「唷,等左好耐?」
 
我:「唔係,一陣啫。但點解你會著住校服?而家應該仲係暑假先係架喎…」
 
我同緊邊個講野?咪係藍洛晨晨哥囉,今日係佢約我出黎,話要比野我同埋傾下偈咁。
 
咁我又係邊個?啊係喎未自我介紹添,我叫…是旦啦,我叫陳煒明,今年準備升中五。
 
一年前,校長條八婆…啊唔係唔關校長事,而且我以前校長係男人來的。
 




上年我係自己學校可以話搞左好多事出黎,最後我仲決定退學,所以而家就搵左間新學校,正正就係晨哥既學校。
 
晨:「哦,Form 6暑假要UT嘛,我今日先考完最後一科,所以咪著住校服。」
 
「唉唔講咁多廢話了,嗱呢D係比你同你班女朋友既。」
 
佢講完就將一個銀色手提箱放上檯面,仲打開左佢比我睇。
 
入面既係一套套校服,有男裝亦有女裝。
 




我:「你又知道我地既Size既?」
 
晨:「屌,呢D小事你覺得難到我咩,不過我唔知學校會安排你地入邊個社所以我未有幫你地準備運動服。」
 
我:「哦…其實呢d小事我地自己搞咪得囉,邊洗麻煩你專登為我地準備…」
 
晨:「嘛,為朋友邊有咩麻煩唔麻煩,而且又係May姐叫我照顧下你地既。」
 
二家姐?真係吖,當我地仲細咩。
 




不過原來二家姐又係我地睇唔到既地方為我地做左野。
 
我好似林峯咁傻笑左一下,不過好快就比晨哥打斷左。
 
晨:「期唔期待係我學校既生活?」
 
我:「老實講,與其話期待,不如話我而家好緊張同不安仲貼切。」
 
晨:「哦?點解咁講呢?有乜令你不安?」
 
我:「頂咁要去到一個新環境點都會有不安架啦,你唔會架咩?」
 
晨:「咁我又真係無試過會咁喎,不過點都好啦,唔會有咩事,大家都係好孩子黎。」
 
佢講完之後就企左起身,拍左自己套衫兩下,好似係準備離開咁。




 
我:「走嗱?」
 
晨:「而家都無野要同你講啦,下星期一再見啦。」
 
下星期一..?係喎開學日黎…
 
當我諗到呢件事個陣,晨哥已經走左,只留低左個銀色手提箱。
 
佢真係來無蹤,去無影。
 
之後我就一個人帶住個手提箱返屋企,但屋企居然一個人都無,成個屋冷清清咁。
 
大家都出哂去啊…?
 




「返黎嗱?咩黎架個箱。」
 
嘩屌!!!嚇死人咩!!
 
二家姐突然係我耳邊同我講野,嚇到我幾乎成個人彈起。
 
我:「二家姐!!你行路無聲既!?」
 
二家姐:「乜你咁細膽架,你係咪男人黎架。答我啦個箱入面咩黎架。」
 
我:「哦哦…無啊呢箱係晨哥幫我地準備既校服咋嘛。」
 
二家姐:「校服…係喎你地下星期就去阿晨間學校讀書,點呀心情如何?」
 
我:「無,有小小緊張咁囉。」




 
二家姐:「嗯,去到新學校好低調d啦,你知你成舊磁石咁專吸麻煩野架啦。」
 
駁唔到,真係駁唔到。
 
我:「eh…Sarah佢地呢?」
 
二家姐:「大家都同左大家姐佢地出左去玩啦。」
 
哦唔怪得屋企一個人都無啦。
 
我:「咁你又係度既?你無跟佢地去玩?」
 
二家姐:「今晚有流星雨睇,我要留係度睇。唔講啦我返上房先。」
 




二家姐無等我做反應就撥一撥佢個把最近染既紅色長髪,自己一個行左上樓。
 
啊係,佢係我二家姐,不過都只係一年前發生既事。
 
無錯,又係一年前,我多左四個家姐,一個細妹,慢慢慢慢仲有五個女朋友。
 
佢地個個都對我影響好大,可以話係佢地咁多個成就左今日既我。
 
雖然我仲係一個無乜用既人,不過多得佢地,我多左好多朋友。
 
「新學校…新校服…」
 
我自己一個坐係自己床上面,望住掛係衣帽間既兩套校服。
 
一套係聖所羅王書院既校服,另一套則係新學校既校服。
 
唔知點解,望住呢兩套校服百感交雜。
 
算啦,船到橋頭就自然直,唔好諗咁多啦,去搵下阿惠玩仲好。
 
我將Sarah佢地個幾套校服放哂係佢地間房,仲將Anna佢地個D都放低埋,留低左張字條叫Sarah交埋Anna佢地。
 
之後我都無再理呢件事,而係放開懷抱咁去玩,大玩特玩。
 
轉下眼,今日就已經係九月一號。
 
我好早就起左身,梳洗左一番。
 
但我打算換衫既時候,我居然拎起左聖所羅王既校服。
 
哈,睇黎一時三刻都未必改到架啦,都係搵Yui幫我收埋佢啦。
 
我重新拎起新學校既校服,慢慢咁換上。
 
換完之後我去左照鏡,嗯,非常好。
 
好啦…落去啦…
 
我一步一步,慢慢咁行落去飯廳,但係我好快就嚇呆左。
 
大家居然都已經係齊度,明明我已經早左咁多起身。
 
Sarah同Yui仲同我一樣,已經換上左新既校服。
 
見佢地著校服其實都唔係咩新奇事,但點解我仲會有一種耳目一新既感覺…
 
新校服真係厲害啊…睇到我迷住哂添。
 
大家姐:「阿明~做乜望住Sarah同Yui望到入哂神啊~~」
 
大家姐一句話引起大家既大笑,連我自己都忍唔住笑左出聲,只好一邊搖頭一邊行過去。
 
我坐係Sarah同Yui中間,開始同平時一樣,食早餐,同大家傾偈,只係今日既話題有小小唔一樣。
 
Uncle:「你地三個今日返學啦喎?緊張嘛?」
 
Sarah:「小小啦~不過一諗到可以識到新既朋友就好開心~」
 
老母:「咁Yui呢,你又點啊?」
 
Yui:「可以同阿明一齊返學…我好開心…」
 
兩個都傻,嘻。
 
我:「Anna仲有Ellen佢地呢?你地有無約埋佢地一齊返學?」
 
Sarah:「原本係打算一齊返既,但Ellie話返新學校既第一日應該低調D,所以都係分開返啦。」
 
都岩,都係Ellie聰明。
 
食完早餐,我地終於準備出門,不過就係Sarah同Yui出左去個下,二家姐突然叫停左我。
 
二家姐:「阿明。」
 
我:「係!」
 
二家姐:「好好睇住佢地。」
 
我:「知道。」
 
呢d野係一定架啦。
 
之後我地三個就坐車去返學,為左低調,我專登叫司機係學校附近放低我地,等我地自己行去學校。
 
係行去學校既途中,我見到有好多著住同我地一樣校服既人。
 
呼…唔知我個班既人會係點架呢…
 
話咁快,我地已經行到去學校門口。
 
有一個人企左係度,望住我地三個。
 
佢唔係其他人,佢正正就係晨哥。
 
晨:「喲,歡迎你呀阿明。」