「無啦啦多左幾個家姐同細妹 Season 2」: 發現
之後我都無再追問Cody既事，因為我自己而家一頭煙。
如果真係好似浩賢咁講，Cody平時對人都ok的話，咁點解佢會對我既態度特別差？
同埋既然Cody一直都係呢度讀書，咁Cody既嫌疑係咪可以暫時解除呢？唔係喎咁點解佢個陣係咁問我既野？
唔…唉呀好亂呀。
「登登登登~」
啊話咁快落堂嗱？我好似咩都無聽過咁既？
阿希：「喂阿明~」
唔好煩我住喇，我而家已經好煩架喇。
Kathy：「阿明~我地去開會咯？去傾下我地soc既野。
」Kathy…都係暫時避開佢會好D。
我：「唔好意思呀我有小小唔舒服，我想返班房休息一下。你地傾完再同返我講得架喇，反正我都無乜意見。」
Kathy：「你有無事呀？不如我同你去醫療室？
」我：「都係小小唔舒服啫唔洗太擔心，你地快d去開會啦，唔係的話小息要過架喇。」
我同浩賢打一打眼色，想話叫佢快D帶走呢兩個人，佢都get到我既意思。
浩賢：「係喇有乜要傾就要快喇，我地要儘快入紙申請，唔係盞俾人佔左先機。」
Kathy：「咁呀…你自己小心啦阿明。
」終於送走左佢地，總算鬆一口氣。
好喇…而家點算好呢，好似又走左一條掘頭路咁。
今晚返去要諗下要點查Kathy先得，靠問人好似太揚，可能好容易打草驚蛇…
算喇都係返班房先，有乜都要等放學先算。
咦係Cody？
我係返班房既途中，係班房對出既走廊見到Cody，佢一個人伏係個石壆度，望住操場，若有所思咁款。
我出於好奇，返左班房放低d書之後就行左出去，靜靜咁行到去佢旁邊，試下睇下佢到底睇緊乜。
咪又係一班人係操場係度玩，點解佢可以睇到咁入神，連我已經係佢旁邊佢都發現唔到。
定係其實只係佢唔想理我？
我：「睇緊乜呀你？
」Cody：「哇！！！
」佢叫得咁大聲，我就知道佢真係睇到入哂神，而唔係唔想理我。
佢叫得咁大聲，我就知道佢真係睇到入哂神，而唔係唔想理我。
Cody：「你幾時係度架！！
」大叫完之後，佢仍然無收返細佢既聲量，仍然係咁大聲咁講野。
我：「細聲D啦，你咁大聲連操場都聽到你講野啦。」
一聽完我咁講，佢即刻捂住自己個口，睇黎操場個度真係有令佢好在意既野。
我再望一望個操場，想睇下到底有邊個係度，留心一睇，發現原來係lulu佢地個班。
咦…晨哥都係度，好似仲望住我？
咪住先…晨哥？我記得之前Cody好似有追問過我有關晨哥既野…
唔通浩賢話佢既暗戀對象係…
我：「喂唔通你…」
Cody：「唔好出聲！踎低！」
嗱佢今次就細聲好多啦，但係踎低咪盞更惹人注目，睬佢都傻。
我無理到佢，自己一個繼續望住操場。
晨哥佢地係度做緊咩呢，咁多人係度。
Cody：「喂！你仲睇！
」哇屌做乜拉走我，我仲未搞清楚佢地係度搞乜喎。
Cody好粗暴咁拉走我，拉左我去樓梯口。
條友人仔細細咁Q大力都有既！？我隻手居然瘀哂！？
正當我仲係度關心緊自己隻手既時候，我並未察覺到殺氣已經逼近自己。
Cody：「講呀，你頭先到底睇到D乜！你到底知道幾多！」
痴線都唔知呢條友up乜，講到我好似偷窺狂咁。
我：「吓我咪只係落堂返黎見到你好陶醉咁望住個操場啫。
」Cody：「咁你頭先到底想講乜？
」我：「哦…
」我露出奸到無人有既笑容，因為我知道佢到底係度擔心緊D乜喇。
我：「嘻嘻…唔通你暗戀既人係晨哥？
」我講完句野都無三秒，就比佢好用力捂住我個口，個力度直頭好似想綁架我咁。我好激烈咁反抗，搞左好耐先成功掙脫，不得不講呢條友真係好Q大力。
我：「痴線架你，無啦啦捂住人地把口！」
Cody：「俾個咪你講好無呀？再大聲D添呀？」
我：「吓我諗我頭先已經好細聲架喎，比起你頭先句野既音量…」
Cody：「你…！」
佢一邊怒視我，但又諗唔到點駁我，最後只好嬲爆爆咁走左去。
我係咪做錯左D乜？
Ellie：「做得好錯添喇你。」
我：「嘩Ellie？你幾時係度架？」
Ellie居然企係女廁門口望住我，嚇到我個心離一離。
Ellie：「嗯…我諗係你好奸咁笑個陣囉。」
我：「嘩即係你睇住我俾佢捂住個口都唔出黎救我？」
Ellie：「係吖，因為你抵比人咁對待囉。你唔應該拎呢D野同女仔開玩笑。」
我：「吓係咩…」
Ellie：「搵機會好好向人道歉啦，同埋我諗佢唔係你想搵既人黎，你搵下辦法去查下個位Kathy仲好啦。」
Ellie知道左我想點？
我：「你係幾時…？」
Ellie：「lunch time聽完你講既野我就知道有D古怪啦，我再組織下就知道肯定又發生左事。」
Ellie真係聰明絕頂，次次都係佢第一個發現咁滯…
我：「記得唔好同佢地講，應承我。」
Ellie：「可以吖，但作為交換你要話我知到底發生乜事。」
剩低既時間雖然唔多，我都仍然一五一十咁將所有野話哂俾Ellie知，咁岩講完就打鐘了。
Ellie靜左一靜，之後就開始行返班房。
我：「喂Ellie…」
Ellie：「你去搵下愛麗絲先會比較好，我諗佢可以做到既野一定會比我地既多。」
係喎…以愛麗絲既本事，査一個人絕對唔係咩難事啦。
嫌我煩我都講多次，Ellie真係好聰明。
不過而家應該先…
我：「Sorry呀頭先我唔應該咁樣講野。」
我同緊邊個道歉？仲可以係邊個，咪係Cody。
但佢無理我，繼續睇佢既書，搞到我成個智障咁。
歉就道左，人地唔受都無辦法。
我唯有望窗外既風景，打發一下時間。
「你係幾時發現？」
就係我望到入哂神，Cody把聲忽然傳入我既耳度。