［校園鬼故 X 陳生回歸 X 角色崩壞］無能子鋒與無能鬼: （六十一）無能鬼的回憶（終）
就在刀子劃過父親的脖子時，一下清脆的，像是金屬互相碰撞的聲音響起。
然後，刀刃和刀柄便一分為二，刀刃的部份落在地上，發出了清脆的響聲，父親看著刀刃，知道自己是死不成了，絕望地跪在地上。
「點解唔畀我死……」
「唔好死得咁快，我頭先咪講咗，我可以幫你囉。」別西卜微微一笑。
「你……會幫我……」父親抬頭看著別西卜，眼神裡既是期盼，又是懷疑。
「我知你會好疑惑，點解我頭先咁對你，但又要去幫你。我只係想證明畀你睇，我有咁嘅能力啫。」
「你……到底係咩……」父親在最後把那個準備吐出口的「人」字吞回肚內。
「嗯，請容我正式介紹，吾名為別西卜，乃地獄最高統帥。喺同你進行交易之前，我要同你講一個事實，就係喺你身邊發生嘅所有嘢，包括你老婆出軌嘅行為，你身上面嘅病等等。全部都係我做嘅。」
別西卜輕描淡寫地說出這個事實，要不是父親剛剛聽到太多接受不了的事實，這一刻大概已經跟別西卜拼命了。
「全部……即係全部嘢都係假……」父親無力地問。
「唔係假，應該話，全部嘢都係你自己諗出嚟，我只係喺側邊加強你嘅疑心啫。」
「加強我嘅疑心……」
「用講嘅方式太麻煩啦，都係你自己睇啦。」別西卜右手抓著父親的頭部，把和母親談判，要求小軒作為交易條件以外的記憶，都灌輸進父親腦內。
直到現在，父親總算知道，他和母親之間種種的懷疑，都是出於那一絲的不信任。
正常情況下，那不信任的種子，在沒有任何衝擊下，理應是不會發芽，他們應該能夠安穩地生活下去。
不過，別西卜為那種子灌輸了養份，令父親的不信任慢慢發芽，導致現時這種局面。
若然，父親能再多信任母親一點；母親又能多坦誠一點，結果可能會完全逆轉。
可惜的是，發生了的事情，已不可能改變。
「係你……係你……」父親明白了事情的始末，可是，他已無力去改變甚麼。
「嗯，係我做嘅。」和母親那時不同，這次，別西卜很爽快地承應了，一切都是他造成的。
「……」父親沉默地，用空洞的眼神看著別西卜。
「估唔到你比想像中冷靜呀。不過咁都好，我可以清楚同你傾下交易嘅事。」別西卜知道父親的心已經完全折服於佢，他有信心這次能得到小軒的靈魂。
「交易？」
「無錯，交易。頭先你都見到，我有能力令人起死回生，只要你願意，我可以將你老婆同你個仔復活。」
「復活？」
「係，我可以復活佢哋。」
「復活佢哋……」父親那空洞的眼神，恢復了一絲的生氣。
「我唔單止可以復活佢哋，我仲可以畀到更好嘅生活你哋。錢又好，樓又好，你哋想要嘅我應該都可以畀到你。」別西卜微笑著說，但這笑容背後明顯不懷好意，父親當然亦察覺到。
「你……你嘅條件係……」父親明白，天下沒有白吃的午餐，雖然他也想回復以往的生活，但是他亦明白，這絕不會是一項能夠輕易做到的事情。
「條件？好簡單啫。」別西卜把剛剛從小軒體內抽出的光球放在手上。
「我要小軒。」他淡淡地說出這個要求。
「無……無可能！」父親聞言即激動起來。
「唔好咁快拒絕我住，呢個世界無嘢係無可能嘅。你諗下，如果你唔應承就咩都無，但係如果你應承，至少一家三口可以喺返埋一齊。至於小軒，你咪當佢意外走咗囉。」
「一家三口……小軒……唔得！唔可以，我唔可以咁對小軒。」
「點會唔可以啫，小軒咁乖，佢應該都想你哋幾個開開心心咁生活㗎嘛。」
「小軒……但係……唔得……唔得㗎。」父親明顯在掙扎著，他當然希望家人能回來一家團聚，但他亦知道這一定要有代價，只是他想不到，這代價竟是他其中一個兒子 － 小軒。
別西卜看到父親猶疑不決，實在看不下去，決定推他一把。
「你老婆，我都有同佢提出呢個交易，佢原本準備應承我，不過，佢話畀將呢個決定交畀你。因為佢怕復活咗之後，你會因為小軒而怪責佢。」
「佢……佢真係咁講……」父親抬頭驚訝地看著別西卜。
「無錯，佢都好想一家三口開開心心咁生活，不過……佢顧及你感受先無做到決定。所以我先畀多次機會你哋，今次，你可以決定你同你屋企人，有一個點樣嘅將來。」別西卜笑著說，那一臉真誠的樣子，在知道實情的我看來，真的是極為嘔心。
