醫院免費幫我換咗鋼鐵J

我第三次剪開自己包喺條Ｊ上嘅繃帶，女神級咁靚嘅醫生拎住相機，由唔同角度影低我腫脹咗嘅細佬。
 
如果你認為係AV情節，仲有制服誘惑，好想做我，咁唔好意思喇，你要經歷咗男人最痛先囉。
 
女醫生第三次公式化咁問：「你點解搞成咁？」
 
已經好冇面喇，仲要我講第三次？但我知道反駁都冇用，唯有細細聲、擒擒青咁答：「我尋日放咗工走去秘撈，諗住儲多個錢快啲買樓。之後返到間劏房，老婆突然間想要，我想滿足佢，但實在太攰，結果做做下瞓著咗。今朝細佬仲係腫，我老婆又乾咗，一抆出嚟咪整損囉……唉，張床淨係夠一個人瞓咋──」
 
醫生一字不漏抄低我講嘅野，打斷我嘅說話，「恭喜你，你入選咗政府嘅免費醫療試驗計劃，今次入院一切費用全免。」
 




一聽到免費，我個心先定啲，家庭開支咁大，冇啦啦俾成一千幾百睇醫生，真係醫返都有排捱麵包。不過突然請假，睇個款都唔知幾時出得院，如果就咁俾人炒魷，就劏房都冇得瞓。到時唔好話性空間不足，係性空間都冇埋添。
 
「醫生，咁幾時開啲藥俾我？我幾時出得院？」
 
點知佢笑笑口，「我唔係醫生，係呢項試驗計劃嘅記錄員。程序上，係要做好診症報告先，再等審批完，先至會有醫生嚟醫你。」
 
「唔係掛，我條J腫咗、損咗，頂籠咪發炎，開啲消炎藥膏咪得囉。唔好阻住我搵食呀！」
 
「我哋嘅免費醫療程序唔容許咁樣，隨時會資源錯配同醫壞人架。」
 




「咁煩，我唔要免費喇，快啲開藥俾我，我要出院！」
 
佢收起笑容，恐嚇咁款，「唔得，你唔參加計劃就冇假紙。」
 
冇假紙咪即係曠工？即炒啦！我當堂冇曬符，任佢哋舞。
 
記錄員問多幾句，影多幾張相就走咗。我拎過條繃帶，又包返住損咗嗰度，好似痛得勁咗添。
 
死啦！我細佬會唔會……我好驚，瘋狂大叫：「我要見醫生呀！」
 




記錄員行嚟望咗我一眼，又抄低啲筆記，只係答：「醫護人手短缺，醫生唔係隨便見病人架。」
 
吓？成間醫院咁大，有乜理由一個醫生都冇，反而係記錄員嚟問長問短？
 
我嘈足三日，都冇醫生嚟睇我，反而係傷口好返曬。咁我咪叫老婆嚟辦出院手續囉。
 
點知呢個時候，終於有個醫生走入病房，笑笑口話：「恭喜你，手術許可已經批咗，今晚就可以做手術，請簽咗份同意書佢。」
 
「痴線！我都好返曬，仲做咩手術？我要出院呀！」
 
「如果你選擇唔進行治療，就要俾返住院費同醫療費。」醫生睇睇文件，個樣木曬，「多謝一百萬零九千七。」
 
（待續）
 
星期四晚出下集，夠10個Share，就星期三晚出 XD




 
鍾意嘅，請Like & Share！Follow埋專頁，睇文快一截！
更多系列：https://goo.gl/QcXrPe
專頁：https://goo.gl/FVN3Pb
 
#余該隱 #短篇 #小說 #廣東話 #短篇狂想 #短篇小說 #醫院 #免費醫療計劃 #鋼鐵J #ironJ #變身ironman第一步