「唉, 都唔知妳會唔會信, 其實…我…響咁多年黎, 我響夢中好多時都會夢見同一個女仔, 但好奇怪, 我響夢中同佢居然好似發展到情侶關係咁, 呢…即係啲夢係有連貫性咁樣嘅!」
 
Jenny 笑住講, 「咁得意, 咁你地響夢中咪過得好開心!」 「係呀, 真係好開心架, 就係因為現實中我唔敢再響香港度識女仔, 所以我而家每晚都好期待同好早就會上床去瞓覺架嘞!」
 
等左一陣, 猩猩仔又再講, 「呀, 仲有一樣野, 你睇吓!」
 
猩猩仔遞左個銀包比後座嘅 Jenny 睇, 「我將夢中呢個女仔個樣畫左出黎放響銀包度, 而我每次望住呢幅畫, 個心就覺得我同呢個女仔就好似真係響埋左一齊咁樣, 不過陳小姐, 其實妳個樣同佢又真係好似架!」
 
Jenny 望吓猩猩仔攝響銀包入面果幅手繪畫, 幅手繪畫得好靚, 但亦同時將 Jenny嚇左一跳, 畫中個女仔好後生, 但個樣同 Jenny確實又真係好相似, 而另一樣更為特別嘅就係, 畫中嘅女仔身上亦係著住一套火紅色嘅衫裙, Jenny 睇完之後正默不作聲
 


猩猩仔再邊揸住車, 邊自言自語咁講住, 「其實, 我有一個夢想, 就係有朝一日, 響我夢中呢個女仔能夠會好實在咁響我面前出現, 而我如果可以同佢共對倒一日我就已經心滿意足架嘞….」
 
猩猩仔再靜左一陣之後, 「哈哈哈, 我真係好傻, 居然連日頭都仲響度發緊夢, 講吓啫, 呢啲事又邊有可能會發生吖!」
 
Jenny 終於都開口問, 「咁其實響你夢中呢個女仔係叫咩名架?」猩猩仔好認真咁回答, 「我叫佢做惠心, 亦即係我以前女朋友個名!」
 
好快, 車亦已經到左深井 Jenny 想到嘅目啲地,  Jenny 落左車後, 跟住就行去司機位旁邊問住猩猩仔, 「喂, 我可能遲啲會有客睇你地個單位, 咁唔知到時我直接搵你上去開門得唔得架?」
 
猩猩仔話可以, 就係咁, 兩個人交換左電話之後, Jenny 就轉身要趕住去見客人傾野嘞。
 
幾日之後, Jenny 真係打算帶啲客上去林生個商業大廈單位度睇吓, 電話正在撥號, 「喂猩猩仔呀, 林小姐呀, 今日下晝我想帶兩個客上黎 15 樓度睇吓, 唔知你…..」 
 
「林小姐, 不如….妳都係直接打電話搵我呀爸約時間啦, 我而家響屋企度執緊野, 後日我就要出發去澳洲架嘞, 我….我真係唔可以再忍我呀爸嘞!」
 
「猩猩仔, 你呀爸又真係有啲過份左啲, 但你真係決定左後日就要走嗱?」 猩猩仔好斬釘截鐵咁講, 「係, 我真係要走, 如果我再唔走嘅話, 我睇怕下半生我都唔可以再正常咁生活落去!」
 
猩猩仔再好無奈咁講, 「林小姐, 我好慶幸臨走前都可以識倒妳, 不過….唉, 算啦, 好嘞, 妳就直接搵我呀爸約時間睇樓就得架嘞!」
 
講完, 猩猩仔就收左線。