「你講大話！佢唔會咁講，佢唔會咁講。原來……你想呃我，你想呃我，等我應承咗之後你就可以搶走小軒！」原來父親之所驚訝，是因為他察覺到，別西卜說的一切，都是謊言。
被揭穿了的別西卜，一臉不悅地看著父親。
「係，你老婆的確無咁講過。但係，你嘅情況係唔會改變！你一係就選擇全部一齊，一係，就選擇一家三口開開心心生活落去。中間發生嘅事，唔到你理。」
的確，無論別西卜有否說謊，父親的處境仍是沒有任何改變。
唯一不同的是，父親已知道別西卜並不是這般老實，即使他如別西卜所言，答應他的要求，到底最後能不能順利復活，仍是一個疑問。
而更重要的，是他不希望再傷害他的家人，他並不希望家裡的成員再受苦。
但眼前的，卻是使家人復活的最後希望。
在這情形下，父親只好作出決定。
「我……我唔可以交小軒畀你……」
「兩公婆都一樣咁蠢，好啦，你可以去……」別西卜的「死」字還沒有說出口，父親便打斷了他的說話。
「但係……我想我嘅屋企人復活……」
「哈，你真係唔係一般蠢喎，你覺得呢件事有可能發生咩？」由於父親的要求和母親的要求也是一樣，面對這樣愚蠢的夫妻，別西卜也忍不住笑了起來。
「我明白，要有代價......所以......」父親深深吸了一口氣，又再開口。
「你......你可以帶走我！」
「帶走你？」別西卜皺了皺眉。
「無錯，帶走我，無論你要我做咩都得，我都會聽你講。條件係，你要畀佢哋三個復活，等佢哋可以一齊生活。」父親堅定地說。
「乜你覺得，憑你可以換返佢哋三個條命咩？」別西卜冷笑了一聲。
「我......我只可以做到咁。如果你要更多，我......我無辨法。」父親下定了決心，寧願犧牲自己，也不可以再犧牲他的家人，他，選擇了以這種方式贖罪。
別西卜聽到後，本想一口拒絕，但他心裡也知道，是不可能得到小軒的了，預期比甚麼也得不到，能拿到手的就應該拿到手。
「好，我應承你，只要你將自己嘅靈魂交畀我，我保證令佢哋三母子一家團圓，永遠喺埋一齊。」
父親感到有點愣然，因他並沒有想到事情竟會這麼順利。
「你......你無呃我？你唔會反口？」父親再次確認。
「廢話，承諾對魔鬼係絕對嘅，不論邊個都好，都唔可以違反。只要你應承交出你嘅靈魂，任我操控，我就保證佢哋三母子一家團圓，永遠喺埋一齊！」別西卜再一次說出剛才的條件。
父親想了又想，雖然仍然感到奇怪，但他相信，情況不可能比現在更差。
能夠團圓，總比悲慘地離開這世界好吧。
「好，我應承你。」父親下定決心，以自己的靈魂，換取三母子的團圓。
在一旁看著的我，已猜到別西卜在玩甚麼把戲。
只是當時的父親並未能察覺別西卜的意圖，欣然答應交易。
「既然係咁，你將你嘅名字講出嚟，宣誓將靈魂交托畀我，從此任我差遣。」
於是，父親便聽從別西卜之言，說出誓言。
「好，我別西卜，接納你的靈魂，為我差遣。我將實現你的願望，令你的妻兒，再次團圓，永不分離。」
話畢，別西卜向父親伸出了右手。
「好，如果你決定咗答應呢場交易，就將你嘅右手手指公貼向我，此為締結契約之誓。」
父親沒有多想，便把右手伸出去，當他們的大姆指緊貼之後，一道暗黑的光芒把他們都覆蓋著。
看來，契約正式生效了。
回憶來到這裡，總算全部結束。
現在，我總算知道了無能鬼的過去，而我，亦大概知道，為甚麼我又一次會被盯上。
大概，別西卜也跟其他魔鬼一樣，對潛伏於我體內的那怪物感到興趣了吧。
不管怎樣，如果我的對手是別西卜，也總算能解釋到，為甚麼他能逃過炎冰的追踪了。
只是，這個實在算不上甚麼好消息，看來我要趕快把這情形告訴天命叔了。
我拿著最後一個記憶球體，把它放好後，整個記憶空間開始崩壞，接下來，我應該會回到公園去吧。
不知道無能鬼在取回這些記憶後，會有甚麼反應和行動呢？
既然他不能違抗別西卜，我還是不要寄望太多比較好。
此刻的我，雖然對事情已經了解得七七八八，亦認為可以開始進行反擊，
卻萬料不到，在回到公園後，竟會發生這樣的事情。