每個人，都試過鍾意一個讀VA既女仔: 第十二章

「嘟嘟……嘟嘟……」
 
電話一下一下的響著，理性也開始攻擊大腦，爭論著到底應否打電話給她呢？我這樣做會不會煩到她呢？也許她正想獨自安靜一番？
 
依家Cut線仲嚟得切。

「嗯……」正當我帶著半分失落的心情掛上電話時，裡頭傳過了一聲﹕「喂？」

仆街，佢聽咗。
 


「對唔住呀……我唔係有心煩到你架……如果你想自己一個靜吓既話我……」我自顧自的辯護著，誰不知她竟插了話﹕「得唔得閒聽我講兩句？」
 
「唔好話兩句呀，兩個鐘我都願意聽。」
 
「啱啱執屋既時候，我見返我同佢影既相同埋佢送俾我既野……點解？點解佢要離開我？乜我真係咁差咩？乜我真係比唔上佢新嗰個咩？」
 
「咁係因為……係因為佢唔識得珍惜你既好啫……」說實在，我不懂得如何去安慰人，從來也不懂，只會說著一些老套廢話。
 
「你知唔知……我每日返學放學，都會見住佢地兩個成雙成對咁，係有幾辛苦呀？我仲要同條八婆一齊上PE堂，你知唔知我忍得幾辛苦呀？」
 


「我知……」我根本就沒有戀愛經驗，又如何得知有多痛苦呢？不過為了讓她向我宣洩更多，也只好附和道。
 
「我地一齊咗咁耐，點解佢一句話走就走？條八婆到底有咩好呀？」聽她的聲浪開始漸大，便知道是時候緩和她了。
 
「咁你唔好理佢地咪得囉。」
 
「我日撚日都對住佢地兩個呀，點唔理呀？」
 
頂，我係咪講錯咗啲咩？
 


「其實……你鐘意點樣既男仔？」我知道此時此刻問這記問題是有點風馬牛不相及，但大腦不知為何命令著嘴巴問道。
 
「有上進心，可以俾到安全感我……」話筒另一頭傳來數秒空洞的聲音後，她繼續說﹕「同埋我知道我係一個好任性既女仔，所以佢一定要係強勢，可以管得住我。」
 
第一點和第三點我也可以理解得到並能夠具體化，但是第二點總是讓我有點不解﹕「點樣先算係有安全感？」
 
「一種感覺，冇得話可以特別做出嚟，只要個女仔響你身邊就可以搵到安全既感覺，就係安全感。」
 
讓我先簡單來概括一下她所的話﹕安全感等於一種安全的感覺。
 
頂，咁你同冇講又有咩分別？
 
「咁……難理解既？」說罷，兩方都未有再作任何補充。但我在數分鐘之前已經得知她正在畫畫，因此不能再問她正在幹什麼……
 
快，麥俊傑，快想一下有什麼話題﹗


 
「如果你唔介意既話……」看來，我硬著頭皮也要問道﹕「不如你帶齊你前度既野，聽日攞晒俾我，等我幫你保管住啦。」
 
「點解？」
 
「因為……我唔想你每次見返起都會諗起啲唔開心既往事，我唔想你睹物思人……」我嚥了一口唾液﹕「我唔想你唔開心。」
 
我安坐下來，地球彷彿停轉了般，正等待著Cynthia的答覆。桌上的時鐘也沒有轉動，時間在這一瞬間……
 
停止咗。
 
「嗯。」
 
佢同意呀﹗
 


這單字，令世界再次充滿生機，我的生命也被填滿了色彩。再望著桌面上的時鐘，依舊未有轉動。
 
因為嗰個係電子鐘，冇時分針。
 
「咁……聽日見啦……」
 
「你呢？」被她突如其來的一問，害我一時不能給予反應，本能反應的「嗯？」了一聲。
 
「你有冇試過……分手呀？」
 
聽到這一句時，不禁苦笑了數聲以掩蓋住我的失落﹕「我都未拍過拖。」
 
「未鍾意過人？」
 
「有掛……我都唔知算唔算，反正都係小學啲所謂既愛情啫。」依稀記得那時還用Yahoo知識發問，問人拍拖的定義。


 
諗返轉頭，都真係幾白痴吓。
 
「咁你有冇留低佢同你啲野？」
 
「有，我有留低佢送俾我既盒。」可惜的是，我留下來的原因只不過是因為那幾個盒外觀精美，想說可以轉送給別人。
 
「不如咁啦，聽日大家都攞大家之前啲野嚟交換，幫大家守護住對方既往事，等大家唔好再因為諗返起之前既事而唔開心，好冇？」