啲見！」
 
講完我地就各有各走，勞燕分飛，我同小霖、阿言阿晴、阿星都係搭同一架車，所以我地一齊走。
 
一到步，我就send咗個whatsapp比阿媽同小涼，不過小涼應該未落吧。
 
見住佢地一個一個咁落車，我內心就更增添一份不捨，令我有啲失落。
 
「做咩啊？唔捨得啊？」佢問，點解佢永遠都估到我諗咩？
 
「小小啦…」
 
直至我地都落埋車，就代表個旅程真係完了。
 
「拜拜啦..阿楓，多謝你呢幾日黎嘅照顧。」我送到佢去樓下，係我堅持嘅。
 
「我多謝你就真。」
 
「唔好掛住我喎你。」佢講。
 
「痴線，走啦你，遲啲再出黎玩啦。」
 
「你話架，拜拜。」講完佢就入咗去。
 
而我都轉身走，行咗兩步唔知點解我好想回頭望下佢，所以就做咗。
 
點知佢都有望番轉頭喎，仲笑笑口咁同我揮手。
 
「我番黎啦！」我講。
 
屋企一個人都冇，淨係有張紙。
 
「我同你老豆約咗朋友啊，你自己搞點啦 ！」阿媽寫。
 
搞錯啊…
 
沖完涼之後都6點幾，都有啲餓，所以就求其煮咗個麵，然後就送電視食。
 
睇住啲十年如一日嘅節目食嘢，更顯得孤獨，明明尋晚仲係成班人嘻嘻哈哈咁食嘢，今晚就得番一個。
 
除咗掛住班友之外，我唔知點解仲有種好特別嘅感覺，而係我解釋唔到嘅。
 
係我沉思緊果陣，小涼就覆番我：「我都到咗啦！好靚啊呢到。」
 
「係咩？send 啲相黎睇下！」
 
佢send咗張自拍黎，背景仲係機場黎。
 
終於可以見下佢個樣，都成個禮拜冇見，都冇咩點變。
 
「好靚喎真係..個景，哈哈。」
 
「乜而加我唔靚咩？！」
 
「靚！梗係靚，至靚係你！」
 
「算你啦！」
 
「玩得開心啲啦你！」
 
「嗯嗯，番黎見！」
 
然後我就入咗房煲劇，我突然覺得自己好似王家衛鏡頭下嘅梁朝偉，沉沉鬱鬱咁做自己嘢..由頭到尾都係一個人。
 
直至瞓教果陣，望住隔離個空位，果種空虛先又突然泛濫起黎，我呢個時候先恍然大悟
.
.
.
.
.
我好似..真係有啲掛住小霖。