簡介

關於dse雞同小學生



話說就係咁,考完dse,尋日我諗住去某自修中心拎補習資助(5月去拎番4月份既錢)。之後我入到去中心,個姑娘問我得唔得閒做義工,教下小學生做功課,咁我剛剛去完大學面試又冇野做,又冇工肯請我,咁我咪答應左囉。

個姑娘比左塊「功課輔導員」既牌我,咁我就開始去教小學生喇。點知一入到去,可能係因為我帶住塊「功課輔導員」既牌關係,全部小學生都望住我,我諗應該有20個到啦。我真係淆淆地,因為我平時真係冇機會同啲00後既小朋友溝通,唔係好識應付佢地,我真係諗緊點算好。

雖然我未來既理想職業都係教小學生中學生,但你地都知根本就冇人會請我,唔知我係咪想呃飯食先會想做呢一行。我成績唔係好TOP個啲人,合格多少少個種,學校pre我有兩科LV5咁囉。(小弟打呢篇野之前十分鐘先寄左十幾封幫人補習既入職申請,唉又係食白果架喇。)

因為我真係唔知點樣去幫啲小學生,我只好向逐個小朋友咁問「你有冇功課唔識啊?」,佢地會唔so你,或者輕輕咁答你一句「冇。」。其實都明白,因為小朋友會害怕同唔熟既人講野,而佢地好有可能係第一次見到我。咁我見我冇咩野可以幫手咁就走埋左一邊啦。

坐係到幾秒之後,有個小學生坐係我付近做緊棒形圖既數學功課,咁我咪偷偷地望下佢做成點樣囉,終於比我見到佢做錯左一題。之後我好似聊佢傾計咁,「喂你呢條係唔係好似做錯左咁喎!」,之後個小學生對住我笑,係天真無邪但係有小小尷尬個隻笑,驚我會話佢。咁我好溫柔好有耐性咁教番佢啦,佢做番岩之後,佢既表情係好開心,我feel到佢終於做岩晒所有功課個種喜悅同埋成功感。我突然係到諗,小朋友真係好,因為佢地既說話同埋表情都係好真心,唔知由幾時開始,你慢慢會開始覺得身邊既人會對你好假,即使係身邊好親密既人,如果我可以同小朋友溝通,其實係好開心,因為大家都係真摰。(對唔住有小小離題)



我再問佢「你空白左個啲係唔係唔識做啊?」其實我都係明知故問,佢唔識做,佢好想搵人可以教佢做,但係佢又怕羞唔敢問,倒不如我主動幫佢。條題目大約就係大容器可以分成數個小容器之類,可能對大家來講係好易,但係對於剛剛學除數既小朋友黎講的確有啲困難。「大容器係900mL,佢話可以容納6個小容器,咁每一個小容器既容積係唔係900除6啊?」之後佢好醒,自動波咁列直式,最後計到150mL。之後佢戰戰競競咁問我答得岩唔岩,我話你答岩!好叻!之後佢好開心咁同其他小朋友講「呢個啊sir好鬼勁啊!仲勁過_miss!快啲問佢野啦!」(我諗_miss係大學生兼職老師)

估唔到我毫無經驗,都會得到小學生既讚賞,其實冇比佢地話我已經係好難得。

之後有個女孩問我英文,係英文!!!!小弟我英文係極廢,平時學校係唔合格個啲,又或者我由小學開始已經英文唔合格,只係中六死追爛追,應該有lv2。咁我都冇理由一開始同佢講我英文好廢唔識架嘛,咁我真係睇下份英文功課啦,原來唔係好難(份功課一開始有例題,之後個啲都係跟住個格式重重複複咁copy落去),我見到例題既規律,之後就教番佢個結構。依家真係唔可以低估啲小學生,啲grammar幾好,起碼he/she/it後面個verb會識得加s,可能大家會話我「邊有可能唔知」,但係我之前係完全忽略呢啲野,亦都有好多中學生作文都會漏,係我近dse之前先有番個sense。

