「做咩姐,唔俾得我睇咩?」我調皮地道。

漫澄佢皺一皺眉頭,扁一扁嘴。

媽呀!太可愛啦掛?喱個表情係可愛得嚟帶點曖昧嘅意思。

你可以從佢表情睇到一個訊息——No!但你心入面係知道「唔好」,但你偏偏好想做。

個表情令我更有衝動,同埋更好奇佢寫啲咩,同埋寫俾邊個。





我個心好忐忑不安,一路帶住「佢究竟寫俾邊個呢?」喱個疑問上堂,但漫澄若無其事咁。

到咗放學,個個都好小心翼翼交俾中文科科長,中文科長係一個標準嘅毒撚。

厚厚嘅黑髮,增添一點凌亂美,一臉暗瘡,重點係矮!

我係班房sd咗個whatsapp俾家姐,我甚少會sd whatsapp俾佢,有咩事都會打電話呀,又或者返屋企先講,但我今日忍唔住。

我同家姐講,叫佢話我知漫澄份情書寫咗啲咩。





跟住家姐覆我一句:聽日你咪知囉。加調皮嘅符號,吊你癮。

我屌你咩!依家先嚟吊我癮!我好想知呀!!!!!!!!

『你唔好唔記得你今日點對我呀!』

死啦,唔記得咗方丈份人好小氣添.......

『Sorry呀家姐,係我唔好,唔應該串你嘅。』我扮曬死狗咁,無非都只係想知道漫澄寫咗啲咩。





年輕嘅時候就係咁瘋狂架啦,為咗一啲嘢,可以去到好盡,做乜都得。

我為咗知道漫澄寫啲乜,我都可以去到好盡。

『算吧啦你,你都唔係真心認錯架啦!』

果然知我者,就是家姐乜。

『咁我真係想知呀嘛......』

『人哋嘅心意點可以亂咁同人講?』

『我係知道漫澄寫咩,但係哩啲係人哋私隱嚟,要知嘅話直接問佢啦,你男仔嚟架啦。』

家姐講到咁,我即刻收曬皮,咁佢又講得啱嘅,雖然心有不甘,但無謂強人所難,只好靠自己。





第二朝返學,上家姐嗰堂,家姐一入嚟就望住我,掃視咗我一下,眼神別有含意,但我估唔到。

唔好以為兩姊弟就用一個眼神溝通,咁諗你就錯啦,好多時候都係唔撚知架。

我偷瞄漫澄一眼,佢好奇怪,忽然間坐到直一直,好似好緊張咁,唔知做咩事。