「無啦啦多左幾個家姐同細妹 Season 2」: 懷疑
所謂既新校規，其實就係之前晨哥同大家提過既野。
主要目標係解決由學會制度帶出既紛爭，即係好似book場呀，搞活動既日期之類。
如果雙方提出要透過呢條校規解決問題，個Case就會交去一個委員會，由委員會負責做訟裁。
委員會會有三位成員，一位訓導組既老師，學生會會長同一位學生代表。
今年既學生代表，就係晨哥，理由係呢一切都係佢既提議。
不過大家出奇地都非常接受晨哥成為代表，睇黎佢係呢度的確係德高望重。
大家聽左咁耐既週會之後都非常疲憊，個個都好似死屍咁走出禮堂。
好彩既係，而家係lunch time，可以去食飯叉一叉電。
係喎反正黑仔俾人罰緊，我可以去搵Sarah佢地食喎。
我即刻拎出我既電話，上group問有無人食飯。
但好可惜，結果大失我所望。
佢地幾個都話約左人食，得Ellie同Yui話可以。
唉有新朋友就連男朋友都唔要，無人性的。
我之後係學校門口同Yui仲有Ellie會合，我問佢地食乜好，佢地居然話帶我去試一間特別野。
我心諗：嘩你地咁快就已經熟哂呢頭？我呢兩星期都只係頹飯撈麵咋。
我懷住好奇心跟住佢兩個，最後去到既地方卻令我大失所望。
譚仔。
係喎…除左Anna之外我都無同過佢地幾個食過譚仔…
我：「Anna帶你地黎架？
」Yui：「你又知既阿明..？
」我：「無，入去先講啦，我都肚餓啦。
」lunch time既譚仔多人到好似金鐘站咁已經唔係咩新奇事，好彩我地行得快，唔洗等位。
一坐低Yui就不停咁同我譚仔既野，話佢有幾大規模，周圍都有分店之類。
睇黎呢D野都係Sarah話佢知架啦，再唔係就一定係Sarah帶住Yui佢去食，所以Yui知咁多。
算啦，難得Yui肯主動講咁多野，我就唔阻佢既興致啦。
我好細心咁聽Yui講既每一句說話，扮到我係第一次黎食咁，所有野都係新奇既事。
見到佢講解得咁開心，我都好開心。
佢黎左呢度之後好似開朗左好多，開始變到Sarah咁。
說時遲，那時快，三碗熱辣辣既米線已經送到去我地既面前。
不過，除左三碗米缐，仲有兩個人坐低左係我地對面。
無錯，係譚仔搭檯係一件平常不過既事，呢樣野Yui都有同我講，但係搭檯既人先係重點。
搭檯既人係阿希同Kathy。
衰仔吖。
我同佢都用一個淫賤既眼神望住對方，咩都唔洗講，大家都明白對方既意思。
Kathy：「哇阿明你咁好艷福既有兩位靚女陪你一齊食lunch。」
我：「eh…咁岩係學校門口遇到，咪一齊食囉。」
Yui：「阿明..佢係..？」
我：「呀係，佢係…」
Kathy：「係喎我未自我介紹添，我叫Kathy，係阿明既同班同學，同你地一樣都係今年既插班生。」
Kathy好爽快咁介紹完自己，仲伸左隻手出黎。
Yui似乎仲未習慣面對呢D處境，呆左一陣先識得伸出手去握手。
Yui：「你好…我叫曹泳琦，你可以叫我Yui..」
Kathy：「你好呀Yui~你個名都好日式wor有無興趣加入我地日本文化協會？」
Yui：「哦唔洗啦…
」Kathy：「咁呀…咦係喎呢位係..？」
今次Kathy既目標轉向已經開始食緊野既Ellie。
Ellie隨即放低筷子，仲清一清喉嚨。
Ellie：「你好，我叫Ellie。
」Kathy：「你好吖Ellie。
」之後大家一邊食一邊傾計，不過大部分都係阿希同Kathy傾，我地三個都只係一味食食食。
係食完之後Ellie拍一拍我大脾，仲俾個眼色我，示意我快d走。
雖然唔知點解佢要咁做，但我都係照做左，同佢地兩個走先。
係返學校既一段路，佢兩個都唔出聲，仲收起左未食飯之前既笑容。
我忍唔住，問下到底發生咩事，結果佢地兩個既答案居然驚人地相似。
Yui：「個位Kathy…感覺好討厭..
」Ellie：「個個Kathy…有D古怪，有種奇怪又唔識形容既感覺。
」佢地既矛頭都指向Kathy，令我有少少在意。如果係Sarah或者Ellen講呢d說話，我都只會覺得佢地係呷醋，但而家連最少呷醋既兩個都咁講…
我：「Ellie，你覺得佢真係有古怪？」
Ellie：「嗯，我覺得佢其實一早就識得我地，因為頭先我地互相介紹既時候佢既反應未免有D誇張…」
「而且，佢一開始就已經話同我地一樣係插班生，即係話佢其實一早就知道我地啦，但又扮到唔識我地咁。」
聽完Ellie咁講，我將頭先餐飯既野再整理一次，先發現Ellie句句屬實，而且不只如此。
我：「佢頭先仲久唔久會偷偷地望我地三個，好似想知我地講乜咁…」
我再諗一諗星期六李生話我知既野，唔通Kathy係個d人派黎查我既人，定或者佢就係…
Yui：「阿明…點解個個人一直望住我地既？」
嗯？邊個望住我地？
我望過去Yui指既個邊，見到Cody。
講起奇怪…Cody之前都係咁問我地既野…我仲記得佢有野無開口問。
我：「哦，佢係我隔離位，仲係我個班既女班長，做咩呀？你覺得佢都有d奇怪？」
Yui：「唔係…我只係覺得佢咁望住我地好令人唔舒服啫。」
Ellie：「佢既眼神好似好唔鐘意你咁喎阿明。」
的確，Cody望住我地既眼神完全無一絲既友善。
唔通佢好憎我？搞咁多野既人可能係佢？