小學生啲功課真係好快做完一份(我黎講),話咁快佢地就拎份常識黎做。可能大家都已經有溝通,而我又唔惡,佢問我份常識作業點做。乜野中國曆史我真係完全唔識(小弟我理科出身)。我即刻諗番我自己小學個陣會點樣做常識功課,係睇書!!!唔知大家記唔記得啦,小學既常識作業有100%答案可以係本書到搵得番,之後我問佢借左本常識書睇下,教下佢係應該係邊到搵答案。佢好快搵曬啲答案抄落作業到。其實,我唔知教佢「如何抄答案」呢樣野係咪有問題啦,即係到底對學生有冇幫助。咁但係我既職責都係幫小朋友完成功課姐,咁就有得佢啦。

教教下小學生做常識功課,又有個小朋友問我中文,終於中英數常都比小朋友問齊晒!!!唔係講笑,我覺得小學中文真係好難!大概係叫你睇下句句子有咩不當,講真啦,我中文都唔係話好,同埋有好多語病,可能大家睇我打呢篇野都會發現我文字表達上有啲問題,有時仲會令人睇唔明我到底寫緊咩。同埋好多字我都係唔識寫,佢地真係考起我!!!唔識寫字,真係冇得死撑,只好同佢講我去查字典。估唔到佢地冇埋怨我唔識寫字,仲好耐心等我查完隻字!!我覺得佢地真係好善良!!!!



之後又有另一個讀緊小四女孩問我數學,大約係三角形同平行四邊形既面積。其實我都覺得幾深,因為問得幾含蓄,可能即使係中一中二既中學生都未必諗到。其實我又點會唔識(數學lv5),只係諗緊應該點樣教識佢。我見到條題目,即係諗起sine law, cosine law,畢氏定理都可以計到,但係小學生又點會識......我問佢「學左方程式未啊?」佢話小五先教,但我明明見到佢做緊份功課係小五。依家啲小朋友真係辛苦,小四就已經要做小五既功課,真係唔好以為小學生好輕鬆!!!我唔小心教左我中三既識既concept(三角形比例)比佢聽,教個陣冇留意,去到打呢篇文個陣先醒起,我解極佢都唔明。我係到諗緊點算,我已經心算到個答案,但係佢一啲頭緒都冇。最後我諗到個方法比佢,就係數格仔!!!原來就係要教佢數格仔去找面積,小學生先會明白!!教小朋友真係除左要有耐性,仲要搵一個合適易明既方法去教佢,唔係下下都要教深野。因為教育係腳踏實地,而唔係扙苗助長。

可能大家都見我好nice,好樂意問我野,同埋同我傾計。佢地問我「_sir,你聽日會唔會過泥啊?」,佢地好中意我既存在,甚至問我拎電話。當我同佢講我只係一次性,冇咩機會會再黎,佢地好唔開心,佢地好希望我可以每一日都黎,去教佢地做功課,去同佢地傾計,去成為佢地既聆聽者。而我都好唔捨得佢地,因為我只係中學程度,如果要成為part time導師,起碼要讀緊大學,我唔夠資格成為呢間中心既導師。我重申我今次過黎係做義工,而且係一次性。當我同佢地講,如果有機會既話會過黎啊,佢地好開心!!!

最後,有另一個女孩主動同我傾計,佢話好辛苦,聽日要默書,仲有好多補習補課,又要學琴,依家仲有好多功課未做,又比老師罰抄好多書(唔係佢做錯事,而係其他人上堂嘈,所以全班罰)。我真係唔知點答佢,心裹面覺得點解小學生會被迫到如此地步,想休息下又唔得,替佢地唔開心。但係我依家既身份又係「功課輔導員」,我只可以聽佢呻,之後好無奈咁鼓勵佢「加油啊!做完就可以番屋企休息架喇」。真係荒謬,呢句完全唔係我既心底話,我既心底話係「好心啲家長就唔好叫自己仔女參加咁多活動,收賣人命咩?啲老師又係,明知學生放學後咁忙都係咁罰人抄,邊有時間同精力去抄野啊?」我好想去幫你抱平,但係我冇呢個能力。對唔住,小妹妹......

可能已經夜,好多家長都接走左佢地小朋友,咁我都功成身退,離開左。雖然呢一次我係做義工,冇收入,但我完全唔介意。因為呢一次係一個好難得既機會去同小朋友接觸,當我教識佢地做功課,我見到佢地開心,我都開心,好有滿足感。最最後,小朋友,我愛你們!
已有 0 人追稿