【英雄系列5】天使與吸血鬼: 7.吸血鬼
「好！無驚無險，又收工！」
「呼.....訓到腰我都痛呀」
翌日，眾人又回復返平時一樣既熱鬧
「瞳瞳，返去啦！」奈央拎起紅色手袋，叫道
「唔好意思呀奈央小姐...今日我約左朋友食飯呀..」瞳瞳帶住歉意道
「哦...唔緊要丫，咁聽日見啦！」
響奈央離開後，瞳瞳就繼續暗中觀察住旁邊既希路同友美
「友美，行啦」
「嗯」
希路同友美終於取起物品，離開辦公室
瞳瞳知道，跟蹤，唔可以跟得太貼
所以並冇立刻跟住走
過多一會後，瞳瞳先起身離開
「大久保先生，咁我..走先啦」
「嗯，拜拜啦瞳瞳」
一踏出辦公室，瞳瞳就加快腳步前往升降機大堂
「希路先生佢地走左一分鐘，要快d至得！」
瞳瞳乘住升降機，落到地下
剛好見住希路同友美離開總部大樓，瞳瞳馬上戴上口罩，緊隨兩人
瞳瞳跟住希路同友美，坐上1號巴士
「佢地...到底去邊呢？」
瞳瞳坐響下層一個唔顯眼既位置，靜待位於上層既希路同友美
「下一站係，摩星嶺...」
瞳瞳心裡想:「已經係總站啦喎，佢地應該會落車掛....」
果然，巴士停往總站後
希路同友美慢慢從上層落黎
「終...終於黎啦...」
瞳瞳唔太著急，緊隨其他乘客後面落車
希路同友美一路行上摩星嶺
瞳瞳亦以50米既距離跟住兩人
「佢地...唔通真係住摩星嶺呢度？」
兩人轉入上山既路上
「弊啦，要行快幾步先得！唔係就追唔到架啦！」
即使著住高踭鞋，瞳瞳依舊加快腳步
正當瞳瞳轉入小路之際
「你響度做咩呀？」
希路卻早已經響轉角位，等待住瞳瞳
「凌愛瞳...」
「呃...呃...我.....」
跟蹤大計被識穿，瞳瞳一時間無言以對
「離開總部果陣我已經察覺後面有人跟住我地，不過估唔到係你喎」希路冷冷道
「....」瞳瞳只係低住頭，一語不發
「不過..我諗你都係冇惡意既...」希路身後既友美道:「但係，咩原因令你要跟蹤我地？」
「我....」
瞳瞳猶疑一刻:「我想知道...希路先生同友美小姐既秘密」
「秘密？」
瞳瞳點一點頭:「我睇得出，你地兩個...並唔係普通人」
「我想知，你地...加入IID既理由」
「希路...你點睇？」友美詢問希路既意見
「凌愛瞳，你真係咁想知？」
「嗯」
「咁，去左我屋企先再傾啦」
希路轉身道:「不過，一陣我講既野如果你講出去，到時我就會殺左你」
聽到呢度，瞳瞳不禁感到心寒
「我....我...我應承你...」
「咁，跟我地黎啦」希路頭也不回，同友美行上山路
兩人帶住瞳瞳走進一間三層高既歐式大宅
感覺上，呢一間大宅既人肯定非富則貴
「呢一間，就係我既屋企」
希路坐上梳化上:「凌愛瞳，你有咩野想問？」
「我想問...希路先生你...」瞳瞳緊張得不停吞口水:「係..係咩野人？」
希路點起香煙
「我，係吸血鬼」
「吸...吸...吸血鬼？」瞳瞳聽到後嚇得差點腳軟
「無錯，吸血鬼響大約三百年前開始出現，現時世界上大概只有300隻吸血鬼」
「我同平時小說入面既吸血鬼唔同，我地冇尖牙、唔怕陽光、唔會驚十字架、更加唔會吸人血」
「我地有既，只係得比平常人快既力量、反應同速度」
「所以...你尋日行動既時候，先可以擋到子彈...」
「無錯」
「咁...點解仲會叫...吸血鬼？」瞳瞳平復情緒，問
「吸血鬼可以透過咬人，將瀕死既人救返生...所以吸血鬼其實係對我地既誤解」
「被吸血鬼救既人會成為佢既眷屬，而每隻吸血鬼都只可以有一個眷屬...即係話，除非眷屬死左，吸血鬼都唔可以再救人」
「但同時間，吸血鬼死，眷屬都會死」
「仲有野要問嗎？」
「咁點解...你尋日會唔聽命令，將5個綁匪全部殺死？」瞳瞳再問
「因為佢地係迪拉斯既人」
「迪拉斯？」
希路吸一口煙:「迪拉斯表面上係一間國際私人保安公司，但背後佢地就同多個國家既政府有非法交易，甚至仲會收取政府既金錢殺人、發動戰爭」
「佢地一直都有研究各種戰爭兵器，包括戰鬥用納米機械」
「戰鬥用納米機械...」
瞳瞳不太明白，所以冇再深究
「咁...點解你咁憎佢地呀？」
「因為佢地，殺左我屋企人」希路將煙放下，道
「咩...咩話..」瞳瞳無諗到，真相係如此驚人
「十年前，當時只有14歲既我，一放學就見到一家十二口，全部都已經流哂血訓響地下」
「只有我爸爸，仲剩一口氣」
「爸爸！！！！爸爸！！！！！！你支持住呀！！！！」
「希....路.......係....迪拉斯.....係迪拉斯.....！」
「希路...應承我...幫我地..報仇！！！！！」
「雖然我唔知道，我爸爸同迪拉斯既恩怨」
希路呼一口氣:「但係，佢殺我屋企人，呢個仇，一定要報」
「希路先生...」得知希路過去既瞳瞳，無言以對
「咁你依家明白，點解我會咁憎迪拉斯啦？」
「嗯...但係..你加入IID既目的，就係為左打低迪拉斯？」
「算係啦...而我地加入呢一個小隊既原因都係因為想利用Archangel，將迪拉斯搵哂出黎，再解決佢地」
「而最近亦有消息指，迪拉斯既人馬已經黎到香港，似乎都同尋日既綁架案有關」
「我要講既係咁多啦，應該可以解答到你既問題」
「不過，凌愛瞳你要記住，呢番說話...你夠膽講出去既話，我到時就會殺左你」
「嗯....」
瞳瞳斗膽問:「咁友美...小姐呢...？你...又係咩人黎架？」
「嘿，都係要問我呀？」
友美冷笑一聲:「希路，可以講嗎？」
「隨便你」說罷希路就閉上雙眼
「凌愛瞳，記得頭先希路所講既眷屬嗎？」
友美一臉嚴肅
「我，就係希路既眷屬」