「竟然?你都差唔多直頭問到可唔可以做佢條仔啦喎,咁都可以唔知答咗你啲咩?」肥正一臉難以置信的說道。

「大佬你下下講啲唔講啲,邊個會聽落去呀?佢答咗你啲咩呀?」
----------------------------------


「代替佢?我好憎佢喎。」cynthia叫了她平時食的餸菜後,百無聊賴地按著電話﹕「定係你想我好似佢咁憎埋你?」

「唔係﹗」看來……她是不明白我所說的話背後的含意。

然而,我有一個預感,就是這頓飯,我和cynthia將會亳無話題可言,只顧自己默默地食著自己的米線。



「係呢……其實你地平時VA呢,有咩做架?」我隨口問了一道實情我不太關心的問題。

「吓……你冇啦啦咁問呀……」cynthia乾脆放下筷子思索﹕「就係不停咁做SBA囉。同埋因為我係讀設計,所以都係設計吓唔同既野。」

「例如呢?」

「我最近就要設計一個環保袋,我俾你睇吓啦﹗」cynthia在手機中按兩按,展現出一幅設計圖﹕「我個同學個男朋友呢,跟住佢幅設計圖嚟親手整咗袋出嚟呀﹗」

唔係真事呀嘛?咁勁?



「咁如果有人肯幫你整返個呢?」我打趣地問道。

「直頭同佢結埋婚都得呀﹗做咩呀,想整個俾我咩?」

咦?cynthia這句是只是單純的寒暄,還是有弦外之音?

「不過一睇你個樣就知你冇乜VA細胞架啦,算吧啦﹗」cynthia搖搖頭,繼續埋首於米線之中。

「好話啦,我由細到大,VA又真係好似未合格過。」



「其實你有咩叻呢?」

「嗯……」一路覺得平平無奇的自己,突然被人如此一問,的確令我有點兒啞口無言。

「寫吓野囉……再唔係既我游水都OK架﹗」我嘗試從零碎的嚐好中找到兩項較為良好。

「識游水真係好,我由細到大都唔識游架,我都好想可以去沙灘玩水……」

「因為忙所以去唔到?」我問了一道無關痛癢的問題。

「都話因為唔識游水囉﹗」

「對唔住……」我不知她是否真的生氣,只好先道歉來。

「冇……」cynthia也好像感受到剛剛由自己身上發出的怒火﹕「下次啦,等我減完肥之後陪我去沙灘呀。」



「好呀﹗」

其實我完全明白cynthia這句話只不過是是用作打圓場之用,先別說什麼減肥是女生的終身事業,光是她的語氣也不難聽得出她是敷衍著我。

不過唔緊要呀,起碼之後約佢去沙灘又可以多個藉口﹗

「話說你幾時生日架?」

「七月一號囉,做咩呀?」難不成cynthia也在拼命地尋找著話題嗎?

「咦……咁咪姐係巨蟹座。我三月二十三號出世架,所以我係白羊座。」cynthia計算著我倆的星座屬性。

「咁所以呢?」



我倒是想不到外表看似理性的她,原來對星座運程還是有一點點研究,反觀我到了現在,連十二個星座都未能背誦出。

「我記得巨蟹同白羊好襯架,直頭係天作之合﹗」不是吧,難道上天連這個也安排得如此周到?
----------------------------------


「咦?」肥正在電梯前止住了步,害我和加拿大仔一時未有注意而撞上。

「依家姐係點呢?你啱啱買起咗個電梯?」加拿大仔硬把肥正推開,好讓自己能登上電梯。

「嗯條女……睇嚟唔係小兒科,兄弟你要小心啲。」

「何出此言呢?」

「大佬佢一時就撓住你姣吓你,但係一時又有意無意咁提起佢之前條仔咁,睇嚟唔係咁簡單喎。」肥正神情若有所思似的。

「咁大師有咩高見?」加拿大替我關心起來。



「你估條女……會唔會真係搵傑哥仔做水泡呢?」

「食屎啦你﹗」待電梯到了下一層時,我搶先一步踏出並立正﹕「我麥俊傑,要正式去追CYNTHIA﹗」

……

「依家又姐係點呢?到底部電梯係肥正買咗定你買起咗?」