林生示意 Jenny 收聲, 「得嘞得嘞, 我教仔自有分數, (語氣又變番平靜)係呢, 入面果三個人睇樓睇成點呀? 如果佢地啱嘅就叫佢地快啲去地產舖度簽埋啲租約先嘞!」
 
林生行左去後梯果便, 跟住見佢又好大聲咁講, 「我而家有事要走先, 一陣佢地睇完樓你記得同我熄燈同鎖門至好走呀衰仔!」
 
林生搭 lift 走後, 仲呆企住嘅 Jenny 就開始緩步行去後梯處。
 
見林生個仔響女廁入便正好認真咁清潔住, Jenny上前叩左兩吓木門, 「林生, 林生…」
 
林生個仔望吓 Jenny 一眼, 跟住見佢居然苦笑住咁搖一搖頭。
 


Jenny 有啲內疚咁講, 「得架嘞, 個廁所已經好乾淨架嘞!」
 
但林生個仔就依然繼續響度四圍咁抺住。
 

 
林生個仔邊抺住地邊再講, 「係我自己唔啱在先, 所以唔怪得呀爸佢會咁嬲嘅!」
 
Jenny 問佢, 「你係叫做日生呀?」
 


個男仔笑左一笑, 「係呀, 不過啲 friend 成日都將我呢兩個字當係星字咁讀, 所以啲人就叫我做猩猩仔囉!」
 
Jenny 聽到後就卡一聲笑左出黎, 「猩猩仔? 叫猩猩仔都幾得意吖, 係呢猩猩仔, 就黎食 lunch, 咁不如一陣就一齊出去食飯好唔好呀?」
 
猩猩仔聽到後, 居然好似有啲唔係幾信呢句說話咁, 「吓, 妳話叫我同妳一齊出去食飯?」
 
酒樓上, 猩猩仔除左同 Jenny 坐埋一齊之外, 同檯嘅就另外仲有一個肥佬, 一個鬍鬚佬同一個大舊佬響度坐埋一齊。
 
蠻佬頭先略略瞄到走廊出便發生左啲咩事, 「嘩猩猩哥, 睇你年記都唔細架啦, 咩你老豆仲會對你郁手郁腳架?」
 


又到老馬講, 「喂細路, 你老豆係唔係有燥狂症架? 定係佢見你生得咁大隻, 所以得閒就當你係沙包咁用黎練拳呀?」
 
我又同猩猩仔講, 「唉, 孩子需要愛, 但佢成日都咁打柒你, 而你咁大個人都唔識得同佢講番話唔好, 咁樣落去都唔係辦法過喎!」
 
Jenny 又同猩猩仔講, 「其實講真我都有啲唔啱, 如果唔係我喝佢, 佢就唔會淝到廁所四圍都濕哂, 不過你又做咩要走去女廁度痾尿又唔關門架?」
 
猩猩仔一面無奈咁講, 「男廁修理緊, 所以其他人都係去女廁度痾, 不過算啦, 呀爸佢由細到大都係咁對我嘅, 但其實我做咩佢都唔會理我嘅, 但總知就唔好搞到要比人鬧, 比人投訴, 呀爸佢好要面架, 佢覺得如果有人話我, 就即係代表佢無家教, 所以好似頭先咁呀爸佢咪就郁手打我囉!」