「師傅,子鋒嘅情況點呀?」三人在我離開道場後,又再談論起我的情況。
 
「你都有眼見啦,一開你出現嗰陣明明無諗住畀佢見到你,但係佢竟然即刻發現咗,證明佢嘅靈力應該慢慢恢復緊,雖然速度慢同埋佢仲未察覺到,不過,佢嘅力量應該好快就會恢復返。」天命叔拿出了我的命盤,但這次的結果,比起上一次起卦時更加奇怪,簡單來說,這看起來已不像是我原有的命盤了。
 
「噉我哋係咪失敗咗,阻止唔到佢復活啦?」小詠和阿詩一臉擔心地自著天命叔。
 
「呢層未必,嗰隻嘢主動同個細路接觸,引誘佢自己解開封印,證明封印對佢嚟講有一定影響!只要呢段時間唔好出啲咩事,個細路再無解開封印嘅諗法,我諗今次可以對付到佢!」天命叔充滿信心地說。
 
「師傅,咁我哋幾時出手?」
 




「解決完今次件事,救返德叔同炎冰之後,我哋將子鋒帶去學校,之前我已經喺學校做好晒準備,專門用嚟對付細路體內隻嘢!佢學校嘅位置係靈力嘅集合點,只要喺嗰度引到隻嘢現身,我保證可以收伏到佢!」
 
「但係,解決完今次件事,師傅你仲要對付隻嘢嘅話,會唔會好危險?」
 
「唔諗得咁多㗎啦,如果今次都收拾唔到子鋒體內隻嘢,我諗之後就唔會再有機會對付佢!我只係怕......呢段時間會出啲咩意外,令到個細路自願解開封印,到時就真係麻煩......」
 
「就算子鋒想解開個封印,佢應該都唔知點做先啱㗎?」小詠不解地問。
 
「佢梗係唔識啦,不過佢一旦決定要解開封印,佢將呢個意願同隻嘢講咗,噉隻嘢就有權去干涉呢個封印,到時要破解只係時間問題!」天命叔不安地說。
 




「我諗子鋒唔會噉做,佢下定咗決心之後就唔會再去諗。」阿詩選擇了相信我。
 
「我都係噉諗。」小詠亦附和。
 
「呢層我明白,不過......唔知點解我心入面仲係好不安!我怕呢幾日,會有啲咩事發生......希望只係我嘅錯覺啦!」天命叔看著我那凌亂的命盤,眉頭緊皺,看來事情仍不算明朗。
 
「師傅你唔好諗咁多啦,你仲要閉關養傷㗎。有啲咩養好傷之後再諗啦。」小詠怕天命叔太過操勞,於是從旁提醒。
 
「我知道......」天命叔若有所思地看著命盤,並不放心似的。
 




「其實我哋依家暫時都無嘢做到,天命叔你不如早少少去休養,愈早休養好,愈快可以行動。」阿詩關心地說。
 
「嗯,新抱仔你講得啱,我依家就去閉關打坐,我會盡快出返嚟。不過,我入去打坐之前,有啲嘢畀你哋。」天命叔邊說邊找尋甚麼東西。
 
然後,只見天命叔拿出了一個古舊的木盒,打開後,一股清新的花香四散開來,叫人好不舒服。
 
「新抱仔,你戴住呢條手繩,可以保你平安。同埋,因為你控制唔到靈力,呢度有個人偶,本來係用嚟代替個細路引今次隻嘢出嚟嘅,依家我畀咗你,如果真係有靈體想對付你,你可以將拎呢個人偶出嚟,咁啲靈體會當作呢隻人偶係你,噉到時你就可以逃走。當然,我希望你唔會有機會用到啦。」天命叔把東西交到阿詩手上後,便轉頭看著小詠。
 
「小詠,之前本來計劃將你同個細路嘅連繫重新打開嘅,不過依家無時間去做呢樣嘢。呢度有三道符,每道符可以幫你暫時打開同個細路嘅連繫,等你可以即刻去到佢身邊。不過你要記住,每道符只可以打開通道一次,而每次只可以停留十五分鐘,之後會強行將你召喚返嚟道堂,所以要小心啲用。」
 
「點解得十五分鐘㗎?萬一子鋒真係遇到危險,十五分鐘未必做到啲咩。」
 
「你唔好唔記得你依家嘅狀態仲係好唔穩定,如果你長時間離開呢個區域,你自己都有危險,所以我先落咗呢個限制落去。同埋,每道符中間要相隔一個鐘先再用到,你唔好諗住返嚟之後又即刻再用呀!知道未?」
 
小詠無奈地點了點頭,然後天命叔再交代了一些事情後,便走到側室閉關休養。




這些事情,都是後來從小詠口中才得知的。
 
而這個時間,我仍然是一無所知,以為只需要乖乖地渡過這一個星期,所有人便能平安無事。
 
可惜,就在所有人還來不及準備之際,入侵德叔的靈體,竟主動出擊來對付我了。
 
我回到家後,身體早已超出了負荷,早早便已入睡了。
 
「起身!」誰啊?別吵我好嗎!
「起身呀!」這幻覺真吵耳!
「我叫你起身呀!」這聲音夾雜了一點憤怒,憤怒之中亦有點焦急,聽起來有點耳熟。
 
我慢慢睜開雙眼,映入眼簾的,卻仍是無盡的黑暗。
這次,我很快便理解過來,知道自己正身處在一個怎樣的環境裡。
 




我慢慢的抬起頭,果不期然,那團該死的黑氣正傲慢地在空中飄浮著,錯不了,是我體內的那混帳傢伙。
 
「點呀?你考慮成點呀?」那黑氣慢慢落到我的面前,胸有成竹地說。
 
「考慮成點?我都唔知你講咩?」我可不會上當。
 
「哼!你估我會唔知發生咗咩事,張天命嗰個臭道士話佢可以對付到隻嘢呀嘛,你唔係真係覺得,一個傷患真係做到呀?」黑氣發出恥笑的聲音。
 
「你唔駛嚇我,我知道你想點!不過今次我唔會再上你當,我哋已經準備好晒,今次一定唔會輸。」
 
「係咩?你真係噉諗?」
 
「係!」我再次堅定地說,我選擇相信天命叔。
 
「你要噉諗我都阻唔到你,不過......」黑氣停頓了一下,只見它稍為揮動了一下右手,黑暗的空間裡顯示出一個像是螢幕的東西。




 
「你又想玩咩?」我警戒地說。
 
「哼,你睇下咪知咩事囉。」
 
我看了看那螢幕,只見螢幕裡有兩個人,一個是炎冰,另一個,則是德叔!
到底,這是甚麼一回事?
已有 0 人追稿