每個人，都試過鍾意一個讀VA既女仔: 第二十章

「A班既同學唔該安靜少少啦，我地依家係火警演習，唔係落嚟玩，唔該認真啲。」訓導主任手持計時器，分秒必爭似的。
 
不消一會兒，全校師生都站立在操場，等待著台上訓導主任的發言。
 
「嗯……我地今次火警演習係用咗八分十五秒，雖然響黃金十分鐘之內完成到，但係我覺得可以再快啲﹗」訓導主任似是而非地報告著。
 
「喂，佢上次唔係話黃金八分鐘咩？做咩變咗十分鐘架？」加拿大仔在我身後探頭問道。
 
「你聽佢吹啦，唔通佢大大聲咁話我地唔達標咩？佢講咁多野只不過係想同校長講我地有做到野，好勁架咁樣囉。」我隨手指著站在一旁，細心聆聽著的校長。
 


「好，今日既火警演習就去到呢到，大家可以放小息啦。」訓導主任說罷，同學們早已雞飛狗跳，衝到去小食部購買零食。
 
「喂，肥正你去邊呀？」此時，我覺得我活在一個戰地記者，在槍林彈雨的環境下求存。
 
「我去搵我條女呀，你同加拿大仔慢慢食啦﹗」肥正頭也不回的說道，並背著我們揮手。
 
「算啦，咪俾佢地見多陣囉，反正好快就散架啦。」加拿大仔不忘他的嘴賤功力。
 
我和加拿大仔就這樣死命地擠進在小食部前，裡頭的小食部呀姐忙得非常，有時我倒是十分好奇到底他們是如何飛快地計算出食物價格。
 


「屎忽﹗」
 
身後傳來一把十分熟悉的聲音，而那個花名……正是我和cynthia的秘密花名。

「做咩呀？」我連忙放棄購買的機會而回頭一看，果不其然看見cynthia正向我招手。
 
「我插唔到入去呀，可唔可以幫我買包麥精呀？」
 
很快，我手上就拿著一包麥精和數袋食物。
 


「唔該晒你呀。」cynthia把四元放在我掌心後，便和友人離去。
 
「二等兵報到﹗」
 
「你又講乜野呀……」我沒好氣地把袋中的雞翼直接擺進口中。
 
「唱首歌過你呀，我什麼都不是，我是二等兵士……」
 
「喂，麥俊傑你過嚟。」為什麼今天那麼多人叫喚我的名字？
 
「做咩呀Miss.Tin？」儘管我心知不妙，但還是硬著頭皮步近Miss.Tin。
 
「咁到底個女仔係邊個姐？」

……



你叫我點會估到佢記得之餘仲要面對面咁問呢？咁我除咗直話直說之外，仲有咩方法？
 
「佢今年中五架。」我嘗試輕描淡寫地帶過。
 
「咦？向高難度挑戰學人追師姐呀？」Miss.Tin驚喜得一時忘了還在熱鬧的操場，大聲地叫嚷著。
 
「係呀係呀，你可唔可以唔好同人講……」我頓時覺得自己無地自容得很。
 
「可以係可以，不過你又唔係唔知自己英文有幾差架啦，所以我唔希望再見到你掛住溝女而唔讀書呀。」
 
「冇問題﹗」加拿大仔一個箭步上前搶答道﹕「Miss.Tin你係咪搵我呀？」
 
「唔係呀，我都差唔多夠鐘上堂啦，再傾啦。」
 


就這樣，整個操場彷彿只剩下無奈的我和眼紅的加拿大仔。如若要把這場面拍成電影，想必會有數片落葉在微風之中掃過。
 
「我女神搵你做咩。」
 
「你估吓？」
 
其實還真的沒什麼，但當我看見加拿大仔這個不憤的樣子，我打從心底裡暗笑起來﹕「其實Miss.Tin大你咁多，啲人成日都話三年一個溝，你地之間都起碼成三四個。」
 
「咁又點呀？我相信真愛係無分年齡既﹗」只見加拿大仔自信滿滿，仰首感嘆道。
 
「係咩？但係我啱啱聽Miss.Tin唔係咁講喎。」有見如此，我決定再次戲弄他。

「你好講啦喎，到底佢同你講咗啲咩呀？」
 
「追到我咪同我講囉﹗」我隨手把他推開，害他一時失去平衡，未能作出反應。而我則立馬從人群中穿過，好讓他不能看到我的身影。


 
你地都覺得我係當緊兵咩？