「邊個!」家姐佢提高聲浪。

我敲一敲門,「入嚟!」睇嚟佢神色唔係幾對路。

「家......」仆街!差啲就爆響口,好順口就講出嚟,好彩好彩。

「家陣揾到張名單啦。」我兜到。

「返埋位先。」佢瞬間語氣都軟咗落嚟,無曬力咁,睇嚟佢頭先都嚇咗嚇。



我同漫澄坐返埋位之後,家姐就開始嚟軟啦。

我好清楚佢嘅玩法,先係以強硬嘅態度,令你感到懼怕,甚至會令你心諗:做乜勁?

然後用軟化嘅態度,令你心頭一軟,加上先前嘅懼怕,同佢天使般嘅面孔,好快就成功達成目的。

我中過唔少次招,先領悟到嘅真諦。

「我唔係話要罰你哋或者係要鬧你哋,我只係想你哋做得出,就唔好怕認。」



「我淨係睇字跡同埋行為,都估到係男仔做架啦。」

「身為一個男人,做得出,就唔好怕認,頂天立地,如果唔係邊有女仔鐘意?」

「連講句我愛你都偷偷摸摸,仲有咩資格講愛我?」

家姐佢講到好有道理咁,正當我諗住應該講完都無人理佢嘅時候,有一個男仔,好唔爭氣咁舉手。

「Miss Tai,係我寫嘅!」係毒均舉手。



心諗,個毒均咁就中咗伏。

「Miss Tai,仲有我同埋陳明輝!我哋都係想俾你知道我哋心意!」

唉屌!一條傻鳩,兩條傻撚,真係絕配。

我已經聽到啲女仔係度竊笑,順便食個花生,係佢哋眼中,根本唔會覺得喱啲仔型,只會覺得佢哋龘鳩,但我相信毒均佢哋一定覺得自己好型。

以為自己那些年,好柯景騰。

「一陣你哋跟我落嚟教員室。」

佢哋三個嘅眼神閃住一股氣,一股自信。我當堂打咗個冷震。

我見漫澄對喱件事毫無反應,同其他食花生等睇戲嘅女仔唔一樣,於是問道,「你唔理佢哋呀?」



佢冷冷一句就收咗我皮,「我都無興趣。」

更令我覺得佢清麗脫俗。

之後嗰三個男仔點樣我就唔知啦,只係知佢哋三個好有精神咁去,死屍咁樣返嚟。

之後家姐都無返屋企,都問唔到佢咩事,但覺得之後有機會,就由佢先,反正日子多的是。

喱件事好快就傳開咗,你諗下呀,中學時候間學校有幾大呀?好快啲嘢就傳開去。

話我哋班有三個左右門神向靚女班主任表白,但俾人食檸檬。

好快全校都知道家姐嘅存在,個個見過家姐,都一定會讚佢靚。



家姐就咁成為一眾男仔打J嘅對象......