《我家姐竟然做咗我班主任？？？》: 【29】

好彩漫澄無見到我整親嘅傷口，如果唔係，佢應該唔止咁嘅反應。

如今我已經痴曬膠布，我都想將頭先嘅疑問問漫澄，於是拍下旁邊嘅凳仔，示意佢坐低。

「係呢，你做咩無啦啦會參加800米嘅？平時都無見你做開運動架？」

漫澄佢不自覺咁整自己嘅劉海，不停發出「 er...um...」嘅聲音。

「無呀，只係想做下姐，唔得咩！？」





最後佢胡亂作個藉口出嚟，嬌羞嘅表情更添幾分可愛，如此可人，怎叫男人不興奮？

「得得得！」我笑出嚟，嘴角略帶甜意，「估唔到你會咁嘅一面姐，我好佩服你！」

唔知係咪我句嘢太真誠，佢先是低頭不語，然後忽然抬頭，眼內閃爍了幾下光茫，細看之下，才發覺是淚水嘅反光。

我繼道，「一個平時無咩點運動嘅人嚟講，去報名比賽係勇氣嚟，加上你頭先唔放棄嘅體育精神，值得任何人都投以佩服嘅目光！」

我講到好正氣，終於博得漫澄會心一笑。





「多謝你。」一句真誠嘅道謝，穿越所有障礙，暖入我心。

「我頭先真係心情好差，出曬佯相，好瘀。但聽到你嘅鼓勵，我就.........開心。

佢最尾講嗰隻字好細聲，雖然聽得唔係好清楚，但係我大約估到。

「小事啦。」我裝作豪爽，其實內心係好開心！聽到漫澄咁講，頓時心花怒放。

我仲諗住可以享受多啲喱個moment，我可謂因禍得福，整親，仲要輸俾David，已經黑仔到爆。意想不到會因為咁而同漫澄更加親近，喱啲唔係因禍得福，咁係咩？





可恨嘅係，家姐不識時務，係喱個時候嗌住我。

「細......英雄！細英雄！」

聲音從我後面傳嚟，我轉頭望一望，家姐滿頭大汗，行過嚟我度。

我有禮地叫返聲，「Miss Tai。」

「你無事呀嘛？」

「無事呀。」我笑笑道。

佢自己都有觀察下，發覺無咩大礙。

於是注意到我身旁嘅漫澄，邪邪一笑，「哦～難怪無事啦，原來有女班長照顧！」





明顯地取笑我哋，女班長靦腆地笑，不作任何回應。

「人哋女班長細心呀嘛！」我差啲想串返佢，「唔似得某啲人呀，哈哈！」

不過唔講得，就將成句硬生生咁拉咗落肚。