簡介

人海茫茫,莊清源在中學遇上陳泳彤。 第一次感受愛情,酸甜苦辣在彼此關係之中反覆出現。



「早晨,我叫莊清源。」我心入面係到諗,就咁介紹自己個名會唔會太簡單?

「你好呀,我叫陳泳彤。」佢露出嗰個笑容真係世界級,簡單啲講就係好親切。

我地相識發生係八秒之內,而我地既關係斷斷續續維持左八年。

「你讀書好叻架?」佢咁樣問我有啲反應唔切。

「其實都係負負碌碌先升到上黎架咋!」係佢面前我又唔想認叻,唯有答個係人都用過既答案。



「你都唔差呀,唔係我都冇機會同你一班!」突然靈機一觸就講左呢句。

「哈哈!」雖然佢只係笑左一笑,但我都已經好滿足。

點解佢會問我呢個問題?因為我係由C班升上黎A班。

正因為我係C班升上黎,我英文堂係要去同第二班上,類似係特別班咁。

經過第一堂英文堂既洗禮後,我即刻同呀彤訴苦!



「英文堂,兩個字,好悶!」我望住佢講左呢八個字。

「拿,我就講左八個字,不如你比番八個號碼我啦!」我真係單刀直入問佢拎電話!

「下?」

「你想要我電話號碼做咩呀?」佢充滿疑惑咁問我。

「有左你電話號碼,我地咪可以SMS囉!」



「你每上一堂英文堂我就比一個數字你,咁你上堂會唔會開心啲呀?」

為左得到佢既電話號碼,我諗都唔諗就答:「好,一言為定!」我心諗,一星期四堂英文堂,兩個禮拜就拎到,完全冇難度。

為左得到佢既電話號碼,我每日都好期待英文堂,我呢一刻最想就係一日上八堂英文堂!
已有 0 人追稿