「無啦啦多左幾個家姐同細妹 Season 2」: 走開
我敢講，全場既眼光都集中係我地五個人身上。
咁諗都係正常不過，畢竟我地可以話係主角。
但始終都係未慣，比咁多陌生人望住既感覺真係唔好受，硬係凝住佢地係度笑緊我咁，搞到我只係敢望住個地下黎行。
呢下舉動居然比大家姐睇到，佢一個批踭令我即刻抬返起頭。
大家姐：「dup到個頭咁低做乜呀，怕踩親d蟻呀？」
我：「咪玩啦大家姐…你知我其實…」
大家姐：「傻豬，大家姐我梗係知你諗乜，但唔洗怕喎，呢度係我地主場黎架嘛，邊有人敢笑你？」
我：「講係咁講啫大家姐…但我既身份…」
大家姐：「嘿，你身份咪我既好細佬，Auntie既乖仔囉！黎抬起頭！再dup低大家姐就嬲架啦。」
俾佢咁樣話法，我都無辦法再將自卑放到咁大啦。
不過抬起頭望一望周圍先發現，原來其他人望住我既目光已經唔同以前，無左個種睇唔起我既感覺。
Sarah：「阿明你做左咁多轟動野，仲邊會有人敢睇唔起你吖。」
轟動野…點解我聽落好似係度串緊我咁…
我一邊行一邊搖頭，最後終於比我行到去我地張檯，終於可以坐低。
咦，但係一馬當先既二家姐唔係度既？
Yui：「二家姐呢..？」
大家姐：「係喎，佢又去左邊呢，佢件披肩係度架，等我去搵下佢先，你地三個乖乖留係度，Daddy佢好快黎架啦。」
Sarah：「知道~」
大家姐之後就離我地而去，去搵二家姐既蹤影。
而家先發現，原來我地張檯係正中間對正個台，可以話係主家席。
咁都正常既，呢個係Uncle公司既Party，我地要坐中間都合情合理…
Yui：「阿明…俾你。」
就係我自己不停諗野既時候，Yui突然遞左張紙巾比我。
我：「咩事呀Yui，做乜突然遞張紙巾比我？」
Sarah：「你成頭都係汗呀…你係咪唔舒服呀其實？」
成頭汗？咦係喎…唔只個頭，我背脊都濕左既？
我：「哦，可能D射燈太熱啫，我無事。」
其實我都唔知點解自己會出汗出到咁，但有一樣野我好清楚，自從坐低左之後我就有種好奇怪既感覺。
我唔識形容呢種感覺，總知就係有少少唔自在既感覺，可能係我Newtype既直覺？
啊，熄左燈，睇黎終於要開始啦，但係大家姐佢地仲未返黎，到底去左邊啊。
會場大部分既燈光都暫時關閉左，只係得返台上仍然有射燈照住。
有一個人，出現係呢遍射燈之下，無錯就係Uncle。
佢一出現就已經引黎全場既掌聲，Sarah佢地亦拍手拍到停唔到咁。
Uncle係呢遍掌聲之中慢慢行到去講台，過程亦面帶笑容，十足十陳奐仁咁。
當佢拎起支咪既時候，全場居然即時靜哂，佢自己既表情亦唔同左，變到好有威嚴，散發住一種令人難以接近既氣場。
Uncle講既野同係電視入面睇既差唔多，都係講返過去一年公司點點點，大家員工點點點，其實全部都係好無聊既內容，但我居然睇到好入神。
可能因為我從來未見過Uncle呢一面啦，以前一直都覺得佢只係曹總Level。
啊…如果係我一定做唔到咁啦，我肯定會嚇到唔知要講乜。
咦原來不知不覺Uncle已經講完野，會場既燈光已經全部著返，侍應開始上菜。
至於Uncle，佢同埋個個今日成日都無見過人既老母一齊重新出現係我地面前。
Sarah：「Daddy！」
Yui：「Daddy..」
Uncle：「嗯，乖，你地兩個家姐呢？」
我：「二家姐唔見左人，大家姐去左搵佢，但而家都仲未返…」
Uncle：「原來係咁，唔好理佢地啦我地食先啦。」
我：「但係…」
我只係講左但係兩個字，老母已經啤住我，我即刻吞返句野落肚。
睇黎老母知道D野咁喎…
就係咁，我地係無大家姐同二家姐既情況下開始食野，經過幾道菜，在席既賓客都開始紛紛係會場度流動，佢地都未返黎。
但Uncle好似完全唔在意，佢甚至離開左張檯，去同其他人談笑風生。
不過多得咁我先搵到機會問老母到底發生乜事。
我：「喂老母。」
老母：「斯文D啦衰仔，睇下場合好無？」
我：「噢…咁阿媽，你係咪知道二家姐佢地發生乜事？」
老母：「哦…知既，其實好小事啫，你二家姐就快大學畢業你知架啦，你Uncle想送佢去外國繼續讀啫。」
「你二家姐一聽到咁就發哂脾氣，仲即刻衝左出去，叫都叫唔住。」
我：「咁聽落都只係好小事啫，點解二家姐會咁大反應？」
老母：「咁我就唔知啦，阿曹都無講D乜。」
「走開，你坐左我個位。」
屌！！嚇撚死我！！
二家姐突然出現係我面前，仲望到我實一實。
好彩唔係講緊佢壞話啫。
我即刻讓位，仲退到九尺遠去同佢一齊返黎既大家姐旁邊，隔住條黃河咁望二家姐。
佢坐低之後繼續黑口黑面，就算一大堆美食佳餚放係面前佢都無動於衷，只係不停飲酒，一杯接一杯咁飲。
飲酒本來都唔係咩大問題，就算佢飲醉左我地都總有辦法抬佢返去。
問題就係…如果有人係佢飲醉左之後黎騷擾佢…唉屌已經有勇者黎嘗試啦。
有一位一睇就知佢好撚有自信既mk仔大搖大擺拎住兩杯紅酒走埋黎，最後停左係二家姐身邊。
Mk：「你一定就係曹家二小姐喇，你果然同傳聞一樣咁美艷動人。」
二家姐：「走開。」
MK：「我係域天集團既Le..」
二家姐：「我叫你走開…」
MK：「我地域天同貴公司都有好深厚既合作關係，我諗我同曹小姐你都可以…不如飲杯酒慢慢傾？」
一聽到飲酒，二家姐即刻望過去條MK度，仲一手拎左條MK手上其中一杯酒。
不過佢拎左杯酒並唔係要黎飲，佢一下就將成杯酒倒左係對方件衫上。
二家姐：「飲哂，同我走開…」
仆街了。