終於完左呢個故事,全文共48220字,第一次出故,無諗過自己可以寫到咁多字出黎,因為中學時候已經唔係好鍾意作文。亦都好多謝有睇過呢個故或者由頭追到落尾既讀者。 開頭既時候真係好氣餒,因為每日都好少人睇,得數十個甚至得個位數,好幸運既係高峰期時有四位數字的人數。阿諾同我講叫我唔好咁著重呢D數字,呢D只係用黎滿足虛榮心。 但其實我想講呢D數字係對我地作者既支持,如果出一個故無人欣賞無人睇既,咁不如我自己打係備忘錄入面收藏。我自己都睇過好多個故,睇既時候我都認同有D人講留言打句「加油」有鬼用咩,但當我搖身一變成為作者既時候,我就明白到簡單的支持都係一種鼓舞,所以每一個讀者既觀看,以及好簡單既一句「加油」,對我地黎講都係一個支持。 呢個故寫到中期開始就更新得好慢,一黎我本人懶,二黎我心入面希望唔好咁快完呢個故,因為有種感覺係一完左個故,就好似要徹徹底底咁放低「她」一樣。寫既過程中,望番之前的對話記錄,雖然已經隔左好耐好耐,但當時既感覺﹑感受仍然清清楚楚記得,甚至寫寫下諗番起某D情景都會喊。 有某D細節位因為隔左太耐所以唔係記得太清楚,同埋有D部份都因為記憶有小小模糊,所以靠自己的感覺同埋想像作出黎。有人可能問我,點解無重甜嫁?咁事實係因為我地之間的確無發生過關係,阿諾都有話過寫多D甜咪可以吸引多D人囉,但我唔想作D假既情節黎破壞左呢個記錄我同「她」之間的真實回憶。 所以個結局可能有人覺得,屌!爛尾既仆街。但我想講既係我同「她」之間既結局真係咁樣,當時既我都無諗過我地最後係咁樣完左,咁兒戲。寫緊既期間我都有諗過寫個HAPPY ENDING出黎,就算現實中我地唔可以係埋一齊,起碼係呢個故事到我地可以完滿。不過最後我都無咁做到,因為如果咁做,咁呢篇文就會成為真真正正既「故事」。 若果有好多讀者表示好想睇到HAPPY ENDING既,我會認真諗下點寫一個幸福美好既結局出黎,了卻讀者同埋「當時的我」的心願。 我諗我之後應該都唔會再出故,因為我覺得鍾意欣賞人地既故比較輕鬆,自己出故真係會寫到好攰,會好想停低﹑放棄唔寫落去。最後最後,再一次多謝大家睇呢個故,支持我,無論感唔感動到你,你鍾唔鍾意呢個故都好,真係真係真係好感激每一位讀者。多謝大家,有緣再見!